सत्ता गठबन्धनमा सोरु गाउँपालिका बाधक- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

सत्ता गठबन्धनमा सोरु गाउँपालिका बाधक

राजबहादुर शाही

मुगु — मुगुमा सत्ता गठबन्धनका दलबीच तालमेल गर्नका लागि सोरु गाउँपालिका बाधक बनेपछि गठबन्धन गर्ने विषयमा अन्योलता छाएको छ । नेपाली कांग्रेस, नेकपा माओवादी केन्द्र र  नेकपा एकीकृत समाजवादीलाई सोरु गाउँपालिकाको वडादेखि पालिकातहमा भागबन्डाको कुरा नमिल्दा अन्य छायाँनाथ रारा नगरपालिकासहित मुगुम कार्मारोङ र खत्याड गाउँपालिकामा तालमेल गर्न सत्तागठबन्धनले छलफल अघि बढाउन सकेको छैन । 


अघिल्लो स्थानीय निर्वाचनमा कांग्रेसले अध्यक्षसहित तीनवटा वडा जितेको सोरु गाउँपालिकामा अहिले नेकपा एकीकृत समाजवादी अध्यक्षको दाबी गरेको र कांग्रेसले अध्यक्ष दिन नमानेपछि तालमेलमा सकस परेको छ ।

अध्यक्ष पाउनुपर्छ भन्ने आफूहरूको दाबी रहेको र कांग्रेस नमानेपछि तालमेल गर्न कठिन भएको एकीकृत समाजवादीका अध्यक्ष धर्मबहादुर शाहीले बताए । सोही गाउँपालिकामा सहमति जुटाउन सत्ता गठबन्धनको छलफल जारी रहेको उनको भनाइ छ । सोरु गाउँपालिकामा भोटको आधारमा पहिलो कांग्रेस‚ दोस्रो समाजवादी र तेस्रो स्थानमा माओवादी केन्द्र छ ।

सोरु गाउँपालिकामा तालमेल गर्ने विषयमा माओवादी केन्द्र भने तीन दलीय सत्ता गठबन्धन गरेरै जाने अडानमा देखिएको छ । माओवादी केन्द्रका जिल्ला संयोजक मंगलबहादुर शाही भन्छन्‚ ‘सोरु गाउँपालिकामा कसैलाई बाहिर नराखौं । तीनवटै पार्टी मिलेर जाऔं भन्ने पक्षमा माओवादी छ ।’

उनले एउटा मात्र स्थानीय तहमा गठबन्धन टुटे‚ त्यसको असर तीनवटै पार्टीलाई पर्ने बताए । अर्कोतर्फ कांग्रेस र एकीकृत समाजवादी पार्टीबीच सहमति नभए अध्यक्ष आफ्नो भागमा पार्न सकिन्छ कि भन्ने माओवादीको आश छ ।

२०७४ सालको स्थानीय निर्वाचनमा अध्यक्षसहित तीनवटा वडा कांग्रेसले जितेको थियो भने उपाध्यक्षसहित ६ वडामा एमाले र माओवादीले तीन वडामा जितेकोमा २ वटामा वडाअध्यक्ष जितेको छ ।

सोरु गाउँपालिकामा तालमेल गर्न तीन दलको चार पटक बैठक बसेर पनि सहमति जुट्न नसकेपछि आफूहरू अझै प्रयासमा रहेको पाँच दलीय गठबन्धन संयन्त्र संयोजन समितिका सभापति ऐनबहादुर शाहीले बताए ।

प्रकाशित : वैशाख ५, २०७९ १२:४४
प्रतिक्रिया
पठाउनुहोस्

‘सुइना कर्णाली’ का लेखकको परिवारलाई समस्या

राजबहादुर शाही

मुगु — चर्चित नाटक ‘सुइना कर्णाली’ का लेखक स्वर्गीय सुमन मल्लको परिवारमा आर्थिक समस्या भएको छ । वैशाख २९ गते ४० वर्षको उमेरमा मल्लको मृत्यु भएपछि पत्नी गंगालाई छोराछोरी हुर्काउन समस्या भएको हो ।

मल्लको मृत्युपछि परिवारको खर्चको जोहो गर्न र छोराछोरीको पढाइ खर्च धान्न समस्या भएको उनको गुनासो छ । ‘११ महिनासम्म दुःख कष्टका दिन बिताइयो,’ उनले भनिन्, ‘बुढेकालसम्म कसरी दिन कटाउने भन्ने पिरलो छ ।’ गरिबीका कारण छोरीहरू १३ वर्षीया एलिना, ९ वर्षीया सपना र ८ वर्षका छोरा कृष्णलाई कसरी लालनपालन गर्ने भन्ने चिन्ताले सधैं सताउने गरेको उनले गुनासो गरिन् ।

जस्ता पाताले छाएको एक तले घर मात्र आफ्नो सम्पतिको नाममा रहेको उनले बताइन् । उनीहरूको साथमा ७० वर्षीया सासु मुगा पनि छिन् । सासु बिमारी पर्दा औषधि उपचार गर्न झन् समस्या हुने गरेको उनले बताइन् । ‘श्रीमान्को उपचारमा लागेको ३/४ लाख रुपैयाँ ऋण अझैं तिर्न बाँकी छ,’ उनले भनिन्, ‘आफ्नो बारी नहुँदा एक मुठी अन्न पनि उत्पादन हुँदैन, छोराछोरी र सासुको खाना खर्च जुटाउनै मुस्किल भयो ।’

उनको आर्थिक अवस्था थाहा पाएर छायानाथरारा नगरपालिकाले गंगालाई महाकाली माध्यमिक विद्यालयमा चौकीदार रुपमा जागिर दिएको छ । विद्यालयबाट तलबवापत उनले मासिक ६ हजार रुपैयाँ तलब पाउँछिन् । ‘त्यो तलबले कहाँ कहाँ पुर्‍याउने ?,’ उनले भनिन्, ‘सासु बिरामी भइरहनुहुन्छ, २ छाक खान पनि मुस्किल भयो ।’

उनीहरूको समस्या बुझेर गमगढीस्थित सिद्धार्थ बोडिङ स्कुलले ३ छोराछोरीको पढाइ निःशुल्क गरेको छ । तर पाठ्यपुस्तक, कापीकलम, ड्रेसलगायत खर्च भने आफै व्यहोर्नुपरिरहेको गंगाले बताइन् । उनका अनुसार एलिना कक्षा ५, सपना १ र छोरा कृष्ण एलकेजीमा पढ्दैछन् । ‘केही समय त बोर्डिङले निःशुल्क पढाएको छ,’ उनले भनिन्, ‘उनीहरूलाई माथिल्लो तहको शिक्षा कसरी दिने भन्न्ने चिन्ता भइरहन्छ ।’

पहिले सुमन हुँदासम्म राजनीतिक दलका नेता, जनप्रतिनिधि, कर्मचारी, साहित्यकारलगायतका व्यक्तिहरू घरमा आउने गरे पनि अहिले कोही नजाँदा निरास भएको आमा मुगाले दुःखेसो गरिन् । ‘छोराले छोडेपछि चिन्ताले होला शरिर पनि कमजोर हुँदै गएको छ,’ उनले भनिन्, ‘म पनि डाँडामाथिको जुनजस्तै भइसके, मेरो मृत्युपछि बुहारीले एक्लै कसरी नातिनातिनी हुर्काउलिन् ?’ ‘सुइना कर्णाली’सहित ‘कर्णाली दख्खिन बग्दछ’ लगायत नाटक लेखेका मल्लले सुनबहादुर पात्रको भूमिका समेत गरेका थिए ।

प्रकाशित : वैशाख २, २०७९ ०८:३८
पूरा पढ्नुहोस्
प्रतिक्रिया
पठाउनुहोस्
×