जापान : सपना संघर्ष र सफलता सार्वजनिक 

नेपालका लागि जापानी राजदूत किकुता युताका, लेखक शैलेन्द्र अधिकारी, जापानका लागि नेपाली पूर्वराजदूत मदनकुमार भट्टराई तथा लेखक थापाले काठमाडौंमा शनिबार आयोजित कार्यक्रममा उक्त पुस्तक संयुक्त रुपमा विमोचन गरेका हुन् । किताब समय सान्दर्भिक भएको युताकाले बताए । 'किताबमा संघर्षलाई जोड दिइएको छ, जापानीहरुले नेपालको र नेपालीहरुले जापानको चालचलन संस्कृति बुझ्न सिक्न जरुरी छ । किताब र लेखकको फाइदाका लागि मैले प्रचारप्रसार गरिरहेको छैन । नेपाल-जापान बीचको सम्बन्ध सुमधुर पार्न खोजिएको छ,' उनले भने, 'पछिल्लो समय जापानमा नेपालीको संख्या बढिरहेको छ । त्यहाँ बस्नेहरु खुसी छन् भन्ने लाग्छ । जापानमा युवा जनशक्तिको खाँचो छ । त्यो संख्या उपलब्ध गराएकोमा हामी नेपालप्रति आभारी छौं ।'

त्यसैगरी जापानका लागि नेपाली पूर्वराजदूत भट्टराईले जापानको सभ्यता, प्राकृतिक सौन्दर्य र जापानीहरुको मृदुभाषी बानीले लोभ्याउने गरेको र त्यो कुरा किताबमा आएको बताए ।' राजदूतको रुपमा पहिलोपटक पुग्दा जापानको सभ्यता, प्राकृतिक वातावरण र जापानका मृदुभाषी जनताले मलाई खुबै लोभ्यायो,' उनले भने, 'जापानको सपना संघर्ष र सफलताले यसलाई समेटेको छ ।'

लेखक थापाले जापानमा बसेर लामो समय दोभाषेको काम गरेको अनुभव सुनाए । उनले भने, 'यो किताब जापान जान चाहनेलाई समर्पित छ । मैले हाँसिल गरेको ज्ञान, अनुभव पस्किएको छु । जापान जान चाहनेका लागि यो पुस्तकले त्यहाँको समाज र संघर्षलाई कसरी आत्मसाथ गर्न सकिन्छ र सफलता कसरी प्राप्त गर्न सकिन्छ भन्न सघाउने छ ।'

लेखक अधिकारीले किताबमाथि टिप्पणी गर्दै भने, 'भर्खरै जापान पुगेका, जापान जान लागेका, जापान जान सपना देखेका र जापानबारेमा जान्न चाहने सबैका लागि यो एक बहुउपयोगी पुस्तक हो ।' उनका अनुसार पुस्तकमा जापानी रहनसहन, खानपान, भाषा, संस्कृतिदेखि नेपालीहरुले जापानमा अवलम्बन गर्नुपर्ने हरेक विषयहरुलाई मिहिन ढंगले व्याख्या र विश्लेषण गरिएको छ ।

जापानः सपना संघर्ष र सफलता लाई चक डस्टर प्रकाशन गृहले बजारमा ल्याएको हो । किताबको मूल्य ५ सय रहेको छ ।