नोबेल विजेता साहित्यकार केन्जाबुरो ओएको निधन
काठमाडौँ — नोबेल पुरस्कार विजेता साहित्यकार केन्जाबुरो ओएको निधन भएको छ । सन् १९९४ मा नोबेल साहित्य पुरस्कार विजेता ओएको गत मार्च ३ मा ८८ वर्षको उमेरमा निधन भएको हो । उनको निधन १० दिनअघि भए पनि सोमबार मात्र प्रकाशक कोदान्साले सार्वजनिक गरेको हो ।
काव्यात्मक शक्तिका साथ काल्पनिक संसार निर्माण र जीवन र मिथकको प्रयोग गरी आजको मानव दुर्दशाको एक चिन्ताजनक तस्बिर चित्रण गरेको भन्दै उनलाई नोबेल कमिटीले नोबेल पुरस्कार दिएको थियो । उनी नोबेल साहित्य पुरस्कार पाउने दोस्रो जापानी लेखक हुन् ।
उनीअघि सन् १९६८ मा कावाबाता यासुनारीले उक्त पुरस्कार पाएका थिए । पछिल्लो पटक भने सन् २०१७ मा लेखक काजुओ इसिगुरोले नोबेल साहित्य पुरस्कार पाएका थिए ।
केन्जाबुरो ओएका कथा र निबन्धमा सैन्यवाद र निशस्त्रीकरणदेखि निर्दोषता र मानसिक आघातसम्मका विषय समावेश छन् । ओएले सन् १९५७ मा टोक्यो विश्वविद्यालयमा फ्रान्सेली साहित्य अध्ययन सुरु गरेका थिए । त्यसपछि उनले छोटा कथाहरू प्रकाशन गरेका थिए । सन् १९५८ मा उनको 'द क्याच' ले अकुतागावा पुरस्कार पाएको थियो ।
उनी सधैं युद्ध र जापानी राष्ट्रवादको पुनर्जागरणको विरोधमा थिए । उनी पूर्वप्रधानमन्त्री सिन्जो आबेको 'सेल्फ डिफेन्स फोर्स' को संविधान संशोधनको योजनाको पनि चर्को आलोचक थिए । 'डेथ बाइ वाटर', 'अ हिलिङ फेमिली', 'निप द बड्स, सुट द किड्स', 'द साइलेन्ट क्राइ' लगायत उनका चर्चित कृति हुन् ।
प्रकाशित : फाल्गुन २९, २०७९ १६:३३
