पूर्वी नवलपरासी — जग्गा धितो राखेर अटो रिक्सा किन्न खोजेका पूर्वी नवलपरासीको कावासोतीका एक युवक ठगिएका छन् । धितो राखेर अटो निकालिदिने भन्दै जग्गा एक महिलाले झुक्याएर आफ्नो नाममा जग्गै पास गरेको खुल्न आएको हो । 

सुरेश विकको जायजेथा जग्गा धितो राखेर अटो खरिद गर्ने भन्दै आफ्नै नाममा जग्गा पास गरेको खुलेपछि शुक्रबार कावासोतीकी लीला खत्रीलाई प्रहरीले पक्राउ गरेको छ । सुरेश दैनिक ज्यालामजदुरी गरेर गुजारा चलाउँदै आएका व्यक्ति हुन् । उनी निरक्षरसमेत छन् ।

कावासोती नगरपालिका वडा नम्बर–१६, डण्डा बस्ने सुरेशको जग्गा धितो राखेर अटो निकालिदिने भन्दै लीलाले ७ धुर जग्गा आफ्नै नाममा मालपोत कार्यालय कावासोतीवाट नामसारी गरेकी हुन् । ‘सम्पत्तिको नाममा मेरो ७ धुर जग्गा थियो, सबै आफ्नो नाममा पास गरिछन्,’ सुरेशले दुःखेसो पोखे ।

आफू बेरोजगार भएकाले चिनेजानेकैलाई भन्दा अटो निकाल्न सहज हुने भन्दै आफूले लीलासँग सहयोग मागेको उनी बताउँछन् ।‘बेरोजगार भएकाले अटो निकाल्ने भनेर चिनजानकी लीला खत्रीलाई कुरा राखेँ,’ सुरेशले भने, ‘मेरो नाममा रहेको जग्गा धितो राखेर अटो निकाल्ने कुरामा सहमति भयो । मालपोत कार्यालयमा अटो खरिद गर्न ऋण निकाल्न जग्गा धितो राख्न पर्ने भनेपछि म जग्गाधनी पुर्जा र नागरिकता लिएर मालपोत गएँ । मेरो जग्गा धितो राख्न पर्नेमा ती महिलाले आफनो नाममा नामसारी गरेकी रहिछन् । मैले पढ्न जानेको छैन, विश्वा गर्दा सर्वस्व गुम्यो ।’

मालपोत कार्यालय कावासोतीका अनुसार कित्ता नम्बर १४३४ को ७ धुर जग्गा फागुन २२ गते लिलाकुमारी खत्रिको नाममा नामसारी भएको देखिन्छ । आफूले अटो नपाएपछि सम्पर्क गर्न खोज्दा महिला सम्पर्कमै नआएपछि उनले गाउँले गुहारेका थिए । छरछिमेकी र गाउँले मिलेर मालपोत कार्यालयमा बुझदा जग्गा कुनै वित्तीय संस्थामा धितो नराखी सोझै ती महिलाको नाममा पास नै गरेको खुलेको स्थानय तेजबहादुर केसीले जानकारी दिए । आफूहरुले दिएको उजुरीकै आधारमा शुक्रबार ती महिला पक्राउ परेको उनले बताए ।

जिल्ला प्रहरी कार्यालयका सूचना अधिकारी डीएसपी सन्तोष पाठकले अनुसन्धान प्रक्रिया अघि बढाइएको जानकारी दिए ।