कान्तिपुर वेबसाईट
AdvertisementAdvertisement
२३.१२°C काठमाडौं
काठमाडौंमा वायुको गुणस्तर: १३४

आश्विनीका चित्र किताब र प्रदर्शनीमा

कान्तिपुर संवाददाता

काठमाडौँ — १० वर्षीया आश्विनी मानन्धरका कथा र चित्रमा सजिएको किताब ‘पिरामिडमा पाण्डा’ सार्वजनिक भएको छ । शुक्रबार काठमाडौंको नक्सालस्थित नेपाल ललितकला प्रज्ञा प्रतिष्ठानमा उनको चित्र कथाको किताब 'पिरामिड र पाण्डा' सार्वजनिक गरिएको हो ।

आश्विनीका चित्र किताब र प्रदर्शनीमा

आश्विनी काठमाडौंको छाउनीस्थित मैत्री स्कुलमा कक्षा ३ मा अध्ययनरत छिन् । उनले बुबा कार्टुनिस्ट रविन्द्र मानन्धरको प्रेरणाले चित्र कोर्न थालेकी हुन् । कथामा चीनको पाण्डा इजिप्ट घुम्न जाँदाको रमाइलो कुरालाई उनले कथा र चित्रमा उतारेकी छन् ।


किताब ललितकला प्रज्ञाप्रतिष्ठानका कुलपति नारदमणि हर्तम्छाली, पूर्वकुलपति केके कर्माचार्य, बाल वाङ्मयका तथा अनुसन्धान केन्द्रका अध्यक्ष प्रमोद प्रधान, मैत्री स्कुलका प्रधानाध्यापक ओजेश बज्राचार्य, कार्टुनिस्ट अविन श्रेष्ठ लगायतले सार्वजनिक गरेका थिए ।


पुस्तक विमोचन कार्यक्रममा बोल्दै वरिष्ठ कार्टुनिस्ट अविन श्रेष्ठले बाल प्रतिभा घर घरमा हुने भएपनि त्यसलाई भविष्यमा एकनासले लगिरहन अभिभावक र घरको वातावरण महत्त्वपूर्ण हुने बताए ।


त्यस्तै, बाल इतिहासकार प्रमोद प्रधानले अहिलेको समयमा प्रविधिको प्रयोग व्यापक रूपमा बढेको तर बालबालिकाको हुर्काईमा अभिभावकहरुको भूमिका उदासिन रहेको औंल्याए । बाल प्रतिभाको मलजलका लागि अभिभावक नै पहिला जिम्मेवार हुनुपर्ने उनको भनाइ थियो ।


‘पिरामिडमा पाण्डा’ १६ पृष्ठको रंगिन पुस्तक हो । विवेक सिर्जनशील प्रकाशनले बजारमा ल्याएको यस किताबको बजार मूल्य १५० रूपैयाँ रहेको छ ।


सोही अवसरमा आश्विनीका चित्रकलाहरु पनि प्रदर्शनीमा राखिएको छ । चित्रकलाहरु शनिबारसम्म प्रदर्शनीमा राखिने आश्विनीका बुबा रविन्द्र मानन्धरले बताए ।






प्रकाशित : फाल्गुन २६, २०७९ १८:०६
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?