कालीकोट — शुक्रबार बेलुकादेखि अवरुद्ध गरिएको कर्णाली राजमार्ग अन्तर्गत सुर्खेत-जुम्ला सडक अझै खुल्न सकेको छैन । हुम्ला र बाजुराको सिमानामा सामान झारेर नेपालगञ्ज जाँदै गरेको भे १ ख ३५१८ नम्बरको ट्रकले शुक्रबार बेलुका कर्णाली राजमार्गको दैलेख सिमखण्डमा ठक्कर दिँदा आठबिस नगरपालिका ४ का ५५ वर्षीय तिलक माझीको मृत्यु भएपछि स्थानीयले सडक अवरुद्ध गरेका हुन् ।

शनिबार दिनभर नगरपालिकाको सहजीकरणमा स्थानीय र व्यसायीबीच क्षतिपूर्तिको लागि छलफल भए पनि निष्कर्षमा पुग्न नसक्दा सडक खुल्न सकेको छैन ।

स्थानीयले १४ लाख माग गरेको र व्यवसायीले नियमानुसारको क्षतिपूर्ति मात्र दिने अडान लिएपछि विवाद चुलिएको प्रहरीले जनाएको छ । ब्यवसायी नियमानुसारको ५ लाख रुपैयाँ दिन सहमत छन् । एक प्रहरी अधिकारीले भने स्थानीयले १४ लाख मागेकाले शनिबार दिनभर पनि सडक खुल्न सकेको छैन ।

सडक अवरुद्ध हुँदा सुर्खेत नेपालगञ्जबाट कालीकोट, जुम्ला, मुगु, हुम्ला, बाजुरा जाने र माथिबाट तलतिर जाने १ हजार बढी यात्रु बाटोमा अलपत्र छन् । प्रहरीले गाडी तोडफोड हुनसक्ने जनाउँदै दैलेखको पाल्ताडा र राकम खिड्कीज्यूला क्षेत्रमा गाडी रोकेको यात्रुहरूको गुनासो छ ।

शुक्रवारदेखि सडक अवरुद्ध हुँदा यात्रुवाहक र मालवाहक गरी ३ सयभन्दा बढी गाडी बाटोमै अलपत्र परेका छन् । अवरुद्ध सडक खुलाउन दैलेख प्रहरीले प्रयास गरिरहेको भए पनि स्थानीयहरू आक्रेशित भएकाले सम्भव नभएको कालीकोटका प्रहरी प्रमुख जयश्वर रिमालले बताए । उनका अनुसार पीडित पक्षसँग क्षतिपूर्तिका लागि अन्तिम प्रयास भइरहेकाले शनिबार रातिसम्म सडक खुल्ने अपेक्षा गरिएको छ ।