कलिङ फेस्टिभलमा दुई नेपाली लेखक पुरस्कृत हुँदै- साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

कलिङ फेस्टिभलमा दुई नेपाली लेखक पुरस्कृत हुँदै

कान्तिपुर संवाददाता

नयाँ दिल्ली — नेपालका दुई जना लेखकहरु भारतको कलिङ लिटरेरी फेस्टिवल ‘केएलएफ बुक अवार्ड’ का लागि छानिएका छन् ।
साहित्यकार रञ्जना निरौला र लेखक सुमित शर्मा उक्त अवार्डका लागि चुनिएको आयोजक संस्थाले जनाएको छ । भुवनेश्वरमा आगामी फेब्रुअरीमा हुने कलिङ लिटरेरी फेस्टिवल समारोहमा लेखकहरु पुरस्कृत हुनेछन् ।

साहित्यकार निरौलाको निबन्धसंग्रह ‘अनुभूतिको अवतरण’ तथा शर्माको ‘वेक अप अली वेक अप नाऊ’ पुस्तक उक्त अवार्डका लागि छनोटमा परेको हो । आयोजक संस्थाका निर्देशक रश्मी रञ्जन परिदाले विभिन्न विद्याका पुस्तकहरुबाट नेपाल र भारतका लेखकहरुको छनोट गरिएको बताए ।

भुवनेश्वरमा बर्सेनि कलिङ साहित्य महोत्सव हुँदै आएको छ । यसै वर्षबाट काठमाडौंमा पनि उक्त महोत्सवको आयोजना थालिएको छ । गत अक्टुबरको १५ र १६ तारीखमा काठमाडौंमा महोत्सव आयोजना भएको थियो । आगामी वर्ष सेप्टेम्बर १ देखि ३ मा काठमाडौंमा महोत्सव गरिने निर्देशक परिदाले बताए ।

फेब्रुअरीको २४, २५ र २६ तारीखमा भुवनेश्वरमा हुने महोत्सवमा भारतका लेखकहरु पनि सम्मानित हुँदैछन् ।

प्रकाशित : माघ ८, २०७९ १३:५८
प्रतिक्रिया
पठाउनुहोस्

अधिकारीको उपन्यास 'सत्यहरण' सार्वजनिक

कान्तिपुर संवाददाता

दाङ — राप्ती साहित्य परिषद्को आयोजनामा शनिबार दाङको घोराहीमा एक समारोहका बीच साहित्यकार राजु अधिकारीको उपन्यास ‘सत्यहरण’ विमोचन गरिएको छ ।

पुस्तकको समीक्षा गर्दै सहित्यकार पुस्कर रिजाल ‘पुष्प’ले उपन्यासले हाम्रो समाजले भोगिरहेको एउटा जल्दोबल्दो समस्यालाई सरल तर सटिक रूपमा चित्रण गर्ने उपन्यासको रूपमा आएको बताए ।

पूर्वीय धर्म, संस्कृति, सभ्यता र दर्शनमाथि विभिन्न तरिकाले भइरहेका आक्रमणको विषयलाई मूल विषय बनाएको उपन्यासमा लेखेको लेखक अधिकारीले बताए । नेपालको सन्दर्भमा कसले र कसरी यो काम सञ्चालन गरिरहेको छ र यसमा पद, पैसा र अन्य व्यक्तिगत स्वार्थको लागि उच्च ओहदामा बसेका शिक्षित व्यक्तिहरू कसरी प्रयोग भइरहेका छन् भन्ने कुरालाई उजागर गर्ने प्रयास गरेको उनले बताए ।

मूल विषयसँगै लेखकले पुस्तकमा प्रेमलाई पनि स्थान दिएका कारण उपन्यास रोमाञ्चक पनि बनेको बताए । उपन्यासका दुई मुख्य पात्र रक्षा र कैलाशको प्रेम उपन्यासको सुरुवात देखि अन्तसम्म नै प्रेमका अनेक वाधा अवरोध पार गर्दै अगाडि बढ्छ ।

पुस्तकलाई वी रिडले प्रकाशन गरेको छ ।

प्रकाशित : माघ ८, २०७९ १३:३७
पूरा पढ्नुहोस्
प्रतिक्रिया
पठाउनुहोस्
×