पद्मश्री विजेता लेखक लामा दमकमा- साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

पद्मश्री विजेता लेखक लामा दमकमा

‘नेपाली भाषा विस्तार तथा साहित्यिक आदानप्रदानले नेपाल, भारतसहित विश्वभरका नेपालीको शिर उँचो भएको छ’
कान्तिपुर संवाददाता

दमक — भारतीय लेखक एवं साहित्यका लागि प्रतिष्ठित पद्मश्री विजेता सानु लामाले नेपाली भाषाको विस्तार तथा साहित्यिक आदानप्रदानले नेपाल, भारतसहित विश्वभरका नेपालीका शिर उचो बनाउने काम गरेको बताएका छन् । 

दमकमा आयोजित एक साहित्यिक समारोहमा सिक्किमेली कवि, लेखकको टोली लिएर सहभागी हुन आएका लामाले सिक्किममा रहेका नेपालीहरू पनि नेपालबाटै गएको र नेपाली भाषीको प्रभाव तथा पहुँचकै कारण भारतमा नेपाली भाषाले संवैधानिक मान्यता पाएको बताए । ८४ वर्षीय लेखक लामाले सिक्किममा समेत नेपाली भाषाले सरकारी कामकाजको भाषिक मान्यता पाइसकेको बताए । नेपाली भाषा साहित्यमा गरेको योगदानका लागि सन् २००५ मा लामाले पद्मश्री पाएका थिए । उनले ‘मृगतृष्णा’ कथा संग्रहका लागि सन् १९९३ मा साहित्य अकादमी पुरस्कार पाएका थिए ।

दमकस्थित सेर्गेम प्रकाशन गृहको आयोजनामा शनिबार सम्पन्न समारोहमा समालोचक डा. गोविन्दराज भट्टराईले लेखक सानु लामाजस्ता साहित्यिक स्रष्टाका कारण भाषा साहित्यको प्रवद्र्धन तथा उन्नयन भइरहेको टिप्पणी गरे । ‘राजनीतिक भूगोल वा सिमानाभन्दा पर साहित्यले हामीलाई कसरी एकअर्कामा जोड्नसक्छ भन्ने उदाहरण समेत हुनुहुन्छ सानु लामा’, भट्टराईले भने‚ ‘हामीले दार्जिलिङ, सिक्किम, आसामसहितका भारतका नेपालीभाषी क्षेत्रबाट यसैगरी साहित्यिक स्रष्टाहरूलाई निम्तो गर्ने र साहित्यिक जमघट गर्ने अभियान थालेका छौँ, यो क्रमलाई निरन्तरता दिनेछौँ ।’


प्रकाशित : माघ २, २०७९ १३:२६
प्रतिक्रिया
पठाउनुहोस्

युनियन, प्राइम र गुराँस लाइफ इन्स्योरेन्सबीच मर्जर सम्झौता

सेयर अनुपात बराबर 
कान्तिपुर संवाददाता

काठमाडौँ — तीन जीवन बीमा कम्पनी युनियन, प्राइम र गुराँस लाइफ इन्स्योरेन्सबीच एक आपसमा मर्जर गर्ने अन्तिम सम्झौता भएको छ । मर्जर सम्झौता पत्रमा युनियन लाइफका अध्यक्ष शुलभ अग्रवाल, प्राइमका पियुष राज अर्याल र गुराँस लाइफका अध्यक्ष विवेक दुगडले हस्ताक्षर गरे । 

सम्झौताअनुसार युनियन, प्राइम र गुराँस लाइफ इन्स्योरेन्स कम्पनीको सेयर अनुपात १:१:१ कायम गरिएको छ । अर्थात हाल जुन कम्पनीको सेयर जति छ, मर्जरपछि बन्ने कम्पनीको सेयर पनि त्यति नै कायम हुनेछ ।

मर्जर सम्झौता अनुसार नयाँ बन्ने कम्पनीको नाम हिमालय लाइफ इन्स्योरेन्स लिमिटेड रहने छ भने युनियन लाइफ इन्स्योरेन्स कम्पनीका अध्यक्ष शुलभ अग्रवाल नयाँ बन्ने कम्पनीको अध्यक्ष रहने छन् । यस्तै युनियन लाइफ इन्स्योरेन्स कम्पनीको प्रमुख कार्यकारी अधिकृत मनोज कुमार लाल कर्ण मर्जर पश्चात बन्ने नयाँ कम्पनीको प्रमुख कार्यकारी अधिकृत रहने छन् ।

सम्झौता अनुसार मर्जर सम्बन्धी आवश्यक सम्पूर्ण कार्यहरु सम्पन्न गरी २०७९ चैतभित्र एकीकृत कारोबार गरी कम्पनीका शाखाहरु, कर्मचारी समायोजनका कार्यहरु समेत सम्पन्न गर्ने दाबी गरिएको छ । मर्जर सम्झौता कार्यक्रममा नेपाल बीमा प्राधिकरणका अध्यक्ष सूर्य प्रसाद सिलवाल तीन वटा कम्पनीहरु एक आपसमा मर्जर हुनु ऐतिहासिक कार्य भएको बताउँदै नियमनकारी निकायको तर्फबाट मर्जर कार्यमा पूर्ण सहयोग रहने जानकारी गराए । यसैगरी नेपाल बीमा प्राधिकरणका कार्यकारी निर्देशक राजुरमण पौडेलले मर्जर सम्झौता सफल बनाउन प्राधिकरणको तर्फबाट आवश्यक सहयोग र समन्वय गर्ने बताए ।


प्रकाशित : माघ २, २०७९ १३:२४
पूरा पढ्नुहोस्
प्रतिक्रिया
पठाउनुहोस्
×