फोटोमा थाहाको सौन्दर्यता- साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

फोटोमा थाहाको सौन्दर्यता

कान्तिपुर संवाददाता

मकवानपुर — मकवानपुरको उत्तरी क्षेत्रलाई झल्काउने तीन दिने ‘थाहा फोटो प्रदर्शनी २०७९’ सकिएको छ । थाहा नगरपालिकाद्वारा काठमाडौंको वसन्तपुरमा आयोजित फोटो प्रदर्शनीले त्यस क्षेत्रको पर्यटन विकासमा टेवा पुग्ने विश्वास लिइएको छ ।

बसन्तपुरस्थित कालभैरव डबलीमा भएको प्रदर्शनीमा स्वदेशी र विदेशी गरी १३ हजार जनाले अवलोकन गरेको बताइएको छ । दामन, पालुङ, चित्लाङ तथा कुलेखानीको पर्यटकीय गन्तव्यको फोटो प्रदर्शनीमा राखिएको थियो ।

प्रदर्शनीमा राखिएका फोटोहरू जर्मनी, न्युजिल्यान्ड, क्यानाडा र युक्रेनका पर्यटकले खरिद गरेका थिए । करिब २५० भन्दा बढी फोटो बिक्री भएको कार्यक्रम व्यवस्थापन गर्ने जिम्मा लिएको संस्था फरक सोचका संयोजक यादवजंग रायमाझीले जानकारी दिए ।

स्थानीय युवा गणेश विष्टले खिचेका फोटो प्रदर्शनी कात्तिक १८ गतेबाट सुरु भएको हो । थाहा नगर र इन्द्रसरोबर आसपासका पर्यटकीय गन्तव्य, प्राकृतिक सौन्दर्य, जीवन यापन, कला, संस्कृति, धार्मिक स्थलहरु आदि समेटिएको फोटो बढी बिक्री भएको थियो ।

थाहा नगरपालिकाको आयोजना, छिमेकी इन्द्रसरोवर गाउँपालिकाको समन्वय, पर्यटन बोर्डको प्रवर्द्धन, स्थानीय संस्था फरक सोचको व्यवस्थापन र ओम अध्याय रिट्रिटको सहयोगमा फोटो प्रदर्शनीमा रहेको थियो ।

फोटो प्रदर्शनीको अवलोकन गर्दै संस्कृति, पर्यटन तथा नागरिक उड्यन मन्त्री जीवनराम श्रेष्ठले यस्ता गतिविधिले पर्यटन क्षेत्रको विकासमा टेवा पुर्‍याउने बताए । मन्त्री श्रेष्ठले नेपाल सरकारले जारी गरेको ७३ बुँदे पर्यटन विकासको कार्ययोजनालाई समेटेर थाहा नगरलाई विकास गर्ने बताए । सरकारले सन् २०२३ देखि २०३२ सम्म भ्रमण दशक घोषणा गरेकोले यो फोटो प्रदर्शनीले आन्तरिक र वाह्य पर्यटकहरूका लागि नयाँ गन्तव्य तय गरेको मन्त्री श्रेष्ठको दाबी थियो ।

प्रकाशित : कार्तिक २२, २०७९ १३:२२
प्रतिक्रिया
पठाउनुहोस्

समस्याग्रस्त सहकारीबाट ऋण लगेकाले १५ दिनभित्र चुक्ता नगरे कालोसूचीमा राखिने

कान्तिपुर संवाददाता

काठमाडौँ — सरकारद्वारा समस्याग्रस्त घोषणा गरिएका सहकारी संस्थाका ऋणीहरुले तोकिएको समयमा ऋण चुक्ता नगरे कालोसूचीमा पर्ने भएका छन् । समस्याग्रस्त सहकारी व्यवस्थापन समितिको कार्यालयले मंगलबार सूचना जारी गरेर तोकिएको समयभित्र ऋण चुक्ता नगरे कानुन बमोजिम कालोसूचीमा राखिने उल्लेख छ । सूचनामा ऋण भुक्तानीका लागि १५ दिनको म्याद दिइएको छ ।


‘समस्याग्रस्त घोषित सहकारी संस्थाहरुको सम्पत्ति व्यवस्थापन तथा दायित्व भुक्तानीका लागि सम्बन्धित सञ्चालक/ऋणी/व्यवस्थापक/कर्मचारीहरुलाई निजहरुले तिर्नुपर्ने दायित्व र साँवाको ब्याज बुझाउनका लागि पटक पटक आग्रह गर्दा पनि अझै भुक्तानी भइनसकेकाले १५ दिनको समय दिइएको छ,’ समितिले जारी गरेको सूचनामा भनिएको छ, ‘उक्त समयभित्र आफूले तिर्नुपर्ने साँवा ब्याज समितिका कार्यालयमा बुझाउनुहोला । अन्यथा कानुन बमोजिम निजको राहदानी रोक्का राख्ने, नाम कालोसूचीमा राखिने व्यहोरा सूचनामार्फत जानकारी गराइन्छ ।’

समितिका अनुसार समस्याग्रस्त रहेका सहकारीहरुमा स्ट्याण्डर्ड सेभिङ एण्ड क्रेडिट को–अपरेटिभ लिमिटेड, प्रभु बचत तथा ऋण सहकारी संस्था, कन्जुमर बचत तथा ऋण सहकारी संस्था, चार्टर्ड सेभिङ एण्ड क्रेडिट को–अपरेटिभ, स्ट्याण्डर्ड मल्टिपर्पोज को–अपरेटिभ, लु: निभा बहुउद्देश्यीय सहकारी संस्था, प्यासिफिक सेभिङ एण्ड इन्भेष्टमेन्ट को–अपरेटिभ, कोहिनुर हिल सेभिङ एण्ड क्रेडिट को–अपरेटिभ, कुबेर बचत तथा ऋण सहकारी संस्था, भेगास बचत तथा ऋण सहकारी संस्था, सोसाइटल बचत तथा ऋण सहकारी संस्था छन् ।

हालसम्म सरकारले १२ वटा सहकारीलाई समस्याग्रस्त घोषणा गरेको छ । तीमध्ये ओरियण्टल कोअपरेटिभको सर्वोच्च अदालतले खारेजी गरिदिएपछि हाल समस्याग्रस्त सहकारीको संख्या ११ वटा छ । समितिले यी संस्थाका ऋणीलाई ऋण भुक्तानी गर्न ताकेता गरेको हो ।


प्रकाशित : कार्तिक २२, २०७९ १३:१९
पूरा पढ्नुहोस्
प्रतिक्रिया
पठाउनुहोस्
x
×