राईको ‘तेप्लायु’लाई विमल कृति पुरस्कार प्रदान- साहित्य/विविध - कान्तिपुर समाचार

राईको ‘तेप्लायु’लाई विमल कृति पुरस्कार प्रदान

प्रदीप मेन्याङ्बो

सुनसरी — धरानस्थित कवि विमल गुरुङ पुस्तकालयद्वारा स्थापित ‘कवि विमल गुरुङ कृति पुरस्कार’ युद्ध साहित्यमा आधारित ‘तेप्लायु’ कविता संग्रहका कवि काङमाङ नरेश राईलाई प्रदान गरिएको छ । पुरस्कार राशि २ लाख ५१ रुपैयाँ र ताम्रपत्र रहेको छ ।

उनलाई गुरुङको ५१ औं जन्म जयन्ती तथा ३१ औं राष्ट्रिय कविता महोत्वसमा अग्रज कवि जसराज किराती, पुस्तकालयका अध्यक्ष पूर्णबहादुर गुरुङ, प्राज्ञ शशि लुमुम्बु, प्राडा टंक न्यौपाने र पुस्तकालयका संस्थापक सदस्य तथा स्व. कवि विमल गुरुङकी बहिनी शान्ति गुरुङले नगद र ताम्रपत्रसहित सम्मान गरेका थिए ।

अग्रज कवि किरातीले धरानमा पूर्व गोर्खा लाहुरे पूर्णबहादुर गुरुङले आफ्ना एक्ला छोरा विमलको स्मृतिमा स्थापित विमल गुरुङ कृति पुरस्कार पहिलो पटक युद्ध साहित्यका प्रवर्तक लाहुरे कृतिकार नरेश काङमाङ राईको कविता संग्रह तेप्लायुले पाउनु संयोग भएको बताए । उनले भने, ‘नयाँ पुस्ताका लाहुरेहरु चेतना, विचार र सिद्धान्तसहित कृति निकाल्न सक्षम छन् भन्ने गतिलो उदाहरण हो तेप्लायु र कवि नरेश ।’

कृतिकार काङमाङले आफूले पाएको पुरस्कार राशि सबै पहिचान पुरस्कारको कोषमा जम्मा गर्ने घोषणा गरे । उनले भने, ‘मैले पाएको विमल कृति पुरस्कारको राशि सबै म पहिचान पुरस्कारको कोषमा जम्मा गर्ने घोषणा यहीँबाट गरेँ ।’ पुरस्कृत कवि नरेश पहिचान पुरस्कारका संस्थापक हुन् ।

समारोहको दोश्रो चरणमा आयोजित राष्ट्रिय कविता महोत्सवमा हाल काठमाडौं बस्दै आएकी तेह्रथुम छथ्थरकी कवि सीता तुम्खेवा प्रथम हुँदै नगद २१ हजार र प्रमाणपत्र हात पारिन् । उनले ‘रातो रुमाल’ शीर्षकको कविता सुनाएकी थिइन् । मोरङको मिक्लाजुङका गगन योक्पाङ्देनले ‘पवन हलवाईको दिन चर्या’ शीर्षको कविता सुनाउँदै द्वितीय भए । उनले नगद १८ हजार रुपैयाँ हात पारे ।

काठमाडौंकी कवि राधिका कल्पितले ‘पोष्टमोडर्न सिनेमा’ सुनाउँदै तृतीय भइन् । उनले नगद १५ हजार र रोल्पाका कवि युग सर्वनामले ‘आकाश र भोका चिरिबिरी’ सुनाउँदै सान्तवना पाए । युग सर्वनामले नगद १० हजार पाए । कविताको निर्णायकहरुमा देवान किराती, चन्द्र गुरुङलगायत थिए ।

प्रकाशित : कार्तिक २०, २०७९ १२:३१
प्रतिक्रिया
पठाउनुहोस्

रुपन्देही- २ मा सत्ता गठबन्धनको प्रतिबद्धतापत्र सार्वजनिक

अमृता अनमोल

बुटवल — सबै नागरिकलाई नि:शुल्क आधारभूत स्वास्थ्य सेवा सुनिश्चित गर्ने प्रतिबद्धतासहित रुपन्देही- २ मा सत्ता गठबन्धन दलहरूले संयुक्त चुनावी प्रतिबद्धतापत्र सार्वजनिक गरेको छ ।

आइतबार एक कार्यक्रमका बीच शिक्षा, जनस्वास्थ्य, युवा तथा खेलकुद, लैंगिक समानता र समावेशिता, भौतिक पूर्वधार, कृषि तथा वातावरण विकासका खाकासहित रुपन्देही २ (२) लाई लक्षीतगरी प्रतिबद्धतापत्र सार्वजनिक गरेको हो ।

प्रतिबद्धतापत्रमा शिक्षातर्फ बीटीआई र अटोभिलेजलाई इन्जिनियरिङ कलेजमा रुपान्तरण गर्ने, लुम्बिनी वाणिज्य क्याम्पसलाई मानित विश्वविद्यालय र बुटवल बहुमुखीलाई आधुनिकीकरण गरी अनुसन्धान केन्द्रको रुपमा स्थापना गर्ने उल्लेख छ । जनस्वास्थ्यतर्फ ५ वर्षमुनिका बालबालिका र ७० वर्षमाथिका जेष्ठ नागरिकलाई नि:शुल्क स्वास्थ्य उपचारको व्यवस्था गर्ने र सबैलाई नि:शुल्क आधारभूत स्वास्थ्य सेवा सुनिश्चित गर्ने भनिएको छ । लुम्बिनी प्रादेशिक अस्पताललाई हेलिप्याडसहित आधुनिक मेडिकल कलेज बनाउने, तामनगरमा ट्रमा सेन्टर स्थापना गर्ने उल्लेख छ ।

युवा खेलकुदतर्फ युवाको क्षमता वृद्धि कार्यक्रम सञ्चालन गर्ने, राष्ट्रवादी युवा जनशक्ति उत्पादन गर्ने, आधुनिक मापदण्ड अनुसार खेल पूर्वधार निर्माण गर्ने उल्लेख छ । लैंगिक समानता र समावेशीतर्फ जातीय लैंगिक र सामाजिक विभेद हटाई समतामुलक समाजको निर्माण गर्ने, लैंगिक हिंसा पीडितको लागि सामाजिक सुरक्षा केन्द्र स्थापन गर्ने, एक वडा एक जेष्ठ नागरिक केन्द्र निर्माण र गृहणी रोजगार कार्यक्रम सञ्चालन गरिने बताइएको छ । अपांगलाई दक्ष सीप विकास कार्यक्रम, विपन्नको लागि आवास र महिला उद्यमशीलता र रोजगार कार्यक्रम सञ्चालन गर्ने त्यसमा उल्लेख छ ।

भौतिक पूर्वधारतर्फ सुखी जीवनको लागि पूर्वधारमा लगानी कार्यक्रम अगाडि बढाउने प्रतिबद्धता छ । सबै सडक हिलो–धुलोमुक्त र आधुनिक सडक विस्तार गर्ने, अव्यवस्थित बसोबास गर्नेलाई स्वामित्व प्रदान गर्ने र सुकुम्बासीलाई भूमि अधिकार दिइने बताइएको छ । कृषि तथा वातावरणमा रासायनिक र जैविक मल उत्पादन केन्द्र स्थापना गर्ने, खेतीयोग्य जमिनलाई आधुनिक तथा व्यवसायिक कृषि क्षेत्रको रुपमा विकास गरी किसानलाई बाली कर्जा र बिमा प्रदान गर्ने भनिएको छ । रुपन्देहीको क्षेत्र नं. २मा गठबन्धनले जनमुक्तिलाई समर्थन गरेको छ । प्रदेशसभामा १ तर्फ कांग्रेसका दीर्घबहादुर केसी र २ मा माओवादी केन्द्रका वामदेव क्षेत्री उम्मेदवार छन् ।

प्रकाशित : कार्तिक २०, २०७९ १२:२१
पूरा पढ्नुहोस्
प्रतिक्रिया
पठाउनुहोस्
×