थुम्केलीको ‘लोककलाकार जीवनी’ पुस्तक सार्वजनिक- साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

थुम्केलीको ‘लोककलाकार जीवनी’ पुस्तक सार्वजनिक

कान्तिपुर संवाददाता

काठमाडौँ — कलाकार तथा कलालेखक देवेन्द्र थुम्केलीद्वारा लिखित ‘लोककलाकार जीवनी’ पुस्तक सार्वजनिक भएको छ । मंगलबार नक्सालस्थित नेपाल ललितकला प्रज्ञा प्रतिष्ठानमा प्रतिष्ठानका लोककला विभाग प्रमुख मिथिलादेवी यादव, राजनीतिज्ञ एवं भाषाविद् गोपाल ठाकुर, नेपाल ललितकला पत्रकार समाज (सोफाज) का अध्यक्ष केशव राज खनाल लगायतको उपस्थितिमा प्रतिष्ठानका कुलपति केके कर्माचार्यले पुस्तकको विमोचन गरेका हुन् ।


प्रतिष्ठानको लोककला विभागले प्रकाशन गरेको उक्त कृतिमा नेपालमा प्रचलित विभिन्न लोककलामा काम गर्ने एक दर्जनभन्दा बढी कलाकारको जीवनी समेटिएको छ । पुस्तकका लेखक थुम्केलीले पुस्तकमा नेवार, अवधी, मिथिला, थारू र राजवंशी लोककलामा काम गर्ने कलाकारबारे लेखिएको बताए । उनले नेपाली लोककला क्षेत्रमा विशिष्ट कलाकार धेरै भए पनि एउटा पुस्तकमा सबैलाई स्थान दिन नसकिएको बताउँदै आगामी संस्करणमा लोककलाकारका बारेमा कलम चलाउने प्रतिबद्धता व्यक्त गरे ।

कुलपति कर्माचार्यले पुस्तकले नेपालका लोककलाकारलाई चिनाउन महत्त्वपूर्ण भूमिका खेल्ने धारणा राख्दै लोककला र कलाकारको जीवनयात्रालाई चर्चा गरिएको पुस्तकले नेपाली कलाको बहुआयामिकतालाई प्रकाश पार्ने बताए । उनले भने, ‘आगामी दिनमा प्रतिष्ठान एवं अन्य लेखकले पनि लोककला र कलाकारका बारेमा अझै व्यापक ढंगले लेख्नुपर्ने आवश्यकता बढेर गएको छ ।’

राजनीतिज्ञ एवं भाषाविद् ठाकुरले समाजलाई सभ्य र पहिचान दिलाउन कला र संस्कृतिले भूमिका खेल्ने भएकाले राज्यले यसको महत्त्वलाई बुझेर जनस्तरमा विकास भएका कलाको संरक्षण, प्रवर्द्धन तथा राष्ट्रियकरण गर्न विशेष ध्यान दिनुपर्नेमा बताए । उनले कलाकारले ईश्वर बनाउने तर त्यही कलाकारलाई उपेक्षा गर्ने मनोवृत्ति राम्रो नभएको जिकीर समेत गरे । लोककला विभाग प्रमुख यादवले लोककलाको वैभवको प्रबर्द्धनका लागि हरेक समुदायमा अभ्यास भइरहेको लोककलाबारे पुस्तक लेख्न सकिने बताइन् ।

पुस्तकमा शारदा चित्रकार, जीतबहादुर रायमाझी ‘मैथिल’, जुलुमलाल चित्रकार, सूर्यबहादुर चित्रकार, श्यामानन्द ठकुरी, अजीतकुमार साह, मिथिलादेवी यादव, एससी समुन, सीतादेवी कर्ण, लक्ष्मण मण्डल, पवनकुमार राजवंशी, पुनमकुमारी दास र मित्थु थारूको जीवनीसहित कलाकृतिको चर्चा गरिएको छ ।

प्रकाशित : श्रावण २५, २०७९ १४:११
प्रतिक्रिया
पठाउनुहोस्

विद्युत् सट भएर आगलागी, साढे चार करोड क्षति

कान्तिपुर संवाददाता

काठमाडौँ — काठमाडौं महानगरपालिका–१६, बालाजुमा बुधबार दिउँसो भएको आगलागीमा साढे चार करोड रुपैयाँ क्षति भएको छ । काठमाडौंका प्रमुख जिल्ला अधिकारी गोविन्द रिजालले आगलागीमा परी वान वर्ल्ड जुत्ता कारखाना जलेको र करिब साढे चार करोड रुपैयाँ क्षति भएको अनुमान गरिएको बताए ।

'आगो स्थानीय र दमकलको सहायतामा प्रहरीले नियन्त्रणमा लिइएको छ । कारखानामा विद्युत् सट भएर आगलागी भएको भन्ने सूचना छ,' प्रजिअ रिजालले इकान्तिपुरसँग भने, 'क्षतिको पूर्ण विवरण आइसकेको छैन । तर करिब साढे चार करोड रुपैयाँको क्षति भएको अनुमान गरिएको छ ।'

बालाजु औद्योगिक क्षेत्रसँगै रहेको कारखानामा बुधबार दिउँसो अचानक आगो लागेको थियो ।

कामदारहरुका अनुसार जुत्ताको ट्रेडमार्क लगाउने मेसिन चलाउँदा विद्युत् सर्ट भएपछि आगो लागेको थियो । कारखानामा रहेका कच्चा पदार्थ र केमिकलहरु जलेर नष्ट भएका छन् ।

वरिपरि घरहरु भएपनि आगोले कुनै क्षति नगरेको प्रहरीले जनाएको छ । औद्योगिक क्षेत्रमा आगलागी भएको भन्ने समाचार पाएपछि आगलागीबारे गृहमन्त्री बालकृष्ण खाँणले नै चासो लिएर सुरक्षा निकाय र प्रशासनसँग चासो राखेका थिए ।

प्रकाशित : श्रावण २५, २०७९ १३:५९
पूरा पढ्नुहोस्
प्रतिक्रिया
पठाउनुहोस्
x
×