रञ्जना निरौलाको ‘अनुभूतिको अवतरण’ निबन्धसंग्रह बजारमा - साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

रञ्जना निरौलाको ‘अनुभूतिको अवतरण’ निबन्धसंग्रह बजारमा 

कान्तिपुर संवाददाता

काठमाडौँ — कवि तथा निवन्धकार रञ्जना निरौलाको निबन्धसंग्रह ‘अनूभुतिको अवतरण’ लोकार्पण भएको छ । वासुदेव त्रिपाठी, ज्ञानु पाण्डे, सावित्री मल्ल कक्षपती, रामप्रसाद ज्ञवाली, स्रष्टाकी आमा यमुना निरौला, पुष्पराज पौडेल, ऋषभदेव घिमिरे तथा स्रष्टाद्वारा निबन्धसंग्रहको सामूहिक लोकार्पण गरिएको थियो ।

लोकार्पण कार्यक्रममा निरौलाको निबन्धसंग्रहबारे बोल्दै त्रिपाठीले देवकोटाले निबन्धलाई एउटा उचाइसम्म लगेको बताए । ‘‘अनुभूतिको अवतरण’ निबन्ध जगतमा शुभसंकेत हो । प्रत्येक अनुच्छेदका अन्त्य शुक्तिमय भएर टुंगिएका छन् । चालीस वर्ष पाठ्यक्रम निर्माणका क्रममा बसेँ थुप्रै निबन्धसंग्रह हेर्दा दुइटा शुक्ति भेटिन पनि गाह्रो हुन्थ्यो यो निबन्धसंग्रह शुक्तिमय छ । हरेक अनुच्छेदमा शुक्ति भेटिन्छ,’ उनले भने, ‘कविताबाट प्रारम्भ भएको निबन्धभित्र विचार, छ स्वैरकल्पना नभएको कथा छ, यथार्थ छ, दर्शन छ ।’

यसैगरी समीक्षक ज्ञानु पाण्डेले दर्शन विचार र यथार्थको कलात्मक संगम निबन्धमा रहेको बताइन् । अर्का वक्ता रामप्रसाद ज्ञवालीले सौन्दर्यप्रधान, दर्शन र आध्यात्मको त्रिवेणीमा परिपक्व अनुभूतिका अभिव्यक्ति निबन्धमा रहेको बताए । सावित्री मल्ल कक्षपतीले कवितामा भावना नअटेर रञ्जना निबन्धमा विस्तारित भएकी बताइन् । शिखा बुक्सले प्रकाशन गरेको पुस्तकको मूल्य ३५० रुपैयाँ रहेको छ ।

प्रकाशित : श्रावण १६, २०७९ १४:४३
प्रतिक्रिया
पठाउनुहोस्

म्यान्मारमा संकटकालको अवधि ६ महिना थप

कान्तिपुर संवाददाता

काठमाडौँ — म्यान्मारमा ‘सैन्य कु’ पछि लगाइएको संकटकालको अवधि लम्ब्याइएको छ । म्यान्मारका सेना प्रमुख मिन आङ ह्लाइङले गत वर्ष लगाइएको संकटकालको अवधि थप ६ महिना लम्ब्याएको अन्तर्राष्ट्रिय समाचार संस्था अलजजिराले उल्लेख गरेको छ ।

म्यानमारका सेना प्रमुख मिन आङ ह्लाइङ । फाइल तस्बिर : रोयटर्स

सोमबार त्यहाँको सेनाले देशलाई स्थिर राख्नका लागि अझै केही समय संकटकालको अवधि थप गर्ने बताएको हो । वास्तविक र अनुशासित लोकतान्त्रिक प्रणालीको सुदृढीकरणका लागि संकटकाल लम्ब्याउनुपरेको बताउँदै सेना प्रमुख ह्लाइङले ६ महिना अवधि थप गर्ने उल्लेख गरेका हुन् । यसअघि सन् २०२१ फेब्रुअरीमा बर्मेली सेना प्रमुख ह्लाइङले सैन्य कु गरिसकेपछि म्यान्मारको स्टेट एडमिनिस्ट्रेसन काउन्सिल (एसएसी)ले संकटकाल घोषणा गरेको थियो ।

निर्वाचनमा धाँधली गरेको भन्दै बर्मेली सेनाले सत्ता आफ्नो हातमा लिई जननिर्वाचित सरकार प्रमुख आङ सान सु कीलाई बन्धक बनाएको छ । बर्मेली सेनाको राष्ट्रिय रक्षा तथा सुरक्षा परिषद्‌ले संकटकालको अवधि लम्ब्याउने विषयमा सहमति जनाएपछि सेना प्रमुख ह्लाइङले औपचारिक रुपमा घोषणा गर्ने स्थानीय सञ्चारमाध्यमलाई उद्धृत गर्दै अलजजिराले लेखेको छ ।

‘म्यान्मारमा हामीले वास्तविक र अनुशासित बहुदलीय लोकतान्त्रिक प्रणालीलाई सुदृढ बनाउनु हाम्रो दायित्व हो र यहाँको जनताको चाहना पनि यही नै हो‚’ सेना प्रमुख ह्लाइङको भनाइ उद्धृत गर्दै म्यान्मारको स्थानीय सञ्चार माध्यम ग्लोबल न्यु लाइटले बताएको छ ।

बर्मेली सेनाले यसअघिको निर्वाचनमा धाँधली भएको भन्दै सेनाले सन् २०२३ अगस्टमा स्वतन्त्र र धाँधलीरहित निर्वाचन गराउने बताउँदै आएको छ । यसअघि गत अगस्टमा संकटकालको अवधि लम्ब्याइएको थियो । सत्ता आफ्नो हातमा लिइसकेपछि सेना प्रमुख ह्लाइङले आफैंलाई प्रधानमन्त्रीमा नियुक्त गरेका थिए ।

बर्मेली सेनाले सन् २०२० नोभेम्बरमा सम्पन्न निर्वाचनमा प्रजातन्त्रवादी नेतृ आङ सान सुकीको पार्टी लिग फर डेमोक्रेसी (एनएलडी)ले धाँधली गरेर निर्वाचन जितेको भन्दै सैन्य कु गरेको थियो । तर‚ एसियन नेटवर्क फर फ्री इलेक्सन्स र बैंककस्थित इन्डेपेन्डेन्ट इलेक्सन मोनिटरले भने निर्वाचनमा धाँधली भएको विषयमा कुनै प्रमाण नभेटिएको उल्लेख गरेका छन् ।

सैन्य कु लागू भइसकेपछि त्यसको विरोधमा म्यान्मारमा हजारौंको संख्यामा नागरिकहरू सडकमा उत्रिएका थिए । उक्त प्रदर्शनको क्रममा सेनाले २ हजार १ सयभन्दा बढी बर्मेलीले ज्यान गुमाएको एसिस्टेन्स एसोसिएसन अफ पोलिटिकल प्रिजनर्स (एएपीपी)लाई उद्धृत गर्दै बीबीसीले लेखेको छ ।

गत सातामात्रै त्यहाँको सेनाले ४ जना प्रजातन्त्रवादी नेताहरूलाई मृत्युदण्ड दिएको थियो ।

प्रकाशित : श्रावण १६, २०७९ १३:५४
पूरा पढ्नुहोस्
प्रतिक्रिया
पठाउनुहोस्
x
×