कवि धामीको ‘एटलान्टिक’ सार्वजनिक- साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

कवि धामीको ‘एटलान्टिक’ सार्वजनिक

कान्तिपुर संवाददाता

काठमाडौँ — दार्चुलामा जन्मे-हुर्केका कवि किसनसिंह धामीको अंग्रेजी कविता संग्रह ‘एटलान्टिक’ प्रकाशित कृतिको हालै काठमाडौंमा विमोचन भएको छ ।

एक दशकयता अमेरिका बस्दै आएका कवि धामीको यसअघि प्रकाशित ‘एटलान्टिकका भागालाहरू’को अंग्रेजी अनुवाद ‘एटलान्टिक’ बजारमा आएको हो । भौतिक विकासको चरमोत्कर्षमा पुगेको अमेरिकाको बासिन्दा भएर दार्चुलाको सामाजिक-सांस्कृतिक र आर्थिक चित्रचरित्र उधिन्दै धामीले लेखेको लामा कविताको संकलनलाई प्राध्यापक राजन थपलियाले अंग्रेजीमा अनुवाद गरेका हुन् ।

‘नेपाली कवि र कविताको अंग्रेजी अनुवाद प्रकाशनमा आउनु सुखद् कुरा हो,’ कृतिको विमोचन गर्दै साहित्यकार ध्रुबचन्द्र गौतमले भने‚ ‘धामीका कवितामा दुई भूगोलबीचको अन्तर र जीवनजगतका सूक्ष्म लाग्ने आप्रवासी चेतनाका विषय समेटिएका छन् ।’

विमोचनमा सहभागी दार्चुला साहित्य महोत्सवका सहसंयोजक एवं देउडा गीतकार राजेन्द्र भट्टले ‘महाकाली सेरोफेरोमा बाल्यकाल बिताएका कवि धामीले आज एटलान्टा भागालाको अनुभूतिलाई उतारेर पूर्वीय र पश्चिमा चिन्तन-चेतनालाई एउटै कृतिमा समेटेको’ धारणा राखेका थिए । अंग्रेजी साहित्यका अध्येता अनील प्रधानले ‘एटलान्टिक’को सहज र सुललित अंग्रेजी भाषाको प्रयोग भएको टिप्पणी गरेका थिए ।

हाल अमेरिकाको इन्डियानास्थित ट्रिने युनिभर्सिटीमा प्राध्यापनरत थपलियाले अनुवाद गरेको कविताको अंग्रेजीका प्राध्यापक तथा सम्पादक निस्बत शा र जेम्स क्रिस्टोफरले सम्पादन गरेका छन् । नेपाली सांस्कृतिक र साहित्यिक सम्पदालाई समेत तुलनात्मक अर्थमा बाहिरी जगतमा चिनारी गराउने अर्थमा आफूले ‘एटलान्टिकका भागालाहरू’ लेखेको कवि धामीले बताए ।

यसअघि धामीका ‘अन्धकारको अनुसन्धान’, ‘शान्ति खोज्दै’, ‘गजबार नभएको सहर’ जस्ता कृति र ‘कलेज गर्ललाई इमेल’ (उपन्यास), ‘फ्रन्ट सिट’ (संस्मरण) प्रकाशित छन् ।

*सच्याइएको : असावधानीवश 'एमेजनबाट प्रकाशित' भन्ने उल्लेख हुन गएकोमा सच्याइएको छ ।


प्रकाशित : असार १३, २०७९ १३:११
प्रतिक्रिया
पठाउनुहोस्

काठमाडौंमा १२ जनामा हैजा देखियो

रासस

काठमाडौँ — काठमाडौं उपत्यकामा १२ जना हैजाका बिरामी भेटिएका छन् । प्रतिनिधिसभाको शिक्षा तथा स्वास्थ्य समितिको आजको बैठकमा स्वास्थ्य सेवा विभागका महानिर्देशक डा दीपेन्द्ररमण सिंहले हालसम्म १२ जनामा हैजा पुष्टि भएको जानकारी दिए । 

तीमध्ये आठ जना उपचारपछि घर फर्किसकेका छन् भने चार जनाको उपचार भइरहेको छ ।

यस वर्ष उपत्यकामा पहिलो पटक यही असार ५ गते दुई जनामा हैजा पुष्टि भएको थियो ।

यही असार २ गते शुक्रराज ट्रपिकल तथा सरुवा रोग अस्पताल टेकुमा भर्ना भएका १८ र २३ वर्षीय बिरामीमा हैजा पुष्टि भएको थियो । उनीहरु काठमाडौं महानगरपालिका–२८ बागबजारमा बस्दै आएका थिए ।

प्रकाशित : असार १३, २०७९ १३:००
पूरा पढ्नुहोस्
प्रतिक्रिया
पठाउनुहोस्
×