मुक्तान थेबाको ‘मासिन्या’ कृति सार्वजनिक- साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

मुक्तान थेबाको ‘मासिन्या’ कृति सार्वजनिक

कान्तिपुर संवाददाता

काठमाडौँ — कवि मुक्तान थेबाको कवितासंग्रह ‘मासिन्या’ सार्वजनिक भएको छ । काठमाडौं नयाँबजार खुशिबुस्थित थेबाला बुक्स विथ कफि क्याफेमा शनिबार आयोजित कार्यक्रममा कवि थेबाका आस्याङआङी (मामामाइजु) रत्नमान र असलीमाया तामाङले कवितासंग्रह लोकार्पण गरेका हुन् ।

त्यसक्रममा मानवशास्त्री मुक्तसिंह तामाङ, स्रष्टाहरु भूपाल राई, प्रणिका कोयु, उज्ज्वल प्रसाईं, गुरुङ सुशान्त, फूलकुमार बोम्जनलगायत उपस्थित थिए ।

संग्रहमा आदिवासी जनजाति समुदाय तामाङलाई मासिन्याको रुपमा लिँदै तत्कालीन राज्य व्यवस्थाले गर्दै आएको थिचोमिचो, विभेद र उत्पीडन विरुद्धको आवाज उठान भएका छन् । ‘अँध्यारो–उज्यालो’, ‘गाई, गोरु, बहर, बाछा, बाछी’ र ‘आदिवासी पृथ्वी र चोरऔंले शासक’ गरी तीन खण्डमा विभाजित संग्रहमा ५३ वटा कविताहरु छन् । नेपाली कवितामा उन्मुक्त पुस्ता अभियानका अभियन्ता थेबाले कवितासंग्रहलाई आन्दोलनकै एक हिस्साको रुपमा रहेको बताए । ‘जंगबहादुरको मुलुकी ऐनले मासिन्याको रुपमा राखेर हामीमाथि लामो समय दमन र शोषण भयो,’ उनले भने,‘अहिले पनि त्यो उत्पीडनबाट बाहिर आउन सकेका छैनौं । विभिन्नरुपमा हामी शोषित र उत्पीडनमा परिरहेका छौं । त्यसैले यो संग्रह त्यसैको प्रतिरोध हो ।’

संग्रहकै सेरोफेरोमा रहेर मानवशास्त्री तामाङ, कोयु, प्रसाईं र सुशान्तले मासिन्या, यसको समाजशास्त्र र मानवशास्त्र, आदिवासी समुदायको सौन्दर्यशास्त्र, हिजो र आजसम्म आइपुग्दाको मासिन्या बहस, यसले छोएको राजनीतिक विषय र प्रभावबारे बहस गरिएको थियो । मानवशास्त्री तामाङले संग्रहले आदिवासी पहिचान, इतिहास र यथार्थतालाई अगाडि ल्याउन सघाउ पुर्‍याउने विश्वास व्यक्त गरे । ‘विगतको इतिहास र यथार्थबाट प्रेरणा लिएर कलाका रुपमा सिर्जना भएको छ,' उनले भने,‘यसले शासन र शासकमा नयाँ चेत ल्याउन सक्छ । यो एकदम राम्रो कुरा हो ।’

कोयु, प्रसाईंले संग्रहले विगतका पक्षलाई केलाएर आक्रोशका सिर्जनाहरु मात्र आउनुभन्दा आदिवासी पहिचानको आन्दोलनले आजसम्म गरेको उपलब्धिका सकारात्मक पक्षहरु समेत समेट्नुपर्ने तर्क गरे ।

कोयुले पहिचानको कुरा प्रतिरोधकै रुपमा आए पनि समाज, सामाजिक परिवेश, परम्परागत सोचको गन्ध कुनैकुनै सिर्जनामा देखिएको दाबी गरिन् । थेबाको यसअघि मातृभाषामा पहिलो कवितासंग्रह ‘काइलिङ’, उन्मुक्त पुस्ता समूहबाट ‘आफर’, र ‘अखण्ड आलाप’ कृतिहरु सार्वजनिक भएका छन् ।


प्रकाशित : असार १२, २०७९ २२:२६
प्रतिक्रिया
पठाउनुहोस्

खाँदबारी बजार अनुगमन

कान्तिपुर संवाददाता

संखुवासभा — खाद्य प्रविधि तथा गुण नियन्त्रण डिभिजन कार्यालय धनकुटाले संखुवासभाको खाँदबारी बजार अनुगमन भएको छ । आइतबार ७ वटा खाद्य पसलहरु, २ बेकरी उद्योग र १ आाप सप्लायर्सको पसल अनुगमन गरेको हो ।

अनुगमनको क्रममा विभिन्न खाद्य पसलबाट म्याद नाघेका, बिग्रेका, ढुसी लागेका, लेबल विवरण नभएका मसलाजन्य पदार्थ, जुस, बिस्कुट, सुजी, पिनट बार, सोनपापडिलगायत करिब ९२ हजार बराबरको खाद्यपदार्थ जफत गरी नष्ट गरिएको खाद्य प्रविधि तथा गुण नियन्त्रण डिभिजन कार्यालय धनकुटाका कार्यालय प्रमुख अनुप हलवाईले बताए ।

उपभोक्ता स्वयंले समेत खाद्य पेय पदार्थ खरिद गर्दा अनिवार्य लेबल हेरी म्याद कायम भएका मात्र खरिद गर्ने, दूषित ढुसि लागेका खाद्यपदार्थ खरिद नगर्ने, खाद्य पदार्थको स्वच्छतामा ध्यान दिएर मात्र उपभोग गर्नुपर्ने उनले बताए ।

प्रकाशित : असार १२, २०७९ २२:०३
पूरा पढ्नुहोस्
प्रतिक्रिया
पठाउनुहोस्
×