हरिशरण परियारको कवितासंग्रह ‘कैँची’ सार्वजनिक- साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

हरिशरण परियारको कवितासंग्रह ‘कैँची’ सार्वजनिक

कान्तिपुर संवाददाता

काठमाडौँ — युवा कवि हरिशरण परियारको कवितासंग्रह ‘कैँची’ सार्वजनिक भएको छ । बेला पब्लिकेसन्सद्वारा प्रकाशित संग्रहलाई आइतबार बत्तीसपुतलीस्थित शिल्पी थिएटरमा कवि परियारसहित लेखक एवं समाजवादी चिन्तक आहुति, उज्वल प्रसाई, विभूति भट्टराईले लोकार्पण गरे । 

कवि परियारले संग्रहमा संग्रहित तीन दर्जनभन्दा बढी कवितामार्फत विद्यमान समकालीन व्यवस्थाले गरेको शोषण, अपमान र उत्पीडनलाई शालीन रूपमा विद्रोहको आवाज बोलेका छन् । नेपाली समाजको जात व्यवस्थाले आफूमाथि पारेको प्रभाव र आफ्नो सम्पूर्ण भोगाईहरु ‘कैँची’का रूपमा आएको कवि परियारले सुनाए । यसलाई आफ्नो मात्र नभएर व्यवस्थाले थिचिएका सबैका लागि आन्दोलनका हिस्साका रूपमा लिन उनले आग्रह गरे ।

संग्रहमाथि टिप्पणी गर्दै आहुतिले कविले आफ्नो भोगाईको आवेगलाई प्रारम्भिक चरणमा प्रस्तुत गरेको धारणा राखे । व्यवस्था परिवर्तनका लागि हिँडेको सत्ता र विचार नै धुमिल भएको ठहर गर्दै उनले अबको सिर्जनाको धार, वर्ग र कित्ता समेत सेद्धान्तिक रुपमा बहस हुन जरुरी रहेको बताए । ‘आमूल परिर्वतनका लागि हिँडेकाहरू नै भजन गाउँदै छन्’, उनले भने,‘परिवर्तनका लागि आएका आजको सिर्जनाहरू कुन धार, कुन वर्ग भनेर खुट्याउन सकेको अवस्था छैन । यो अन्योललाई विचारकेन्द्रित भएर घनिभूत बहस हुनुपर्छ ।’ संग्रहले प्रयुक्त बिम्बलाई नवीन ढंगमा ल्याएको ठहर गर्दै उनले कवि परियारलाई युगअनुसार बिम्बको प्रयोगमा ध्यान दिन आग्रह गरे ।

संग्रहमाथि टिप्पणी गर्दै भट्टराईले सिंगो संग्रहमा रहेका कविता यो व्यवस्थाका लागि उठेको आन्दोलनका रूपमा लिइन् । कविताको सामान्य नियमभन्दा बाहिर रहेर शालीन र सामान्य रुपमा बोलेका कविताका शब्द कविको मात्र नभएर सिंगो उत्पीडित समुदायको भएको उनको भनाई थियो ।

प्रकाशित : जेष्ठ १६, २०७९ १४:३२
प्रतिक्रिया
पठाउनुहोस्

काठमाडौंका मेयर र उपमेयरको शपथ र पदभार ग्रहण

तस्बिर : अंगद ढकाल

काठमाडौँ — काठमाडौं महानगरपालिका नवनिर्वाचित मेयर वालेन्द्र(बालेन) साह, उपमेयर सुनिता डंगोल र वडाध्यक्ष तथा सदस्यहरुले पद तथा गोपनीयताको शपथ लिएसँगै पदभार ग्रहण गरेका छन् ।

मेयर साहले नेपाली र नेपाल भाषामा शपथ ग्रहण गरेका थिए । राष्ट्रियसभा गृहमा आयोजित समारोहमा  साहलाई मुख्य निर्वाचन अधिकृत राजुकुमार खतिवडाले सपथ गराएका थिए । त्यसैगरी मेयर साहले उपमेयर, वडाध्यक्षहरु तथा सदस्यहरुलाई छुट्टाछुट्टै शपथ ग्रहण गराएका थिए । वैशाख ३० गते भएको स्थानीय तह चुनावमा ३२ वर्षीय स्वतन्त्र उम्मेदवार साह काठमाडौंको मेयरमा निर्वाचित भएका थिए । बिहीबार राति निर्वाचन कार्यालयले मत गणना सकेको थियो ।

मेयर साहले पदभार ग्रहण गर्दै नगर कार्यपालिकाको बैठक लाइभ गर्ने पहिलो निर्णयमा हस्ताक्षर गर्दै पदभार ग्रहण गरेका छन् । पदभार ग्रहणपछि उनले आफूले महानगपालिकाको फोहोर व्यवस्थापनको कामलाई पहिलो प्राथमिकतामा राखेको बताएका छन् । निर्वाचनपछि कार्यपालिकाको प्रथम बैठक सोमबार दिउँसो ४ बजेका लागि बोलाइएको छ ।  

'२-४ दिनअघि नै हामीले खादा, माला, अन्तर्वार्ता र सेलिब्रेसनहरू फोहोरको व्यवस्थापन नभएसम्म नगर्ने भनेका छौं । हामीले गरेको पापको भारी सिसडोलबासीले भोग्दै हुनुहुन्छ । उहाँहरू क्यान्सर पीडित हुन भएको छ; छालाको रोग लागेको छ । मानिस मरिरहनुभएको छ । यो शोक मनाउने बेला हो,' साहले भने, 'फोहोरको व्यवस्थापन नहुन्जेल र सिसडोलबासीले स्वच्छ वातारण र हावामा बस्ने र पानी पिउने वातावरण नहुन्जेल अरु काम हुँदैन ।' यसअघि उनले एक समारोहमा पदको शपथ लिएका थिए । 


प्रकाशित : जेष्ठ १६, २०७९ १३:३३
पूरा पढ्नुहोस्
प्रतिक्रिया
पठाउनुहोस्
×