कथाकार पौडेल पुरस्कृत- साहित्य/विविध - कान्तिपुर समाचार

कथाकार पौडेल पुरस्कृत

कान्तिपुर संवाददाता

काठमाडौँ — कथाकार मधुवन पौडेलले लघुकथा समाजले प्रदान गर्ने सावित्री–केशर कथा सम्मान तथा सुरभि साहित्य प्रतिष्ठानले दिने ‘गुरुप्रसाद मैनाली सुरभि साहित्य सम्मान’ प्राप्त गरेका छन् ।

समाजको कथा सम्मानमा नगद २१ हजार रुपैयाँ तथा प्रशस्तीपत्र रहेको छ । साहित्यिक पत्रकार रोचक घिमिरेले कथाकार पौडेललाई उक्त सम्मान प्रदान गरेका थिए । लघुकथा समाजले बाटुली–खिलध्वज लघुकथा सम्मान भने स्रष्टा हरिप्रसाद भण्डारीलाई प्रदान गरिएको छ ।

यसैगरी, अर्को एक समारोहमाझ प्राज्ञ दिनेशराज पन्तले सुरभि साहित्य प्रतिष्ठानको ‘गुरुप्रसाद मैनाली सुरभि साहित्य सम्मान’ पौडेललाई प्रदान गरेका थिए । यो सम्मानमा २५ हजार रुपैयाँ नगदसहित प्रशस्तीपत्र रहेको छ । प्रतिष्ठानले कथाकार नारायण ढकाल, ध्रुव मधिकर्मी र रुकु कार्कीलाई समेत सम्मानित गरेको छ ।

एकैसाथ दुई विशिष्ट सम्मानबाट सम्मानित कथाकार पौडेलका ‘नलिनी भाउजू’, ‘म र मेरो परिवेश’, ‘अन्त्यहीन परिवेश’, ‘अवतरण र अरु कथाहरु’, ‘बाँच्नुको विवशता’ जस्ता कथा संग्रह प्रकाशित छन् । कथाकार पौडेल कुवेतका लागि राजदूत भइसकेका निवृत्त कूटनीतिक कर्मचारी हुन् ।

प्रकाशित : फाल्गुन २३, २०७८ १०:३४
प्रतिक्रिया
पठाउनुहोस्

गोर्खा वार्ताका लागि बेलायती रक्षा मन्त्रालयलाई आह्वान

कान्तिपुर संवाददाता

लन्डन — लन्डनस्थित नेपाली दूतावासले बेलायतको रक्षा मन्त्रालय (एमओडी) लाई पत्र लेख्दै भूतपूर्व गोर्खाहरुको माग सम्बन्धमा त्रिपक्षीय वार्ताका लागि आह्वान गरेको छ ।

बेलायतका लागि नवनियुक्त राजदूत ज्ञानचन्द्र आचार्यले एमओडीलाई नेपाल सरकार र भूतपूर्व गोर्खाप्रतिनिधिका तर्फबाट वार्ताका लागि भएको गृहकार्यबारे औपचारिक जानकारी दिँदै ब्रिटिस पक्षको तयारी सम्बन्धमा जिज्ञासा राखेका हुन् ।

नेपालको मन्त्रिपरिषद्‌ले केही दिनअघिमात्र राजदूत आचार्यलाई गोर्खा प्रतिनिधि सम्मिलित 'जिटुजी' वार्ताका लागि नेतृत्व गर्न जिम्मा दिने निर्णय गरेको थियो ।

'बेलायती पक्षलाई पत्र लेखेर हाम्राबारे भइरहेको तयारी अवगत गराएका छौं,' राजदूत आचार्यले आइतबार नेपाल पत्रकार महासंघ बेलायतको स्वागत कार्यक्रममा भने, 'ब्रिटिस पक्षबाट पनि कहिले प्रक्रिया अगाडि बढ्छ जिज्ञासा राखेका छौं । यो लामो नेगोसिएसनबाट हुने भएकाले समय लाग्न सक्छ । तर, अब गोर्खा समस्याको दीर्घकालीन समाधान खोज्न हामी प्रयत्नरत छौं ।'

दूतावासले गोर्खा संगठनका तर्फबाट वार्ता समितिमा बस्ने अभियन्ताहरुको नाम समेत दिएको जनाइएको छ । राजदूत आचार्यले आफूलाई सरकारबाट कतिसम्म निर्णय गर्ने अधिकार दिइएको छ भन्नेबारे चाहिँ खुलाएनन् ।

नेपाल सरकारका तर्फबाट वार्ताको नेतृत्व गर्ने जिम्मा पाए लगत्तै राजदूत आचार्यले शुक्रबार गोर्खा संगठनका अभियन्ताहरुसँग छलफल गरेका थिए ।

छलफलमा गोर्खा सत्याग्रह संघर्ष समिति, गोर्खा भूतपूर्व सैनिक संघ (गेसो), ब्रिटिस गोर्खा वेलफेयर सोसाइटी (बिजीडब्लुएस), नेप्लिज एक्स सर्भिसमेन एशोसिएसन (नेसा) र गोर्खा जस्टिस ग्रुपआवद्ध दश जना गोर्खा अभियन्ता सहभागी थिए ।

राजदूत आचार्यलाई स्वागत

नेपाल पत्रकार महासंघ बेलायत शाखाले राजदूत ज्ञानचन्द्र आचार्यलाई स्वागत गरेको छ । आइतबार लन्डन दूतावासमा एक कार्यक्रम आयोजना गरी शाखाले हालै पदबहाली गरेका राजदूतसँग अन्तरक्रिया समेत गरेको छ ।

शाखाका अध्यक्ष ध्रुवराज अर्याल, संस्थापक अध्यक्ष नवीन पोखरेल र पूर्व अध्यक्ष चिरन शर्माले खादा र पुष्पगुच्छासहित राजदूत आचार्यलाई संस्थाका तर्फबाट स्वागत गरेका थिए ।

कार्यक्रमलाई सम्बोधन गर्दै राजदूत आचार्यले पत्रकार महासंघ बेलायतसँगको सहकार्यलाई दूतावासले उच्च महत्त्वसहित अघि बढाउने प्रतिबद्धता व्यक्त गरे । भूपू गोर्खाहरुको मुद्दालाई आफ्नो मूल प्राथमिकतामा राखेको भन्दै उनले यो समस्याको स्थायी समाधान खोजिने बताए ।

प्रकाशित : फाल्गुन २३, २०७८ १०:२५
पूरा पढ्नुहोस्
प्रतिक्रिया
पठाउनुहोस्
x
×