बहसमा ताम्बा दर्शन, मातृभाषा र लोकसाहित्य- साहित्य/विविध - कान्तिपुर समाचार

बहसमा ताम्बा दर्शन, मातृभाषा र लोकसाहित्य

कान्तिपुर संवाददाता

भक्तपुर — दर्शन तथा भाषा विज्ञहरुले तामाङ जातिको ताम्बा दर्शन, मातृभाषा र लोकसाहित्य विषयमा परिचर्चा गरेका छन् ।

नेपाल प्रज्ञा–प्रतिष्ठान अन्तर्गत दर्शनशास्त्र, मातृभाषा तथा साहित्य विभागले ममता केन्द्र नेपालसँगको सहकार्यमा भक्तपुरमा शनिबार गरेको ‘ताम्बा दर्शन’, ‘तामाङ भाषा’ एवम् ‘तामाङ लोकसाहित्य’ विषयक विचार गोष्ठीमा विज्ञहरुले ताम्बा दर्शन, तामाङ मातृभाषा र तामाङ लोकसाहित्यसम्बन्धी गहन विमर्श गरे ।

कार्यक्रमका प्रतिष्ठानका सदस्य सचिव एवम् दर्शनशास्त्र विभागका प्रमुख जगत्प्रसाद उपाध्यायले ताम्बा दर्शन, तामाङ मातृभाषा र तामाङ लोकसाहित्यका कारण तामाङ जाति विशिष्ट जातिका रुपमा रहेको बताए ।

गोष्ठीमा क्रमश: ताम्बा दर्शनसम्बन्धी भाषाविद् अमृत योञ्जन, तामाङ मातृभाषासम्बन्धी अजितमान तामाङ र तामाङ लोकसाहित्यसम्बन्धी निष्णु थिङले गोष्ठीपत्र प्रस्तुत गरे ।

प्रतिष्ठानका भाषा (मातृभाषा, कोश र व्याकरण) विभाग प्रमुख योगेन्द्रप्रसाद यादवले दर्शन, मातृभाषा तथा लोकसाहित्य कुनै पनि जाति/समुदायको पहिचान भएको सुनाए । उनले भने, ‘लोक साहित्य तथा भाषा लोप भएमा सभ्यता र ज्ञानको क्षेत्र नै हराएर जान्छन् । त्यसको संरक्षण र सम्वद्र्धनका लागि सम्बन्धित पक्ष सचेत हुनुपर्छ । उनले लोप हुने खतरामा रहेका दर्शन, मातृभाषा तथा लोकसाहित्यलाई डिजिटल आर्काइभमा सुरक्षित गर्नुपर्ने धारणा राखे । प्रतिष्ठानका साहित्य (मातृभाषा) विभाग प्रमुख लक्ष्मी मालीले मातृभाषा, संस्कृति तथा लोकसाहित्यको संरक्षण तथा सम्वद्र्धनका लागि घर घरमा सबैले अनिवार्यरूपमा मातृभाषा बोल्नुपर्नेमा जोड दिइन् ।

गोष्ठीमा ताम्बा सङ्घका अध्यक्ष पासाङ मोक्तानले ताम्बा दर्शनको संरक्षण आजको आवश्यकता भएको उल्लेख गर्दै तामाङ समुदायमा अनियन्त्रितरूपमा बढिरहेका थरहरूको व्यवस्थापन गरिनुपर्ने बताए ।

तामाङ कलाकार टोलीद्वारा डम्फूको तालमा साङ सेग्र्याम (स्वस्ति) गानबाट सुरु गरिएको कार्यक्रममा कुमार स्याङ्बो, योगेश राल्फाली, रचना मोक्तान, सीमा तामाङ, गायक भीम बैरागी लगायतका स्रष्टाले तामाङ भाषाका सिर्जना प्रस्तुत गरेका थिए ।

प्रकाशित : पुस १२, २०७८ १२:००
प्रतिक्रिया
पठाउनुहोस्

घरमा करोडौं रुपैयाँ लुकाएका उत्तर प्रदेशका अत्तर व्यवसायी जैन पक्राउ

कान्तिपुर संवाददाता

काठमाडौँ — भारतको उत्तर प्रदेशका अत्तर व्यवसायी पीयुष जैनलाई कर छलीको आरोपमा पक्राउ गरिएको छ ।  केही दिनअघि कन्नौजस्थित उनको निवासमा केन्द्रीय जाँच एजेन्सीले छापामा मारेको थियो ।

जीएसटी इन्टेलिजेन्स महानिर्देशनालयका अनुसार उनको घरबाट १ अर्ब ८७ करोड भारतीय रुपैयाँ बरामद गरिएको थियो । यसअघि शनिबारसम्म १ अर्ब ७७ करोड रुपैयाँ बरामद भएको जानकारी दिइएको थियो । थप १० करोड आइतबार भेटिएको हो । शुक्रबार, शनिबार र आइतबार मारिएको छापामा उक्त परिमाणमा नगदसहित चन्दनको तेल र अत्तरसमेत बरामद गरिएको छ । थप कारबाहीका लागि जैनलाई अहमदाबाद लगिने जानकारी दिइएको छ ।

जैन र उनका अन्य दुई जना व्यापारिक साझेदारका ११ ठाउँमा छापा मारिएको थियो । विभिन्न कम्पनीमार्फत ३ करोड ९ लाख कर छली भएको खुलेको अनुसन्धानमा खटिएका अधिकारीहरूले जनाएका छन् । जैनले विभिन्न बैंकबाट ऋण लिएको विदेशमा समेत ठूलो लगानी गरेको प्रमाण पनि भेटिएको भारतीय सञ्चारमाध्यमले जनाएका छन् ।

कन्नौजको छपट्टीका स्थायी बासिन्दा जैनको प्रमुख व्यवसाय अत्तर उत्पादन नै हो । उनले त्रिमूर्ति फ्र्यागनेन्स प्राइभेट लिमिटेडमार्फत शिखर पान मसला पनि उत्पादन गर्दै आएका छन् ।

पश्चिम एसियामा २ सहित उनका करिब ४० कम्पनी रहेका छन् । कर छल्नकै लागी उनले नक्कली कम्पनी खडा गरेको र ती कम्पनीका नाममा बीजक जारी गरेको पनि भेटिएको छ ।

जैन समाजवादी पार्टीका अध्यक्ष तथा उत्तर प्रदेशका पूर्वमुख्यमन्त्री अखिलेश यादवनिकट व्यवसायी मानिन्छन् ।

सम्बन्धित समाचार

प्रकाशित : पुस १२, २०७८ १२:००
पूरा पढ्नुहोस्
प्रतिक्रिया
पठाउनुहोस्
x
×