अर्यालको ‘बानेश्वरको सेरोफेरो’ सार्वजनिक
काठमाडौँ — वरिष्ठ अधिवक्ता श्रीहरि अर्यालको संस्मरणात्मक कृति ‘बानेश्वरको सेरोफेरो’ शनिबार काठमाडौंमा सार्वजनिक भएको छ । कांग्रेस नेता प्रकाशमान सिंहले पुस्तक लोकार्पण गरेका हुन् । नेता सिंहले बानेश्वरको पुरानो अवस्था थाहा पाउन अर्यालको पुस्तक पढ्नुपर्ने बताए ।
२०१९ सालमा स्थापित श्री रत्न पुस्तकालयका संस्थापक सदस्यसमेत रहेका अर्यालले बानेश्वर र आसपासका पुराना सम्झनालाई पुस्तकमा समेटेका छन् । बानेश्वरमै जन्मिएर हुर्किएका अर्यालले पुस्तकमा ६५–६६ वर्षयताको बानेश्वरको बस्ती र समाजको चित्रण गरेका छन् ।
२०१५ सालताका बानेश्वर र आसपासमा गाडी नहुँदा भरिया लगाउनुपरेको अनुभव, चामल बोक्न असन, इन्द्रचोकतिर जानुपरेका पुराना सम्झनाको रोचक वर्णन उनको पुस्तकमा पाइन्छ । पुस्तकमा बानेश्वरको सेरोफेरोसँगै त्यसबेलाको राजनीति, प्रशासन र आममनोविज्ञानबारे पनि बुझ्न सकिन्छ ।
प्रकाशित : मंसिर ५, २०७८ ०८:१६
