अझै सर्वाधिक पढिन्छन् देवकोटा–बीपी- साहित्य/विविध - कान्तिपुर समाचार

अझै सर्वाधिक पढिन्छन् देवकोटा–बीपी

श्यामसुन्दर शशि

जनकपुर — नेपाली र मैथिली भाषाका नयाँनयाँ पुस्तक जनकपुरका बजारमा आइरहन्छन् । पठनीय कृति पाठकका रोजाइमा पर्नु नौलो होइन । यहाँका पाठकको पहिलो रोजाइमा भने अहिले पनि लक्ष्मीप्रसाद देवकोटा र विश्वेश्वरप्रसाद कोइरालाकै पुस्तक पर्ने गरेको छ । मैथिली साहित्यका पुस्तक उनीहरूको दोस्रो रोजाइका बनेको छ ।

साझा प्रकाशन जनकपुरका अनुसार देवकोटाको अमरकृति ‘मुनामदन’ अझै पनि सर्वाधिक बिक्री हुने पुस्तक हो । साझाको जनकपुर शाखाले हरेक वर्ष ३ सयदेखि ५ सय थान मुनामदन बिक्री गर्छ । त्यसपछि कोइरालाका उपन्यासहरू र ‘जेल जर्नल’ पाठकको रोजाइमा पर्ने गरेको छ । देवकोटाको ‘शाकुन्तल’ महाकाव्य र मदनमणि दीक्षितको ‘माधवी’ उपन्यासको बिक्री पनि राम्रो रहेको साझाले जनाएको छ । जनकपुर शाखा प्रमुख दिलीप गुप्ताले पछिल्लोपटक कृषिसँग सम्बन्धित ‘किट तथा कीरा नियन्त्रण’, ज्योतिषसम्बन्धी ‘द्रव्यगुण विज्ञान’, सीटीईभीटीको

पाठ्यक्रमसँग सम्बन्धित पुस्तक तथा अनुसन्धानमूलक पुस्तकको माग धेरै रहेको बताए । मैथिली कला, साहित्य, संस्कृति तथा इतिहाससँग सम्बन्धित पुस्तकको माग अधिक भए पनि त्यस्ता पुस्तकको अभाव रहने गरेको गुप्ताको भनाइ छ ।

साझा प्रकाशनले आफ्ना प्रकाशनका अतिरिक्त नेपाल प्रज्ञा प्रतिष्ठानबाट प्रकाशित पुस्तक पनि बिक्री गर्छ । दुवैले मैथिली भाषामा भने कमै पुस्तक प्रकाशन गरेका छन् । प्रतिष्ठान तथा साझाबाट प्रकाशित मैथिली पुस्तक रामभरोस कापडीको ‘विद्यापति आ नेपाल’, प्रफुल्लकुमार सिंह (मौन) को ‘मैथिली साहित्यिक इतिहास’, प्राडा योगेन्द्रप्रसाद यादवको ‘नेपाली–मैथिली–अंग्रेजी शब्दकोश’, प्राडा रामदयाल राकेशका पुस्तकसँगै मैथिली गद्यपद्य संग्रह, कथासंग्रहको माग अधिक रहेको गुप्ताले बताए । ‘हामीले आफैं पुस्तक खरिद गरेर बिक्री गर्ने होइन । केन्द्रीय कार्यालयले पठाएका मात्र बिक्री गर्छौं,’ उनले भने, ‘मैथिलीका पुस्तक खोज्न त धेरै आउँछन् तर अन्य प्रकाशनबाट प्रकाशित पुस्तक हामीसँग हुँदैनन् ।’ जनकपुरधाम–४ को दीपेश स्टेसनरीका सञ्चालक प्रकाश बरालले पनि साहित्यिक पुस्तकमा मुनामदनको बिक्री सर्वाधिक हुने गरेको बताए । पछिल्ला वर्ष साहित्यिक पुस्तक खरिद गर्नेको संख्यामा ह्रास आएको उनको अनुभव छ । ‘मुनामदन पाठकको रोजाइ हो । योसँगै मदन पुरस्कारप्राप्त पुस्तकको खोजी धेरै हुन्छ ,’ उनले भने ।

जनकपुरमा २०२७ सालमा खुलेको साझाको क्षेत्रीय कार्यालय जनकपुर वार्षिक करिब ५० लाखको पुस्तक बिक्री गर्ने मुलुककै राम्रो व्यापार गर्ने शाखामा पर्छ । शाखा प्रमुख दिलीप गुप्ताका अनुसार कार्यालयमा नयाँ र पुराना गरी झन्डै एक करोड बराबरका पुस्तक छन् । पुस्तक बिक्रीसँगै साझालाई पुस्तकालयका रूपमा समेत विस्तार गर्नुपर्ने उनको भनाइ छ ।

प्रकाशित : मंसिर ४, २०७८ ०७:३४
प्रतिक्रिया
पठाउनुहोस्

बोर्डले ब्रोकर छान्ने प्रस्ताव अर्थ मन्त्रालयले मानेन

सेबोनका अध्यक्ष भीष्मराज ढुंगानालाई बर्खास्त गरेपछि नियमावली संशोधनमा पनि उनको नियत हुन सक्ने भन्दै फिर्ता पठाइयो 
यज्ञ बञ्जाडे

काठमाडौँ — पुँजी बजारको नियामक निकाय नेपाल धितोपत्र बोर्ड (सेबोन) आफैंले सेयर ब्रोकर छान्न पाउने प्रस्ताव अर्थ मन्त्रालयले अस्वीकृत गरेको छ । सर्वोत्तम सिमेन्टको सेयर कारोबारमा संलग्न भएको आरोपमा सरकारले सेबोनका पूर्वअध्यक्ष भीष्मराज ढुंगानालाई बर्खास्त गरेपछि नियमावली संशोधनमा पनि उनको नियत रहेको भन्दै फिर्ता पठाइएको अर्थ मन्त्रालय स्रोतले बताएको छ ।

‘ब्रोकर छनोटमा हालकै व्यवस्था ठीक छ, किन नयाँ चाहियो भनेर सान्दर्भिक परिमार्जन गरेर ल्याउन धितोपत्र बोर्डलाई भनेका हौं,’ स्रोतले भन्यो, ‘नियमावली अस्वीकृत नै गरेको नभई थप परिमार्जन गर्न आग्रह गरिएको हो ।’

स्टक एक्सचेन्जले ब्रोकर छनोट गर्ने र अनुमतिका लागि नियामक निकायमा सिफारिस गर्ने अन्तर्राष्ट्रिय अभ्यास हो । अहिलेसम्म नेपालमा पनि त्यही व्यवस्था छ । तर सेबोनका पूर्वअध्यक्ष ढुंगानाको दबाबमा अन्तर्राष्ट्रिय अभ्यासविपरीत उक्त अधिकार नेपाल स्टक एक्सचेन्ज (नेप्से) बाट खोसेर आफ्नो पोल्टामा ल्याउन नियमावली संशोधन गरी स्वीकृतिका लागि अर्थ मन्त्रालय पठाइएको थियो । त्यही नियमावली अर्थ मन्त्रालयले हेर्दै नहेरी बोर्डमा फिर्ता पठाइदिएको हो ।

ढुंगानाको दबाबमा उक्त नियमावली बोर्ड सञ्चालक समितिबाट पारित भएको भनेर चर्को विरोध भएको थियो । नियमावलीमा ब्रोकर छनोटको अधिकार सेबोनमा ल्याउनेदेखि ब्रोकरको पुँजी वृद्धि, कार्यक्षेत्र विस्तार, प्रदेशगत रूपमा ब्रोकर लाइसेन्स प्रदानलगायत विविध विषय समेटिएको थियो । यसका लागि सेबोनले धितोपत्र व्यवसायी (धितोपत्र दलाल तथा धितोपत्र व्यापारी) नियमावली, २०६४ नै खारेज हुने गरी नयाँ नियमावली प्रस्ताव गरेको थियो ।

संशोधन गरेर पठाइएको धितोपत्र व्यवसायी (धितोपत्र दलाल तथा धितोपत्र व्यापारी) नियमावली अर्थ मन्त्रालयबाट फिर्ता आएको धितोपत्र बोर्डले पनि स्विकारेको छ । ‘पत्रमा व्यावहारिक बनाएर पठाउनू भन्ने मन्त्रालयको निर्देशन छ,’ बोर्ड स्रोतले भन्यो, ‘नयाँ अध्यक्ष आएपछि मात्र काम अघि बढ्ला ।’ विद्यमान नियमावलीमा ब्रोकर लाइसेन्सका लागि छनोटको सबै प्रक्रिया नेप्सेले पूरा गरी लाइसेन्सका लागि सेबोनलाई सिफारिस गर्ने व्यवस्था छ । सोही व्यवस्था परिमार्जन गर्दै धितोपत्र बोर्डले उक्त अधिकार आफ्नो पोल्टामा ल्याएको थियो ।

अर्थ मन्त्रालयबाट नियमावली जस्ताको तस्तै स्वीकृत भएको भए नेप्सेले ब्रोकरको आवेदन संकलन मात्र गर्न पाउने थियो । छनोटका सबै काम (लिखित परीक्षा, प्रस्तुतीकरण, अन्तर्वार्ता आदि) सेबोनको अधिकारभित्र आउँथ्यो । स्टक एक्सचेन्जले ब्रोकरको संख्या यकिन गर्ने र लाइसेन्सका लागि नियामक निकायमा पठाउने अन्तर्राष्ट्रिय अभ्यास हो । कारोबारका लागि ती ब्रोकरलाई आफ्नो सिस्टम (कारोबार प्रणाली) मा आबद्ध गराउनुपर्ने भएकाले सम्बन्धित एक्सचेन्ज कम्पनीलाई नै ब्रोकर छान्ने अधिकार दिइएको हो । एक्सचेन्जको सिफारिसमा नियामक निकायले लाइसेन्स मात्र वितरण गर्छन् । यसकारण नेपालमा नेप्सेको अधिकार खोस्न थालेको भन्दै सेबोनको आलोचना हुँदै आएको थियो ।

‘आफ्नो क्षमता कति छ, कति ब्रोकरलाई लाइसेन्स दिँदा सिस्टमले थेग्छ, एक्सचेन्ज कम्पनीले छानेका ब्रोकरले त्यही एक्सचेन्ज कम्पनी मातहतमा मात्र कारोबार गर्न पाउँछन्  । नेपालमा एउटा मात्र एक्सचेन्ज कम्पनी छ । भविष्यमा अरू एक्सचेन्ज कम्पनी स्थापना भए हालका ब्रोकरले ती कम्पनीमा कारोबार गर्न पाउँदैनन्  । उनीहरूले ती एक्सचेन्जबाट पनि छुट्टै अनुमति लिनुपर्छ । यसकारण पनि आफूले कारोबार गराउने कम्पनी छान्ने जिम्मा विगतमा स्टक एक्सचेन्जलाई नै दिइएको जानकारहरू बताउँछन् ।

धितोपत्र नियमावली, २०६४ मा नेप्से (धितोपत्र बजार) ले बजारको आवश्यकताअनुसार ब्रोकरको संख्या यकिन गर्ने व्यवस्था छ । ‘धितोपत्र बजारले उपलब्ध भौतिक सुविधा, धितोपत्र बजारको आवश्यकता तथा धितोपत्रको प्रतिस्पर्धी बजार निर्माण पक्षलाई दृष्टिगत गरी थप्नुपर्ने धितोपत्र दलाल र धितोपत्र व्यापारीको संख्या यकिन गर्ने,’ नियमावलीमा भनिएको छ । नेप्सेको यही अधिकार बोर्डले आफ्नो क्षेत्राधिकारमा लगेको थियो ।

प्रकाशित : मंसिर ४, २०७८ ०७:२४
पूरा पढ्नुहोस्
प्रतिक्रिया
पठाउनुहोस्
×