अलका आत्रेय चूडालको ‘निनाद वल्लरी’ सार्वजनिक- साहित्य/विविध - कान्तिपुर समाचार

अलका आत्रेय चूडालको ‘निनाद वल्लरी’ सार्वजनिक

कान्तिपुर संवाददाता

काठमाडौँ — साहित्यकार अलका आत्रेय चूडालको खण्डकाव्य ‘निनाद वल्लरी’ सार्वजनिक भएको छ । खण्डकाव्यमा पिता–पुत्रीको वात्सल्य र वियोगलाई छन्दमार्फत् अभिव्यक्त गरिएको छ । छोरीलाई अर्कै गोत्र मानेर पिताको शोकमा सरिक हुन बन्देज लगाउने कर्मकाण्डीय रीतिमाथि पनि खण्डकाव्यले व्यंग्य गरेको  छ । 

‘लाटो साथी’ उपनामले प्रसिद्ध साहित्यकार विष्णुराज आत्रेयकी छोरी अलकाले पिताको प्रथम वार्षिकीको अवसर पारेर निकालेको यो पुस्तक शोककाव्य पनि हो । नेपालयले ‘नेपालय कविता’ अन्तरगत प्रकाशित गरेको यो पुस्तक नौवटा विभिन्न छन्दमा विरचित करुण रसका कविताहरुको संग्रह पनि हो ।

दक्षिण एसियाको बौद्धिक इतिहास र राहुल सांकृत्यायन विषयमा विद्यावारिधि गरेकी चूडाल हाल भियना विश्वविद्यालय अस्ट्रियामा प्राध्यापन गर्छिन् । कथा, कविता, संस्मरण, समालोचना, निबन्ध, अनुवाद आदि विधामा लामो समयदेखि कलम चलाउँदै आएकी चूडालको यो दोस्रो पुस्तकाकार काव्य हो ।

‘बुवाको साहित्यप्रतिको स्नेह जीवनपर्यन्त रहयो,’ पुस्तक सार्वजनिक गर्दै चूडालले भनिन्,‘हाम्रा कतिपय धार्मिक विधानहरूमा विवाहिता छोरीलाई पितृकार्यमा अर्कै गोत्रकी भनेर सरिक हुन वर्जना गरिएको रहेछ । शोकमा व्याकुल भएको बेला मलाई ती विधानहरू अप्रिय लागेका थिए । धेरै सोचे पछि मलाई लागेको थियो मेरा साहित्यानुरागी पितालाई आफ्नो श्रद्धाञ्जली चढाउन कविताभन्दा उपयुक्त अर्थोक के होला ।’

प्रकाशित : भाद्र २१, २०७८ १७:१६
प्रतिक्रिया
पठाउनुहोस्

थपिए १ हजार ४८८ कोरोना संक्रमित, १ हजार ७४३ संक्रमणमुक्त

कान्तिपुर संवाददाता

काठमाडौँ — पछिल्लो २४ घण्टामा १ हजार ४८८ जनामा कोरोना भाइरस संक्रमण देखिएको छ । स्वास्थ्य तथा जनसंख्या मन्त्रालयका अनुसार ११ हजार ६०९ पीसीआर परीक्षणमा सोमबार थप १ हजार ४८८ जनामा संक्रमण पुष्टि भएको हो ।  योसँगै नेपालमा कोरोना संक्रमण हुनेको संख्या ७ लाख ७० हजार ७५९ पुगेको स्वास्थ्य तथा जनसंख्या मन्त्रालयले जनाएको छ ।

यस्तै एन्टिजेन विधिद्वारा गरिएको ४ हजार ३७० परीक्षणबाट ४०९ जनामा पोजिटिभ देखिएको छ । २४ घण्टामा पीसीआर र एन्टिजेन विधिबाट गरिएको १५ हजार ९७९ परीक्षणमा १ हजार ८९७ जनामा संक्रमण पुष्टि भएको मन्त्रालयले जनाएको छ ।

पछिल्लो २४ घण्टामा थप १ हजार ७४३ जना संक्रमणमुक्त भएका छन् । हालसम्म नेपालमा कोरोनामुक्त हुनेको संख्या ७ लाख २८ हजार ९२८ छ ।

नेपालमा कोरोना संक्रमणबाट थप २० जनाको मृत्यु भएको छ । योसँगै नेपालमा कोरोनाबाट मृत्यु हुने‍को संख्या १० हजार ८५८ पुगेको छ ।

नेपालमा कोरोनाका सक्रिय संक्रमितको संख्या ३० हजार ९७६ रहेको छ ।

प्रकाशित : भाद्र २१, २०७८ १७:११
पूरा पढ्नुहोस्
प्रतिक्रिया
पठाउनुहोस्
×