‘बेलायतमा नेपाली गीत’ संग्रह सार्वजनिक- साहित्य/विविध - कान्तिपुर समाचार

‘बेलायतमा नेपाली गीत’ संग्रह सार्वजनिक

गणेश राई

काठमाडौँ — तमु संस्कृतिविद् एवं गीतकार एकेन्द्र गुरुङको सम्पादनमा ‘बेलायतमा नेपाली गीत’ संग्रह सार्वजनिक भएको छ । नेपालमा जन्मे, हुर्केका र हाल बेलायतमा रहेका स्रष्टाका गीति रचनालाई यस संग्रहमा समेटिएका छन् । यसै साता बेलायतमा सम्पन्न ‘नेपाली मेला’ उक्त कृति सार्वजनिक गरिएको हो । 

गुरुङ साहित्यिक मञ्‍च नेपालले प्रकाशन गरेको कृतिभित्र ८० जना स्रष्टाका दुई–दुई रचना समेटिएका छन् । रचनाकारमध्ये २१ जना नारी स्रष्टा रहेका छन् । प्रत्येक स्रष्टाको फोटोसहित संक्षिप्त परिचय रहेको छ ।

नेपाल प्रज्ञा प्रतिष्ठानका उपकुलपति जगमान गुरुङले स्रष्टाको परिचयमा उल्लेख कृति र संलग्न संघसंस्थाले विदेशमा रहेर नेपाली भाषा साहित्यको श्रीवृद्धिमा पुर्‍याएको योगदानको मूल्यांकन गर्ने आधार बनेको उल्लेख गरेका छन् । ‘यस गीत संग्रहमा नेपालको बाटोघाटो, भञ्‍ज्याङ, चौतारी र द्यौराली, लेक–बेंसी, महभीर, खर्क र खर्चरी, सिमेभूमे सबै प्राकृतिक स्रोत र संस्कृतिले बास गरेको छ,’ शुभकामना दिँदै उपकुलपति गुरुङले भनेका छन्, ‘सम्पूर्ण नेपालको प्रतिनिधित्व भएको छ । अतः कृतिमा नेपाल र नेपालीप्रति अपनत्वभाव झल्केको छ ।’

त्यसैगरी बेलायतका लागि नेपाली राजदूत लोकदर्शन रेग्मीले यस गीति संग्रहले प्रवासमा रहेका स्रष्टाहरूको रचनाले समाजलाई दिशानिर्देश गर्ने उल्लेख गरेका छन् । सन् १८१६ मा सुगौली सन्धि भएपछि नेपाल र बेलायतबीच कूटनीतिक सम्बन्ध स्थापना भएको हो । बेलायतमा सन् १८३० मा पहिलो पटक नेपालीको पाइला परेको थियो भने १८५० मा तत्कालीन प्रधानमन्त्री जंगबहादुर राणाले औपचारिक भ्रमण गरेका थिए । बेलायत सरकारले भूतपूर्व गोर्खा सैनिक र तिनका परिवारलाई आवासीय सुविधा दिएसँगै सन् २००० बाट त्यहाँ स्थायी बसोबास गर्ने नेपालीको संख्या बढेको सम्पादक गुरुङले उल्लेख गरेका छन् ।

‘मानिसहरू जहाँ जान्छन् आफ्नो संस्कार र संस्कृति पनि सँगै लैजान्छन्,’ लमजुङको पसगाउँमा जन्मे हुर्केका सम्पादक गुरुङले भनेका छन्, ‘बेलायतमा बसोबास गर्ने नेपालीहरूले नेपालीपन पनि सँगै ल्याएका छन् । वीरता, बहादुरी, इमानदारी, सरलता, मिलनसार नै नेपालीको पहिचान हो ।’

साहित्यमा गीत सशक्त विधा भएकोले बेलायत तथा नेपाली डायस्पोराको प्रतिनिधित्व हुने गरी स्रष्टालाई एकमुष्ट चिनारी दिन कृति प्रकाशन गरिएको जनाइएको छ ।

प्रकाशित : भाद्र १७, २०७८ १८:४१
प्रतिक्रिया
पठाउनुहोस्

तुइन घटना सरकारले थामथुम पार्न खोज्यो : एमाले

कान्तिपुर संवाददाता

काठमाडौँ — प्रमुख प्रतिपक्षी दल एमालेले दार्चुलाको तुइन घटनालाई सरकारले थामथुम पार्न खोजेको भन्दै आपत्ति जनाएको छ ।प्रवक्ता प्रदीप ज्ञवालीले बिहीबार विज्ञप्ति जारी गर्दै छानबिन गर्न गठित समितिको म्याद पटक-पटक थपेर निकै ढिलो गरी प्रतिवेदन बुझाइए पनि प्रतिवेदन अस्पष्ट रहेको र सरकार घटनालाई थामथुम गर्ने प्रयासमा लागेको बताएका हुन् । साउन १५ गते महाकाली नदी पार गर्ने क्रममा भारतीय सीमा सुरक्षा बल (एसएसबी) का जवानले तुइन चुँडाइदिएर जयसिंह धामी बेपत्ता भएका थिए ।

'आफ्ना नागरिक बेपत्ता पारिएको यति संवेदनशील घटनाका सम्बन्धमा भारतीय पक्षसँग जानकारी लिने, सोधपुछ गर्ने र आपत्ति जनाउने सामान्य औपचारिकता र कूटनीतिक पहल गर्न नसक्ने सरकारले नेपाली जनताको ध्यान यस घटनाबाट अन्यत्रै मोड्न खोजेको आशंका पैदा भएको छ,' विज्ञप्तिमा भनिएको छ, 'नागरिकको जीवनसँग जोडिएको यस्तो गम्भीर विषयमा सरकारले प्रदर्शन गरेको संवेदनहीनता र लाचारीप्रति खेद व्यक्त गर्दै नेकपा (एमाले) यस अविलम्ब घटनाको सत्यतथ्य सार्वजनिक गर्न, दोषीलाई कारबाही र पीडित परिवारलाई न्याय सुनिश्चित गर्न माग गर्दछ ।'

धामीका सम्बन्धमा गृहमन्त्रालयका सहसचिव जनार्दन गौतमको संयोजत्वमा गठित छानविन समितिले यही १५ भदौमा गृहमन्त्री बालकृष्ण खाँणलाई प्रतिवेदन बुझाएको थियो ।

प्रकाशित : भाद्र १७, २०७८ १८:३२
पूरा पढ्नुहोस्
प्रतिक्रिया
पठाउनुहोस्
×