सिनासको जर्नल ३५ वर्षपछि पुन: प्रकाशन- साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

सिनासको जर्नल ३५ वर्षपछि पुन: प्रकाशन

नेपाली भाषाको ‘नेपाल अध्ययन जर्नल’ पनि सार्वजनिक
कान्तिपुर संवाददाता

काठमाडौँ — त्रिभुवन विश्वविद्यालयअन्तर्गत नेपाल र एसियाली अनुसन्धान केन्द्र (सिनास) ले ३५ वर्षपछि ‘नेपाल जर्नल अफ स्ट्राट्रेजिक स्टडिज’ जर्नल पुन: प्रकाशन सुरु गरेको छ । अंग्रेजी भाषामा रहेको जर्नलमा नेपाल र चीनको कूटनीतिक सम्बन्धलाई लिएर बृहत् विषय समेटिएका छन् ।

सिनासले पहिलो पटक प्रकाशन गरेको ‘नेपाल अध्ययन जर्नल’ को पहिलो अंक सार्वजनिक गर्दै राष्ट्रपतिका राजनीतिक सल्लाहकार लालबाबु यादव, कार्यकारी निर्देशक मृगेन्द्रबहादुर कार्की र प्राध्यापक खगेन्द्रप्रसाद लुइँटेल । तस्बिर : गणेश राई/कान्तिपुर

नेपाल–चीनविज्ञ प्राध्यापकका अनुसन्धानात्मक आलेख, चीनका तीन प्राध्यापकको अनुसन्धान जर्नलमा प्रकाशित छन् । त्यसैगरी गणतान्त्रिक नेपालका राष्ट्रपतिको चीन भ्रमण अवलोकन, चीन नीतिबारे अन्तर्वार्ता र चीनका राष्ट्रपति सी चिङपिङको नेपाल भ्रमण र कूटनीतिक सम्बन्धका बारे सामग्री समेटिएको सिनासका कार्यकारी निर्देशक मृगेन्द्रबहादुर कार्कीले बताए । ‘सिनास अब नयाँ आयाम लिएर अघि बढेको छ,’ उनले भने, ‘सिनासका तत्कालीन कार्यकारी निर्देशक कुमार खड्गविक्रम शाहले निर्माण गरेको दृष्टिकोणलाई ब्युँताउने प्रयास गरेका छौं ।’

त्यसैगरी, सिनासले पहिलो पटक नेपाली भाषामा ‘नेपाल अध्ययन जर्नल’ पनि प्रकाशन आरम्भ गरेको छ । जर्नलमा गोविन्द टण्डनको ‘भगवान् पशुपतिनाथ, पशुपतिनाथ मन्दिर र पशुपति दर्शन’, ऋषिराम रेग्मीको ‘वेदमा रुद्रका स्वरूप’, लक्ष्मणप्रसाद गौतमको ‘बौद्धिक षड्दर्शनका प्रमुख मान्यता’, माधवप्रसाद पाण्डेयको ‘सृष्टिचक्रमा ज्योतिषशास्त्र र नेपालमा त्यसको प्रभाव’ तथा नारायणप्रसाद गड्तौलाको ‘पूर्वीय मिथकको परम्परा’ शीर्षक आलेख समेटिएका छन् । सिनासको ५०औं वार्षिकोत्सवका अवसरमा शुक्रबार आयोजित समारोहमा जर्नल सार्वजनिक गरिएको हो ।

सिनासले नयाँ र पुन: मुद्रणका गरी एक दर्जन अनुसन्धानात्मक पुस्तक प्रकाशनमा ल्याएको छ । प्राध्यापक देवराज दाहालको ‘स्मल स्टेट’, प्राध्यापक त्रिरत्न मानन्धरको ‘नेपाल–भोट विवाद’ लगायत नयाँ कृति रहेका छन् । पुन: प्रकाशनमा धनवज्र बज्राचार्यको ‘लिच्छविकालका अभिलेख’ लगायत छन् । कीर्तिपुरस्थित सिनास हातामा स्थापना गरिएको शिवलिंग र बुद्धको मूर्ति उद्घाटन गरिएका छन् ।

राष्ट्रपति विद्यादेवी भण्डारीका राजनीतिक सल्लाहकार लालबाबु यादवले नेपालको संस्कृति, सभ्यता पश्चिमाभन्दा राम्रो रहेको तर पश्चिमाको नक्कल गर्ने प्रवृत्ति बढ्नु दु:खद् भएको बताए । ‘त्रिविका चार अनुसन्धान केन्द्रले गरेका ऐतिहासिक, वैज्ञानिक अध्ययन, अनुसन्धानलाई सरकारको नीतिगत निकायले कार्यान्वयन गर्ने परिस्थिति बन्न जरुरी छ,’ उनले भने, ‘नेपालको संस्कृति, सभ्यतालाई प्रवर्द्धन गर्न पश्चिमाको नक्कल गर्ने प्रवृत्तिलाई निस्तेज पार्न यी अध्ययन अनुसन्धानबाट प्राप्त तथ्यलाई कार्यान्वयन गर्न जरुरी छ ।’

प्रकाशित : श्रावण १, २०७८ १९:४८
प्रतिक्रिया
पठाउनुहोस्

जल उर्जा उत्पादन बढाउनुपर्छ : उर्जामन्त्री भुसाल

कान्तिपुर संवाददाता

काठमाडौँ — उर्जा, जलस्रोत तथा सिँचाइमन्त्री पम्फा भुसालले आफ्नो देशबाट उत्पादित जल उर्जालाई सम्पूर्ण क्षेत्रमा प्रयोग गरेर पेट्रोलियम पदार्थको आयात र प्रयोगलाई न्यूनिकरण गर्नुपर्ने बताएकी छन्  ।

विद्युत् विकास विभागको २८ औं वार्षिकोत्सव समारोहमा बोल्दै मन्त्री भुसालले पेट्रोलियम पदार्थको पहिलो विकल्पको रुपमा जल उर्जा भएको बताइन् ।

यस्तै, निजी क्षेत्रले बनाउने जलविद्युत् लगायतको संरचनाबाट सरकार र स्थानीय जनताले निरन्तर रुपमा लाभ लिनसक्ने किसिमको बनाउन आवश्यक रहेको पनि उनले बताइन् । उनले भनिन्, 'सिंगो देशको विद्युतीकरण गर्ने कुरा लाइटको रुपमा मात्रै नभएर आफ्नै देशको स्रोतबाट उत्पादन भएको उर्जालाई सम्पूर्ण उर्जाको क्षेत्रमा प्रयोग गर्ने र डलर तिरेर आएको पेट्रोलियम पदार्थलाई न्यूनिकरण गर्न सक्नुपर्छ ।'

निजी क्षेत्रले एउटा निश्चित समयसम्म चलाउने सर्तमा निर्माण गर्ने संरचनाबाट सरकार र स्थानीय जनताले दीर्घकालसम्म लाभ लिन सक्ने संरचना बनाउन जोड दिनुपर्ने मन्त्री भुसालको भनाइ थियो । यो क्षेत्र अरु क्षेत्रको लगानीभन्दा सुरक्षित क्षेत्रको लगानी भएको बताउँदै मन्त्री भुसालले छिटो र स्थायित्वका लागि विशेष ध्यान दिनसमेत अनुरोध गरिन् ।

प्रकाशित : श्रावण १, २०७८ १९:१३
पूरा पढ्नुहोस्
प्रतिक्रिया
पठाउनुहोस्
×