कीर्तिमानी गीतकार उपाध्यायलाई प्रमाणपत्र- साहित्य/विविध - कान्तिपुर समाचार

कीर्तिमानी गीतकार उपाध्यायलाई प्रमाणपत्र

कान्तिपुर संवाददाता

काठमाडौँ — संगीतका माध्यमबाट गिनिज बुक अप वर्ल्ड्स रेकर्डमा नाम लेखाएका गीतकार धर्मराज उपाध्यायले गीतसंगीतसम्बन्धी थप १९ विधामा नयाँ रेकर्ड बनाएका छन् ।

उपाध्यायले अमेरिकन बुक अफ वर्ल्ड रेकर्ड, युरोपियन बुक अफ रेकर्ड, द ब्रिटिस वर्ल्ड रेकर्ड, एसियन वर्ल्ड रेकर्ड, युनिभर्सल रेकर्ड फोरम, आसाम वर्ल्ड रेकर्ड, बागाल वर्ल्ड रेकर्ड, सुप्रिम वर्ल्ड रेकर्ड, ओएमजी वर्ल्ड रेकर्ड, एभरेस्ट वर्ल्ड रेकर्ड, च्याम्पियन वर्ल्ड रेकर्ड, ओएमजी वर्ल्ड रेकर्ड, दुवई वर्ल्ड ट्यालेन्ट बुकमा १९ फरक विधामा कीर्तिमान बनाएका हुन् ।

यसका लागि उनले विभिन्न फरक–फरक शैलीका गीत–संगीत तयार गरेका छन्। उपाध्यायले १५० भन्दा बढी देशको पर्यटनस्थलको नाममा गीत तयार गरेर, सबैभन्दा छोटो १८ अक्षरको गीतसंगीत तयार गरेर, एकै दिनमा चार वटा गीत लेखी रेकर्ड गरेर रिलिज गरेर, १७५ देशका मुद्राहरुको नाममा गीत–संगीत तयार गरेर, कदेखि ज्ञसम्मका प्रत्येक वर्णको गीत लेखी पुस्तक ल्याएका छन् । यस्तै, ५५ वटा फरक–फरक फूलको नाममा गीत लेखी रेकर्ड गराएर, सबैभन्दा धेरै पटक आमा तथा धेरै पटक बुबा शब्द प्रयोग गरी गीत रेकर्ड गराएर, विश्वका १६४ प्रजातिका चराको नाम समेटेर गीत रेकर्ड गराएका छन् ।

उनले आफ्ना गीतहरू चिया पिउने सबैभन्दा बढी कपमा छापेर, सबैभन्दा बढी पोस्टकार्डमा छापेर, सकरात्मक सोचमा फाइदासम्बन्धी गीत तयार गरेर, ६० वर्ष नाघेका ११ जना गायक गायिकाको स्वरमा एकैपटक गीत रेकर्ड गराएका छन् ।

सोमबार राजधानीमा एक समारोहबीच पूर्वप्रधानमन्त्री लोकेन्द्रबहादुर चन्दले उपाध्यायलाई यी सबै वर्ल्ड रेकर्डको प्रमाणपत्र प्रदान गरे । कार्यक्रममा उपाध्यायको विश्व कीर्तिमानी गीति पुस्तक चोट, प्रेयसी तथा गीतिसंग्रह सपनाको महल, धड्कन, धर्ती र जीवन, प्रनिभाको पनि पूर्वप्रधानमन्त्री चन्दले लोकार्पण गरेका थिए ।

प्रकाशित : वैशाख ७, २०७८ ०९:३९
प्रतिक्रिया
पठाउनुहोस्

युद्धकालीन हतियार जम्मा गर्दै सेना

कान्तिपुर संवाददाता

सिन्धुली — युद्ध संग्रहालयका लागि नेपाली सेनाले युद्धकालीन हतियार संकलन थालेको छ । सिन्धुलीको कमलामाई नगरपालिका–३ स्थित सिन्धुलीगढीमा निर्माणाधीन संग्रहालयका लागि ऐतिहासिक सामग्री संकलन थालिएको हो ।

यस क्रममा सेनाले तत्कालीन गोर्खा फौज र ब्रिटिस सेनाबीचको युद्धमा प्रयोग भएका सात थान खुँडाखुकुरी र एक थान धनुवाण संकलन गरिसकेको छ । कमलामाई नगर प्रमुख खड्गबहादुर खत्रीले युद्धकालीन घरेलु हतियार सेनालाई हस्तान्तरण गरे ।

नेपाल एकीकरणका क्रममा विसं. १८२४ मा गोर्खाली सेना र कप्तान किनलोकको नेतृत्वमा आएको अंग्रेज सेनाबीच सिन्धुलीगढीमा भएको युद्धमा गोर्खाली सेनाले प्रयोग गरेका दुई थान भाले खुँडा र एक थान तरबार खत्रीले सेनाको ९ नं. बाहिनीका सहायक रथी धुव्रल प्रकाश शाहलाई हस्तान्तरण गरेका हुन् । ‘पुर्खाले जोगाएर राखेको ऐतिहासिक घरेलु हतियार मेरो हजुरबुबा, बुबा हुँदै संरक्षणको जिम्मा मलाई आएको थियो, यो सबैको सम्पत्ति ठानेर हस्तान्तरण गरेको छु,’ उनले भने ।

सिन्धुलीगढी युद्धका योद्धा वंशुधर थापाका सन्तान साबिक भद्रकाली गाविसका अध्यक्ष हरिबहादुर थापाको घरमा रहेको खुँडा खत्रीले घरमै पुगेर ल्याएका थिए । उक्त हरियारसमेत सेनालाई हस्तान्तरण गरेका छन् । अन्य ऐतिहासिक घरेलु हतियारको पनि खोजी भइरहेको उनले सुनाए ।

सहायक रथी शाहले संग्रहालय निर्माण अन्तिम चरणमा पुगेको बताए । ‘मुख्य चुनौतीको रूपमा रहेको तत्कालीन युद्धको समयमा प्रयोग भएका हतियार र युद्धसँग सम्बन्धित सामग्रीहरू संकलन कार्य भइरहेको छ,’ उनले भने । नागरिक सहयोग अभियानअन्तर्गत सिन्धुलीगढीमा गत वर्ष

माघदेखि नेपालमै पहिलो युद्ध संग्रहालय निर्माण सुरु गरिएको हो । संग्रहालय निर्माणको जिम्मा सिन्धुलीमाढीस्थित सेनाको बर्द्धबहादुर गणले पाएको छ । संग्रहालय बनाउन चार करोड १७ लाख रुपैयाँ लागत लाग्ने अनुमान छ ।

प्रकाशित : वैशाख ७, २०७८ ०९:३०
पूरा पढ्नुहोस्
प्रतिक्रिया
पठाउनुहोस्
×