‘स्रष्टा परिचय पत्र’ दिने प्रज्ञा प्रतिष्ठानको घोषणा- साहित्य/विविध - कान्तिपुर समाचार

‘स्रष्टा परिचय पत्र’ दिने प्रज्ञा प्रतिष्ठानको घोषणा

कान्तिपुर संवाददाता

काठमाडौँ — नेपाल प्रज्ञा प्रतिष्ठानले वैशाखबाट ‘स्रष्टा परिचय पत्र’ दिने घोषणा गरेको छ । प्रतिष्ठानले मंगलबार आयोजना गरेको ‘नयाँ वर्ष २०७८ को सांस्कृतिक महत्त्व विषयक प्रवचन तथा स्रष्टा भेटघाट’ समारोहमा घोषणा गरेको हो ।

नेपाल प्रज्ञा प्रतिष्ठानको ‘सयपत्री’ बहुभाषिक अर्धवार्षिक पत्रिकाको ४०औं अंक सार्वजनिक गर्दै कुलपति उप्रेती, उपकुलपति गुरुङ, सदस्यसचिव उपाध्याय तथा प्राज्ञ दिनेशराज पन्त र प्राज्ञ योगेन्द्रप्रसाद यादव ।तस्बिर : गणेश राई/कान्तिपुर

‘नेपालका वाङ्‌मयसेवीलाई परिचयपत्र दिने तयारीमा जुटेका छौं,’ नयाँ वर्षको कार्यक्रमबारे जानकारी दिँदै प्रतिष्ठानका कुलपति गंगाप्रसाद उप्रेतीले भने, ‘राष्ट्रपतिज्यूको बाहुलीबाट परिचयपत्र वितरण आरम्भ गर्छौं ।’ स्रष्टा परिचयपत्र कार्यविधि निर्माण भएको जनाइएको छ । प्रतिष्ठानले प्रकाशित गरेको ‘साहित्यकार–कलाकार परिचय कोष’मा करिब पाँच हजार स्रष्टा समेटिएका छन् ।

सदस्यसचिव प्रा. जगतप्रसाद उपाध्यायका अनुसार ‘लेखक/साहित्यकार परिचय–पत्र’ नामाकरण गरिएको छ । परिचयपत्रमा स्रष्टाको नाम/उपनाम, नागरिकता नम्बर, जिल्ला, जन्म मिति, विषय क्षेत्र, विधा खुलाइने छ । ‘कुनै पनि स्रष्टालाई श्रेणीकरण गरिने छैन,’ कार्यविधिबारे उपाध्यायले भने, ‘परिचय–पत्र पाउनका निम्ति सम्बन्धित लेखकले प्रतिष्ठानमा आफ्नो कृति बुझाउनु पर्नेछ ।’

प्रतिष्ठानले महाकवि लक्ष्मीप्रसाद देवकोटाको घरलाई संग्रहालय निर्माण गर्ने प्रक्रिया अघि बढाएको छ । काठमाडौंको मैतीदेवीस्थित १२ आना क्षेत्रफलमा रहेको घर तथा जग्गामा उक्त संग्रहालय निर्माणका निम्ति टेण्डर आह्वान गरेको कुलपति उप्रेतीले जनाएका छन् । ‘सकेसम्म अत्याधुनिक संग्रहालय बनाउने छौं,’ उनले भने ।

विक्रम संवत्को महत्व र नेपालमा चलेका संवत्बारे प्रतिष्ठानका उपकुलपति डा. जगमान गुरुङ र इतिहासविद् प्राज्ञ दिनेशराज पन्तले बोलेका थिए । ‘नयाँ वर्षमा नयाँ किताब पढौं’ नारासहित आयोजना गरिएको समारोहमा प्रतिष्ठानको प्रकाशन ‘प्रज्ञा’, ‘सयपत्री’ र ‘बालप्रज्ञा’ को नयाँ अंक सार्वजनिक गरिएको थियो ।

प्रकाशित : चैत्र ३१, २०७७ २०:०२
प्रतिक्रिया
पठाउनुहोस्

महोत्तरीमा ट्रकको ठक्करबाट मोटरसाइकल चालकको मृत्यु

सुनिता बराल

महोत्तरी — बीपी राजमार्ग अन्तर्गत महोत्तरीको बर्दिवास–३ स्थित कालापानीमा मंगलबार साँझ ट्रकले मोटरसाइकललाई ठक्कर दिँदा एक जनाको मृत्यु भएको छ ।

ट्रकको ठक्करबाट मोटरसाइकल चालक मोरङ जिल्ला कानेपोखरी ३ का २६ वर्षका नरेन्द्र दुलाल रहेका छन् ।

मोटरसाइकलको पछाडि बस्ने मोरङ सुन्दर हरैचा–६ का ३५ वर्षीय केदार बास्तोला घाइते भएको प्रहरीले जनाएको छ । घाइतेको बदिबासस्थित जनसेवा अस्पतालमा उपचार पछि थप उपचारका लागि धरान पठाइएको इलाका प्रहरी कार्यालय बर्दिबासका डिएसपी विरेन्द्र थापाले जानकारी दिए ।

उत्तरबाट दक्षिण (बर्दिबास) तर्फ जाँदै गरेको बा २ ब ९३३८ नम्बरको सरकारी नम्बर प्लेटको मोटरसाइकललाई दक्षिणबाट उत्तर सिन्धुलीतर्फ गइरहेको मालवाहक ट्रकले ठक्कर दिँदा दुलालको घटनास्थलमै मृत्यु भएको प्रहरीले जनाएको छ ।

मृतक दुलालको साथमा रहेका कागजपत्रका आधारमा उनी नगरपालिकामा काम गर्ने कर्मचारी हुनसक्ने र थप अनुसन्धान भइरहेको डिएसपी थापाले बताए । दुर्घटनामा ठक्कर दिने ट्रक र मोटरसाइकल इलाका प्रहरी कार्यालय बर्दिबासको नियन्त्रणमा रहेको प्रहरीले जनाएको छ ।

प्रकाशित : चैत्र ३१, २०७७ १९:५४
पूरा पढ्नुहोस्
प्रतिक्रिया
पठाउनुहोस्
×