साहित्यकार शर्मा अभिनन्दित- साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

साहित्यकार शर्मा अभिनन्दित

कान्तिपुर संवाददाता

काठमाडौँ — साहित्यकार एवं पत्रकार नगेन्द्रराज शर्मालाई अभिनन्दन गरिएको छ । शर्मा ५१ वर्षदेखि प्रकाशित ‘अभिव्यक्ति’ साहित्यिक द्वैमासिकका संस्थापक प्रधान सम्पादक हुन् । वि.सं.१९९४ चैत २२ गते रामेछापमा जन्मिएका शर्मालाई ८४औं जन्मोत्सवका अवसरमा विभिन्न साहित्यिक संस्थाले आइतबार राजधानीमा अभिनन्दन गरेका हुन् । 

शताब्दी वाङ्मय पुरुष सत्यमोहन जोशीले साहित्यकार शर्मा र उनकी पत्नी कमला शर्मालाई अभिनन्दन प्रदान गरेका हुन् । साहित्यकार पवन आलोकका अध्यक्षतामा गठित ‘वरिष्ठ साहित्यकार एवं साहित्यिक पत्रकार नगेन्द्रराज शर्मा अभिनन्दन मूल समारोह समिति’को तर्फबाट अभिनन्दन गरिएको हो । अभिनन्दित शर्माका ‘महापुरुष’ र ‘दिवास्वप्न’ उपन्यास कृति, ‘पीपलको बोटमुनि’ र ‘एकान्तका आफन्तहरू’ कथासंग्रह प्रकाशित छन् । शर्माद्वारा सम्पादित ‘अभिव्यक्ति’ पत्रिका हालसम्म २ सय ८ अंक प्रकाशित छ । शर्मा साहित्यिक पत्रकार संघका वर्तमान अध्यक्षसमेत हुन् ।

शर्माको योगदानबारे श्रीओम श्रेष्ठ ‘रोदन’, किशोर पहाडीलगायतले चर्चा गरेका थिए भने ४५ वटा विभिन्न साहित्यिक संस्थाले अभिनन्दन गरेको अध्यक्ष आलोकले जनाएका छन् ।

प्रकाशित : चैत्र २२, २०७७ १८:०५
प्रतिक्रिया
पठाउनुहोस्

हेमबहादुर लामालाई दीर्घकालीन सम्मान

कान्तिपुर संवाददाता

काठमाडौँ — निर्देशक/निर्माता हेमबहादुर लामालाई नेपाल चलचित्र निर्देशक समाजले दीर्घकालीन सम्मान प्रदान गरेको छ । समाजको १३ औं साधारण सभामा लामासँगै अन्य निर्देशकलाई पनि सम्मान गरिएको हो ।

शहरी विकास राज्यमन्त्री रामवीर मानन्धरको आतिथ्यमा निर्देशक युवराज लामा, रमेश बुढाथोकी, प्रकाश सायमी र नारायण पूरीलाई सर्जक सम्मान गरियो । त्यस्तै युवा सम्मानमार्फत निर्देशक ऋषि लामिछाने, दीपाश्री निरौला, चलचित्र विकास बोर्डका अध्यक्ष दयाराम दाहाललाई सम्मान प्रदान गरिएको थियो ।

दीर्घकालीन सम्मान पाएका हेमले प्राइभेट सेक्टरबाट फिल्म बन्न थालेपछि 'आदर्श नारी' निर्देशन गरेका थिए । 'जुनी', 'कान्छी' पछि बनेको यस फिल्मले धेरै कलाकार र गायक गायिकालाई त्यो बेला ब्रेक दिएको थियो । अभिनेत्री सन्नी रौनियार, हन्नी रौनियार, अंशुमाला शाही, कलाकार उज्ज्वल घिमिरे, मोहन निरौला, संगीतकार मदन परियारले यसै फिल्मबाट ब्रेक पाएका थिए । हेमकै निर्माणमा तयार भएको 'आदर्श नारी'मा लामा स्वयंकै कथा, पटकथा र संवाद थियो ।

बुबा हेमबहादुरले दीर्घकालीन सम्मान प्राप्त गर्दा कलाकार विजय लामा भावुक बने । 'चलचित्र जगतले हेम लामा को हो भनेर बिर्सिसकेको थियो । कहिल्यै पनि कुनै फिल्मको कार्यक्रममा उहाँलाई निमन्त्रणा आएको मलाई थाहा छैन,'लामाले भने,'मलाई ती कार्यक्रममा निमन्त्रणा आउँदा पनि म जाँदिन थिएँ । जसले मलाई विजय लामा बनाउनुभयो उहाँलाई नै त्यो ठाउँमा स्थान छैन भने म गएर के काम भन्ने लाग्थ्यो ।'

कार्यक्रममा समाजले अक्षयकोषको घोषणा गर्‍यो । आफूले अक्षयकोषमा सहयोग गर्न नपाएकोमा दुखी हुँदै नीरले फिल्मकर्मी अझै व्यवसायिक बन्न नसकेको बताए । '५३ वर्ष चलचित्र उद्योगमा व्यतित गरिसकेपछि यस्तो महान् कार्यमा सहभागिता जनाउनका लागि मसँग तपाईंहरुले दिनु भएको फ्रेम(सम्मान)बाहेक केही छैन,'उनले भने,'चलचित्रकर्मीहरुलाई त्यस्तो हैसियत प्राप्त हुन सकोस् जुन वातावरणमा ठूला-ठूला धनरासी कबुल गर्न सकुन् । दुर्भाग्यको कुरा त्यो समय यो अन्तरालमा मैले यो उद्योगमा अनुभुत गर्न पाइनँ ।'

फिल्म क्षेत्र अझै उद्योगको रुपमा स्थापना नभएको बताउँदै शाहले फिल्म बनाउन कुनै निश्चित वित्तिय संस्था आवश्यता रहेको बताए । 'फिल्म बनाउन चाहिने वित्तिय सहयोग नै हो । आजसम्म कुनै पनि यस्तो वित्तिय संस्था छैन जसले फिल्म बनाउनका लागि वित्तिय सहयोग गरोस्,'उनले भने ।

प्रकाशित : चैत्र २२, २०७७ १७:५३
पूरा पढ्नुहोस्
प्रतिक्रिया
पठाउनुहोस्
×