प्रज्ञामा पुस्तक मेला- साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

प्रज्ञामा पुस्तक मेला

कान्तिपुर संवाददाता

काठमाडौँ — प्रज्ञा प्रतिष्ठानले विविध पुस्तक तथा पत्रपत्रिकाहरू प्रदर्शनीका लागि मेला आयोजना गरेको छ । २९९ औं पृथ्वी जयन्तीका अवसर पारेर कमलादीस्थित प्रज्ञाको भानुभक्त कक्षमा पुस्तक मेला भइरहेको हो । साताव्यापी मेलामा विभिन्न स्थानहरूबाट पुस्तकप्रेमीहरू सहभागी भइरहेका छन् ।

पुस्तकहरू हरेक नेपालीहरूको हातमा पुर्‍याउन प्रदर्शनी गरिएको प्रतिष्ठानका कुलपति गंगाप्रसाद उप्रेतीले बताए । हाल साझा प्रकाशन र निजी प्रकाशनमार्फत सातै प्रदेशमा पुस्तकहरू पुर्‍याउने प्रज्ञाको योजना छ । पठन संस्कृतिको विकास, बिक्री, प्रवद्र्धन, लेखक, पाठक र प्रकाशकबीच त्रिकोणात्मक भेट हुने थलोका रूपमा प्रदर्शनी गरिएको हो ।

प्रदर्शनीमा वि.सं. २०१५ सालदेखि हालसम्म प्रज्ञाले प्रकाशन गरेका पुस्तकहरू राखिएका छन् । विभिन्न विषयका ४ सय ८५ वटा पुस्तक र पत्रपत्रिकाहरू हेर्न र खरिद गर्न पाइने प्रतिष्ठानका सदस्य सचिव जगतप्रसाद उपाध्यायले बताए । उनका अनुसार नेपाली बृहत् शब्दकोश र प्रज्ञा नेपाली–अंग्रेजी शब्दकोशमा छुटको व्यवस्था पनि गरिएको छ । प्रतिष्ठानका प्रकाशनमा ४० प्रतिशतसम्म छुटको व्यवस्था छ ।

प्रकाशित : पुस २८, २०७७ २१:३१
प्रतिक्रिया
पठाउनुहोस्

मन्त्रिपरिषद् हेरफेरविरुद्धको सुनुवाइ माघ ११ मा

रासस

काठमाडौँ — सर्वोच्च अदालतले प्रतिनिधिसभा विघटन भएपछि मन्त्रिपरिषद्‌मा थप नियुक्ति, हेरफेर वा कार्यविभाजन रोक्न आदेशको माग गर्दै दायर गरेको रिट निवेदन ‘हेर्दाहेर्दै’ मा आगामी माघ ११ गते सुनुवाइ हुने भएको छ ।

न्यायाधीश विश्वम्भरप्रसाद श्रेष्ठ र सुष्मालता माथेमाको संयुक्त इजलासमा मंगलबार सुनुवाइ हुँदाहुँदै समय अभावका कारण अर्को सुनुवाइका लागि आगामी माघ ११ गतेका लागि तोकिएको हो । यसअघि यही पुस २० गते न्यायाधीश अनिलकुमार सिन्हाको एकल इजलासले सरकारसँग लिखित जवाफ माग गर्दै आज छलफलका लागि दुवै पक्षलाई बोलाउने आदेश जारी गरेको थियो ।

राष्ट्रपति कार्यालय शीतलनिवास, प्रधानमन्त्री तथा मन्त्रिपरिषद्को कार्यालयलाई विपक्षी बनाई वरिष्ठ अधिवक्ता दिनेश त्रिपाठी र अधिवक्ता लोकेन्द्रबहादुर ओली, केशरजङ्ग केसी, दिनेश लामिछानेले प्रतिनिधिसभा विघटन भएपछि मन्त्रिपरिषद् विस्तार नगर्न माग गर्दै रिट निवेदन दायर गरेका थिए ।

प्रकाशित : पुस २८, २०७७ २१:२०
पूरा पढ्नुहोस्
प्रतिक्रिया
पठाउनुहोस्
×