नगरकोटीको 'कल्प-ग्रन्थ' प्रिमियम संस्करणमा आउने- साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

नगरकोटीको 'कल्प-ग्रन्थ' प्रिमियम संस्करणमा आउने

कान्तिपुर संवाददाता

काठमाडौँ — पुस्तक प्रकाशक बुकहिलले लेखक कुमार नगरकोटीको नयाँ कथासंग्रह 'कल्प-ग्रन्थ' प्रिमियम संस्करणमा  प्रकाशन गर्ने जनाएको छ । बुकहिलले जारी गरेको प्रेस विज्ञप्तिमा ७ सय ७७ पृष्ठको कथा-संग्रहमा ६३ वटा विभिन्न बान्की र शैलीका कथा रहने उल्लेख गरिएको छ । पुस्तक चैत १४ गते लोकार्पण गरिने छ ।

हार्डकभरमा बक्ससहित उपलब्ध हुने यो पुस्तक लेखकको हस्ताक्षरसहितको हुने पनि बुकहिलले जनाएको छ । पुस्तकको मूल्य दुई हजार एक्काइस रुपैयाँ रहने, यो प्रि-अर्डरबाट मात्र किन्ने सकिने, कुनै पनि पुस्तक पसलमा उपलब्ध नहुने र पुस्तकको पुन: मुद्रण/प्रकाशन नहुने पनि विज्ञप्तिमा उल्लेख गरिएको छ । 'यो पुस्तक जति ग्राहकले प्रि-अर्डर गर्छन्, त्यति प्रतिमात्र छापिनेछ । देश वा विदेशका कुनै पनि पुस्तक पसलमा यो पुस्तक उपलब्ध हुनेछैन । कुनै बिक्रेताले बेच्न चाहेमा यो योजनामा सहभागी हुनुपर्नेछ,' विज्ञप्तिमा भनिएको छ ।

'पुस्तकमा कन्सेप्चुअल, ग्रे, पोस्टकार्ड, इन्स्टलेसन, स्कृन प्ले, ट्रान्स क्रियटेड, टाइपोग्राफिक लगायत कथाहरू रहेका छन् । नेपाली साहित्यमा नगरकोटीको यो किताब उच्चतम प्रयोग हो,' बुक-हिलका अध्यक्ष भूपेन्द्र खड्काले विज्ञप्तिमा भनेका छन्, 'पश्चिमा मुलुकहरूमा विशेष लेखकहरूका किताब विशेष तरिकाले प्रकाशन हुन्छन्, हामीले पनि लेखनमा सधैँ प्रयोग गर्दै आइरहेका नगरकोटीको यो किताबलाई विशेष तरिकाले प्रकाशन गर्न लागेका हौं ।'

प्रकाशित : मंसिर १, २०७७ १३:४४
प्रतिक्रिया
पठाउनुहोस्

बीपी प्रतिष्ठानमा पछिल्लो २४ घण्टामा ४ कोरोना संक्रमितको मृत्यु

प्रदीप मेन्याङ्बो

सुनसरी — पछिल्लो २४ घण्टामा धरानस्थित बीपी कोइराला स्वास्थ्य विज्ञान प्रतिष्ठानमा उपपचाररत कोरोना संक्रमितमध्ये ४ जनाको मृत्यु भएको छ । प्रतिष्ठानका सहप्रवक्ता डा आशिष श्रेष्ठका अनुसार मृतकहरुमा सुनसरीको बराहक्षेत्र नगरपालिकाकी एक महिला, धनकुटाको सांगुरीगढी भेडेटारका एक वृद्ध पुरुष, झापाका एक वृद्ध पुरुष र झापाकै एक महिला रहेका छन् ।

उनका अनुसार पछिल्लो २४ घण्टामा मृत्यु भएका संक्रमितमध्ये बराहक्षेत्र नगरपालिका–३ की ४४ वर्षीया महिला मृगौला रोगी थिइन् । उनलाई कात्तिक ३० गते कोरोना संक्रमण पुष्टि भएपछि प्रतिष्ठानको कोभिड अस्पतालमा भर्ना गरिएको थियो ।

यसैगरी धनकुटाको साँगुरीगढी–८, भेडेटारका ७२ वर्षीय वृद्धको कोभिड अस्पतालमा मृत्यु पछि कोरोना पोजिटिभ पुष्टि भएको थिया । सहप्रवक्ता डा श्रेष्ठका अनुसार उनलाई कात्तिक २९ गते प्रतिष्ठानको कोभिड अस्पतालमा भर्ना गरिएको थियो । दीर्घ रोग नभएकी झापाकी २५ वर्षीया संक्रमित महिलालाई कात्तिक २६ गते कोभिड अस्पतालमा भर्ना गरिएको थियो । कोरोना पोजिटिभ भएको उनको पीसीआर रिपोर्ट भने २७ गते आएको थियो ।

यस्तै, कात्तिक २८ गते कोरोना संक्रमण पुष्टि भएका झापाका ८० वर्षीय वृद्धलाई कात्तिक २९ गते कोभिड अस्पतालमा भर्ना गरिएको थियो । सहप्रवक्ता डा श्रेष्ठका अनुसार मृतकहरुको मृतकको शव नियमअनुसार व्यवस्थापन कार्य भइरहेको छ ।

प्रकाशित : मंसिर १, २०७७ १३:१४
पूरा पढ्नुहोस्
प्रतिक्रिया
पठाउनुहोस्
×