२० युवाको कथा ‘छकालै’ - साहित्य/विविध - कान्तिपुर समाचार
कान्तिपुर वेबसाईट
AdvertisementAdvertisement

२० युवाको कथा ‘छकालै’ 

कान्तिपुर संवाददाता

काठमाडौँ — समकालीन २० युवा स्रष्टाको कथा समेटिएको कथासंग्रह ‘छकालै’ बजारमा आएको छ ।  पुस्तकमा पछिल्लो दशक साहित्यमा सक्रिय रहेका युवा कथाकारका २० थान कथा समावेश छन् । 

संग्रहका सम्पादक नवीनका अनुसार आख्यान प्रयास गरिहरहेका नवपुस्ताको प्रतिनिधि आख्यान–अनुहार हो ‘छकालै’ । उनी भन्छन्, ‘कथासंग्रह पहिलो पाइला भएकाले आफ्ना कमीकमजोरी होलान् तर हामीले आफ्नो समयको चेतना र भाषाशील्प प्रयोग गरेर कथा लेख्ने दुस्साहस गरेका छौं ।’

कथाकार संगीत मगरका अनुसार संग्रहले युवा मनोविज्ञानको कथासँगै युवाजीवनले भोग्नुपरेका साझा समस्या बोलेको छ । उनी भन्छिन्, ‘नयाँ पुस्ता के कारणले नयाँ छ भन्ने आयाम ‘छकालै’ले उठाएको छ ।’

‘कथा लेख्नु साहित्य कर्ममात्र होइन, युगको आवाज बोल्ने माध्यम हो’ अर्का कथाकार निर्भीकजंग रायमाझीले भने, ‘यसैले व्यक्तिगत सृजनाको संग्रह भएपनि नयाँ समयको साझा चेतना हाम्रा कथा पाइन्छ ।’

संगीत र नवीनसँगै संग्रहमा अनिल वान्तवा, अन्जना इछमफूल, अन्शु खनाल, अन्वेश थुलुङ, बाबु साहेब, विकास, दीपा मेवाहाङ राई, देव व्रत, खेम बतास, कृष्णप्रसाद अर्याल, कुन्साङ, मनोज विश्वकर्मा, नदीश, निमेषराज सापकोटा, निर्भीकजंग रायमाझी, प्रज्‍ज्‍वल अधिकारी, समर्पण श्री र सागर चन्दका कथा छन् ।

इन्डिगो इन्कले प्रकाशन गरेको संग्रहको मूल्य ३ सय ९९ रहेको छ । संग्रह ‘किताब यात्रा’ तथा ‘थुप्रै डटकम’ अनलाइनबाट समेत खरिद गर्न सकिने प्रकाशक विष्णुकुमारले जनाएका छन् ।

प्रकाशित : आश्विन ८, २०७७ ०९:५४
प्रतिक्रिया
पठाउनुहोस्

प्रदेश सांसद प्रधानलाई प्रतिष्ठानका रूख काटेको आरोप

पर्वत पोर्तेल

काँकडभिट्टा — झापा क्षेत्र नम्बर २ का प्रदेश सांसद बिर्ख प्रधानलाई अर्जुनधारा–९ स्थित सुखानी सहिद स्मृति प्रतिष्ठान परिसरभित्र रहेको वनका रूख कटान गरेको आरोप लागेको छ । उनले चार दिनअघि सुखानी पर्यटकीय क्षेत्रमा रहेका सिसौका तीनवटा रूख काटेको स्थानीय उपभोक्ताको भनाइ छ ।

उनीहरूका अनुसार प्रधान आफैं उपस्थित भएर रूख कटान गरिरहेको सूचना दिइएपछि अर्जुनधारास्थित वनको सब डिभिजन कार्यालयको टोली घटनास्थलसमेत पुगेको थियो । तर, सांसदलाई रंगेहात फेला पार्दा पनि वन कर्मचारीले कारबाही नगरेको उपभोक्ताको आरोप छ ।

टोलीले कटान गरिएको ११ दशमलव ७३ क्युफिट काठ नियन्त्रणमा लिएर प्रतिष्ठान परिसरमै घाटगद्दी गरेको डिभिजन वन कार्यालय झापाका प्रमुख विष्णुलाल घिमिरेले जानकारी दिए । उनका अनुसार सुखानी सहिद स्मृति प्रतिष्ठानमा रहेका वन पैदावार कसले प्रयोग गर्ने भन्ने विवाद छ । उनले भने, ‘प्रतिष्ठानले निर्णय गरेरै पनि रूख काट्न मिल्दैन ।’

वन कार्यालयप्रमुख घिमिरेलाई प्रधानले सुकेर हाँगा लत्रिएका कारण कछुवा संरक्षण क्षेत्रमा क्षति पुग्न सक्ने भएकाले रूख काटेको बताए पनि कान्तिपुरसँगको फोन सम्पर्कमा भने उनले आफूले कुनै रूख नकाटेको दाबी गरे । रूख लत्रिएर कछुवा संरक्षणमा क्षति पुग्ने भएपछि प्रतिष्ठानले नै काट्न लगाएको उनको भनाइ छ । ‘प्रतिष्ठानले रूख काट्न लगाएको रहेछ, संयोगले म घटनास्थल पुगेको मात्रै हो,’ नेकपाका नेता प्रधानले भने, ‘मेरा विरोधीहरूले सांसदले रूख काट्यो भनेर निराधार हल्ला फैलाएका मात्रै हुन् ।’

प्रतिष्ठानका पदाधिकारीहरूले भने सांसद प्रधानले पदीय दुरुपयोग गर्दै रूख कटान गरेको प्रमाण आफूहरूसँग रहेको जनाएका छन् । ‘सांसद आफैं उपस्थिति भएर रूख कटान गरिएको छ,’ एक पदाधिकारीले भने, ‘चाहिएको बेला हामी प्रमाण पेस गर्न सक्छौं ।’ प्रतिष्ठानले कानुनी प्रावधान मिचेर रूख कटान नगर्ने उनले बताए । ‘निर्णय गरेर रुख काट्नु पनि कानुन विपरीत हुन्छ,’ उनले भने, ‘हामीले रूख काट्ने निर्णय गरेकै छैनौं ।’

प्रकाशित : आश्विन ८, २०७७ ०९:४०
पूरा पढ्नुहोस्
प्रतिक्रिया
पठाउनुहोस्
×