नारी दिवसमा ‘स्मृतिलोकको यात्रा’

कान्तिपुर संवाददाता

काठमाडौँ — अन्तर्राष्ट्रिय नारी दिवसकै अवसर पारेर प्राध्यापक  अञ्जना वस्ती (भट्टराई) को नवीनतम कृति ‘स्मृतिलोकको यात्रा’ आइतबार सार्वजनिक भएको छ ।

साहित्यकार ज्ञानु पाण्डे, साधना प्रतीक्षा, ज्ञानु अधिकारी, उषा थपलिया र लेखक स्वयम्ले कृतिको लोकार्पण गरे । त्रिभुवन विश्वबिद्यालयमा अंग्रेजी शिक्षाकी प्राध्यापक भट्टराईले अंग्रेजी भाषाविज्ञान र व्याकरणमाथि पुस्तक लेख्दै आए पनि नेपालीमा अनुभूतिजन्य संस्मरण भरेर ‘स्मृतिलोकको यात्रा’ लेखेकी हुन् । ‘स्मृतिलोकको यात्रा’ मा संस्मरण र श्रद्धासुमन विधाका २० वटा निबन्ध संकलित छन् ।


कृतिबारे टिप्पणी गर्दै प्राध्यापक ज्ञानु पाण्डेले ‘समानताको विषयलाई सतही भएर बुझ्नु–बुझाउनुको साटो यसको उपादेयता व्यवहारमा देखिनुपर्ने’ धारणा राखिन् । ‘भट्टराईको कृतिमा यही समानताको विषय उल्लेख छ, घरपरिवारका अग्रजप्रति अनुगृहीत हुँदै सकारात्मक सोचमा लेखिएको यो कृति धेरैका निम्ति पठनीय खुराक हुन सक्छ,’ पाण्डेले भनिन् । उनले नारी हक–अधिकारको पक्ष कुनै नारा, कानुनी वा मुलुकी ऐनमा लेखेर मात्रै कुनै अर्थ नरहने बताएकी थिइन् ।


एमए अध्ययनरत छँदै बिहा भएपछि लेखक भट्टराईले विद्यावारिधि गर्दासम्म गरेको संघर्ष, दुई छोरी हुर्काउँदा र ती छोरीको सामाजिक सुरक्षामा लिएको चिन्ता, विश्वविद्यालयमा प्राध्यापक तहसम्म पुग्दाको संघर्षलाई कृतिमा समेटिएको वक्ता अनिता पन्थीले सुनाइन् । ‘कृतिमा आफ्नो जीवनप्रतिको गुनासो र बेहोरेको कठिनाइभन्दा अरूबाट पाएको साथसहयोगको बयान उल्लेख्य छ,’ अर्की वक्ता गंगालक्ष्मी भण्डारीले भनिन्, ‘यसमा आफ्नोभन्दा पनि अरूको जीवनको सकारात्मक पाटोबारे चर्चा गरिएको छ ।’


नारी हक–अधिकारका ठूला कुराले मात्रै केही नहुने बताउँदै समीक्षक उषा थपलियाले ‘हरेक घरमा पुरुषले नारीलाई स्थान दिने हो भने बाहिर गएर हक–अधिकारका कुरा गर्नै नपर्ने’ अनुभव सुनाइन् । समीक्षक ज्ञानु अधिकारीले ‘स्मृतिलोकको यात्रा’ मा एउटी महिलाको संघर्ष, धैर्य र सहनशीलताको कथा भरिएको बताउँदै कृतिका हरेक संस्मरण सरस र सहज रहेको बताइन् । लेखक भट्टराईले आफूले भोगेको र बेहोरेको स्मृतिजन्य कुरालाई फुर्सदको उपयोग गर्दै लेखिएको र यसमा आग्रह–पूर्वाग्रहभन्दा आफूले बोध गरेको जीवनको सकारात्मक पक्षलाई बढी स्थान दिएको बताइन् । ओरिएन्टल बुक्सले प्रकाशित गरेको यो कृतिअघि भट्टराईको ‘जीवनका घुम्ती र देउरालीहरू’ नियात्रा संग्रह प्रकाशित छ । प्रकाशित : फाल्गुन २६, २०७६ ०९:४४

प्रतिक्रिया
पठाउनुहोस्
ADVERTISEMENT

कामदार पठाउन रोकिएकामा कोरिया असन्तुष्ट

श्रमिक युनियनले भन्यो— मास्क खरिदमा विभेद गरियो 
होम कार्की

काठमाडौँ — नेपाली कामदार पठाउन स्थगन गरेको भन्दै दक्षिण कोरियाले नेपाल सरकारसँग असन्तुष्टि जनाएको छ । काठमाडौंस्थित कोरियन दूतावासले परराष्ट्र मन्त्रालयमार्फत श्रम, रोजगार तथा सामाजिक सुरक्षा मन्त्रालयलाई पत्र पठाउँदै असन्तुष्टि व्यक्त गरेको हो । कोरियामा कोरोना भाइरस संक्रमण बढेपछि नेपालले तत्काललाई नयाँ कामदार पठाउन स्थगन गरेको छ । 

कोरियाको रोग नियन्त्रण तथा सुरक्षा केन्द्रका अनुसार सोमबार बिहानसम्म ७ हजार ३ सय ८२ जना कोरोना भाइरसबाट संक्रमित छन् । जसमा ५३ जनाको मृत्यु भइसकेको छ । संक्रमितमध्ये झन्डै ७५ प्रतिशत कोरियाको देइगु सहरमा छन् ।

त्यहाँ ६ सय २९ जना नेपाली कार्यरत छन् । नेपाली दूतावासले हालसम्म कोरियामा कार्यरत नेपालीलाई कोरोना भाइरसबाट संक्रमित नभएको जनाएको छ । मार्च महिनाभर कामदारको उडान तालिका नरहेको वैदेशिक रोजगार विभागको रोजगार अनुमति प्रणाली (ईपीएस) शाखाका प्रमुख कृष्ण खनालले बताए ।

‘परिस्थितिलाई दृष्टिगत गरी मार्चमा नयाँ कामदारको उडान तालिका नराखेका हौं,’ उनले भने, ‘बिदामा आएका कामदार भने आफैंले जोखिम बेहोरी जान पाउनेछन् ।’ खाडी मुलुकमा साउदी अरब र कुवेतले पनि कोरियासँगको उडानसमेत रोकेका छन् ।

कोरियाले हालसम्म १ लाख ८१ हजार ३ सय ८४ जनाको परीक्षण गरेको जनाएको छ । यसमध्ये १ लाख ६२ हजारको नतिजा ‘नेगेटिभ’ देखिएको छ । यता प्रवासी श्रमिक युनियनले भने मास्क खरिदमा कोरियन सरकारले विभेद गरेको भन्दै आपत्ति जनाएको छ । मास्क अभाव भएपछि कोरिया सरकारले कोरियनलाई नगरिकता र विदेशी कामदारले परिचयपत्र र स्वास्थ्य बिमा कार्ड देखाउनुपर्ने नीति ल्याएको छ ।

‘छ महिनाभन्दा कम अवधि बसोवास गरिरहेका विदेशी श्रमिक छन् । उनीहरूको स्वास्थ्य बिमा कार्ड छैन । यसअनुसार उनीहरू र कृषिमा काम गर्ने प्रायः प्रवासी श्रमिकले यो मास्क किन्न पाउँदैननन्,’ कोरियाको आधिकारिक प्रवासी श्रमिक युनियनका अध्यक्ष उदय राईले भने, ‘बिनाभिसाकालाई संक्रमणको आशंका लागे जाँच गर्दा नपक्रिने भनिएको थियो । तर एउटा मास्क किन्नबाट भने वञ्चित गराउने सरकारको नीति राम्रो भएन ।’

प्रकाशित : फाल्गुन २६, २०७६ ०९:४४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×