प्रज्ञामा गजल मेला

कान्तिपुर संवाददाता

काठमाडौँ — पाँच दशकभन्दा लामो इतिहास छ, राष्ट्रिय कविता महोत्सवको । अहिले पनि हरेक वर्ष प्रज्ञा प्रतिष्ठानले कविता महोत्सव गर्दै आएको छ । बुधबार भने पहिलोपटक स्रष्टाहरूले प्रतिष्ठानको प्रेक्षालयमा गजलै गजल सुनाए । प्रज्ञाले गरेको पहिलो राष्ट्रिय गजल महोत्सवमा देशभरका स्रष्टाले गजल सुनाएका हुन् । 

राष्ट्रिय युवा परिषद्को सहकार्यमा आयोजित दुईदिने महोत्सवमा मुलुकभरिका गजलकारहरूले राजनीतिक बेथिति, मानवीय दु:ख, प्रेमदेखि सीमा अतिक्रमण र राष्ट्रियतासम्मको विषयलाई गजलमार्फत नै चिरफार गर्ने जमर्को गरे । गजल वाचनका लागि ७ प्रदेशबाट ३५ र राजधानीबाट झन्डै दुई दर्जनभन्दा बढी गजलकार छानिएका थिए ।


प्रदेशबाट सुरेश सुवेदी, लोकेन्द्र बञ्जारा, मधुराज केरुङ, घनश्याम पथिक, सञ्जय शाह, नीला घिमिरे, शिव सन्देश, विविश पौडेल, मीना देवकोटा, अनिता न्यौपाने, विनोद अनुज, वरुण लामिछाने, पुरु लम्साल, बगेकी गंगा, सायर, अञ्जु स्मारिका, छविलाल कोपिला, पुष्प आचार्य, पार्वती भट्टलगायतले सिर्जना सुनाउँदा राजधानीबाट असीम सागर, जय पौडेल, केशव भट्टराई, सुमन स्मारिकालगायतले माहोल तताए ।


गजलकार बूँद राणा, शीतल कादम्बिनी, धीरेन्द्र प्रेमर्षिलगायत झन्डै एक दर्जनभन्दा बढीको गजल पनि उत्तिकै ओजपूर्ण थियो । महोत्सवमा प्रतिष्ठानका कुलपति गंगाप्रसाद उप्रेती, पूर्वकुलपति बैरागी काइँला, उपकुलपति जगमान गुरुङ, नेपाल संगीत तथा नाट्य प्रतिष्ठानका कुलपति नारायणभक्त श्रेष्ठ (रायन), अग्रज गजलकार ज्ञानुवाकर पौडेललगायतले गजल महोत्सवबारे प्रस्ट्याए । कुलपति उप्रेतीले साहित्यमा युवालाई उत्प्रेरित गर्न महोत्वसले सघाउने दाबी गरे । उनले ‘राष्ट्रिय तहमा यो नै पहिलो गजल मेला भए पनि प्रतिष्ठानले यसअघि पनि प्राथमिकता राख्दै आएको दाबी गरे ।


प्रकाशित : माघ १६, २०७६ ०७:४२
ADVERTISEMENT
ADVERTISEMENT
प्रतिक्रिया
पठाउनुहोस्

विदेशी लगानीको सीमा संशोधन गरिने

कान्तिपुर संवाददाता

काठमाडौँ — अर्थमन्त्री युवराज खतिवडाले पाँच करोड रुपैयाँभन्दा कमको प्रत्यक्ष वैदेशिक लगानी गर्न नपाइने सीमा हटाउने बताएका छन् । 

बिहीबार अर्थ मन्त्रालयमा स्विस इन्भेस्टमेन्ट फन्ड फर इमर्जिङ मार्केट्सका अध्यक्ष तथा नेपालका लागि स्विट्जरल्यान्डका पूर्वराजदूत जर्ज फ्राइडेन नेतृत्वको टोलीसँगको भेटवार्तामा अर्थमन्त्री खतिवडाले थ्रेसहोल्डसम्बन्धी व्यवस्था संशोधनको छलफल अगाडि बढेको बताएका हुन् । गत जेठमा मन्त्रिपरिषद्ले विदेशी लगानीको न्यूनतम सीमा पाँच करोड रुपैयाँ हुनुपर्ने व्यवस्था गरेको थियो । यो सीमा हटाउन नेपालस्थित द्विपक्षीय तथा बहुपक्षीय १८ दातृ निकायले सरकारलाई पत्राचारसमेत गरिसकेका छन् । ती निकायले अर्थमन्त्री तथा सरकारका अधिकारीलाई सीमा अधिक रहेको भन्दै त्यसलाई हटाउन वा संशोधन गर्न माग गरिरहेका छन् ।

दातृ निकायहरूले नेपालमा हालसम्म भएको लगानीमध्ये ९० प्रतिशत ५ करोड रुपैयाँभन्दा कम लगानीअन्तर्गतको रहेको र यो सीमाले सिर्जनशील तथा नवीनतम उद्यममा अवरोध गर्ने भन्दै हटाउनुपर्ने धारणा राख्दै आएका छन् । यस धारणाअनुसारको पत्र उनीहरूले प्रधानमन्त्री केपी शर्मा ओलीलाई लेख्दै त्यसको बोधार्थ अर्थमन्त्री युवराज खतिवडा, परराष्ट्रमन्त्री प्रदीप ज्ञावली, उद्योगमन्त्री र लगानी बोर्डलाई दिएका छन् ।

बिहीबारको भेटमा अर्थमन्त्री खतिवडाले विभिन्न देशसँग दोहोरो करमुक्ति सम्झौता प्रक्रिया अगाडि बढाइएको, च्यालेन्ज फन्डको सुरुवात गर्न लागिएको तथा लगानी आकर्षित गर्ने गरी कानुन निर्माण गरिएको र विद्यमान कानुनको परिमार्जन गर्ने तयारीमा रहेको जानकारी दिएको मन्त्रालयद्वारा जारी विज्ञप्तिमा उल्लेख छ ।



प्रकाशित : माघ १६, २०७६ ०७:३९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×