सम्झनामा कविशिरोमणि

यी तीनैजना साधकको सम्मानमा स्थापित त्रिमूर्ति निकेतनले लेखनाथ पौड्यालको सम्झना गरेको हो । निकेतनकी अध्यक्ष एवं साहित्यकार इन्दिरा प्रसाईंले इतिहासको सन्दर्भ कोट्याउँदै विसं २००८ साल असार २९ गते पौड्याललाई राजा त्रिभुवनद्वारा कविशिरोमणिको पदवी र मासिक दुई सय रुपैयाँ आजीवन भत्ता प्रदान गरको बताए । उनका अनुसार विसं २०११ मा काठमाडौंमा पौड्यालको रथयात्रा गरिएको थियो । गोपाल पाण्डे असीमको अग्रसरतामा देवकोटा र समसमेत भएर पौड्याललाई रथारोहण गराइएको थियो, जुन नेपाली साहित्यको इतिहासमै पहिलो रथारोहण थियो ।

पौड्यालको पूर्णकदको सालिकमा माल्यार्पण गरी सुरु गरिएको कार्यक्रममा लेखनाथ पौड्याल काव्यसभाका संयोजक प्रा.राजेन्द्र सुवेदी, बालकृष्ण सम फाउन्डेसनका संयोजक मदनदास श्रेष्ठ, त्रिमूर्ति निकेतनका सदस्यसचिव नरेन्द्रराज प्रसाईं र कार्यक्रम संयोजक यादव भट्टराईले कविशिरोमणि, नाट्यसम्राट् र महाकविको योगदानको चर्चा गरे । स्रष्टा सीता भट्टराई, यादव भट्टराई, ललिता दोषी र भगवती बस्नेतले लेखनाथको सम्झनामा कविता सुनाए ।