पुस्तकमा सर्वजित

रणेन्द्र बरालीले लेखेको पुस्तक ‘संघर्षशील युगपुरुष भगत सर्वजित विश्वकर्मा’ को पोखरामा गण्डकी प्रदेश प्रमुख अमिक शेरचनले लोकार्पण गरे ।

भगत सर्वजित विश्वकर्मा प्रतिष्ठान बागलुङले पुस्तक प्रकाशन गरेको हो । बरालीले भगत सर्वजितको पारिवारिक पृष्ठभूमि, बाल्यकाल, दलित आन्दोलनको थालनी, संगठित संघर्ष, आरनको टुँडो भाँच्ने आन्दोलन, पाल्पा कारागारको यातना, मोहन शमशेरबाट लालमोहरलगायत प्रसंग पुस्तकमा उल्लेख गरेका छन् ।

विश्वकर्मा थरको थालनी, लेखन र कृतिकरण, संघर्षको सिंहावलोकन, जात र भेदभावसम्बन्धी आलेख पुस्तकमा समेटिएका छन् । बरालीले आफ्नो पुस्तकमा सर्वजितले विसं २००३ मा विश्व सर्वजन संघ गठन गरी संगठित दलित आन्दोलनको सुरुवात गरेको उल्लेख गरेका छन् ।

विसं १९५० मा बागलुङको मूलपानीमा जन्मिएका सर्वजित सानैदेखि विद्रोही थिए । उनले भारतको बनारसबाट संस्कृतमा आचार्य गरे । हिन्दु धर्मग्रन्थका वेद, उपनिषद्, पुराण, स्मृतिलगायत ग्रन्थको गहिरो अध्ययन गरे । विश्व सर्वजन संघ गठन गरेर दलितका मुद्दा उठाए । जेलनेल भोगे । विसं २०१२ मा उनको निधन भयो ।

साहित्यकार खगेन्द्र संग्रौलाले पुस्तकको भूमिकामा लेखेका छन्, ‘भगत आफ्नो समयका दलित नायक हुन्, प्रथम पुरुष हुन् ।’ बरालीले लामो समय अनुसन्धान गरी पुस्तक लेखेको प्रतिष्ठानका अध्यक्ष ओमबहादुर विश्वकर्माले बताए ।

उनका यसअघि नेपालमा ‘अछुत जातीय संघर्ष’ (२०३८), ‘आफ्नै व्यथा’ (नाटक–२०५६), ‘इतिहासको एक पैका’ उपन्यास (२०६५), ‘चीनको कोसेली’ यात्रा संस्मरण (२०६६) लगायत कृति प्रकाशित छन् ।