‘बसाइँ’ लेखकका नाममा पुस्तकालय

कान्तिपुर संवाददाता

खोटाङ — पूर्वी पहाडको सामाजिक जीवन र गरिबी झल्कने आधा शताब्दी अघिको उपन्यास ‘बसाइँ’का लेखक लीलबहादुर क्षेत्रीको नाममा जिल्लाको एउटा सरकारी विद्यालयमा पुस्तकालय स्थापना भएको छ ।

पुस्तकालय खोटाङको हलेसी तुवाचुङ नगरपालिका–६, मंगलटारस्थित पिपलडाँडा देवीस्थान माध्यमिक विद्यालयमा स्थापना गरिएको वडाका वडाध्यक्ष रमेश राउतले जानकारी दिए । पुस्तकालय उद्घाटन नगरपाकिलाका मेयर इवन राइले गरेका थिए । नेपाली भाषा–साहित्यका क्षेत्रमा पुर्‍याएको अनवरत योगदानका लागि ३ वर्षअघि प्रतिष्ठित जगदम्बाश्री पुरस्कार पाएका लिलबहादुर क्षेत्रीले आफ्नो पुरस्कार रकमको आधा अर्थात १ लाख रुपैयाँ उक्त पुस्तकालय स्थापनाका लागि प्रदान गरेका थिए ।

पुस्तकालयमा रिड नेपाल, रुम टु रिड, रत्न पुस्तक भण्डार लगायतका संस्थाबाट उपलब्ध २५ सयभन्दा बढी पाठ्यक्रमका र साहित्यिक कृतिहरु राखिएको छ । वडाध्यक्ष राउतका अनुसार, साहित्यकार लीलबहादुरले दिएको रकमबाट उक्त विद्यालयमा अक्षयकोषसमेत स्थापना गरिएको छ ।

‘एउटा साहित्यिक साधकका नाममा पुस्तकालय स्थापना गरेर अरु लेखक/स्रष्टालाई समेत उत्प्रेरित गर्न सकिन्छ भनेर हामीले यो अभियान अघि बढाएका हौं,’ वडाध्यक्ष राउतले भने ।

२०१९ सालमा स्थापित पिपलडााडा देवीस्थान माबिमा ४ सय बिद्यार्थी अध्यनरत छन् । साहित्यकार क्षेत्रीका ‘बसाई’ सहित ब्रम्हपूत्रका छेउछाउ, अतृप्त लगायतका कृति प्रकाशित छन् । ८५ वर्षिय साहित्यकार क्षेत्री भारतको आसाम, गुवाहटी निवासी हुन् ।

प्रकाशित : मंसिर १०, २०७६ १९:१०
प्रतिक्रिया
पठाउनुहोस्
ADVERTISEMENT

वरिष्ठ पत्रकार कसजू रहेनन्

कान्तिपुर संवाददाता

काठमाडौँ — वरिष्ठ पत्रकार एवं बाल साहित्यकार विनयकुमार कसजूको मंगलबार निधन भएको छ । मुटु र श्वासप्रश्वाससम्बन्धी समस्याबाट पीडित कसजूको ललितपुरस्थित नेपाल मेडिसिटी अस्पतालमा उपचारका क्रममा निधन भएको हो ।

निमोनियाका कारण गम्भीर बिरामी भएपछि उनलाई १९ कात्तिकमा मेडिसिटी अस्पतालमा भर्ना गरिएको थियो । गुल्मीको रिडीमा २००४ सालमा जन्मेका कसजूका श्रीमती र तीन छोरा छन् । । उनी राष्ट्रिय सूचना आयोगका प्रथम प्रमुख आयुक्त हुन् । उनी राष्ट्रिय समाचार समिति (रासस) मा सञ्चालक समिति सदस्यसमेत भएका थिए ।

उनी मुलुकमा ग्रामीण पत्रकारिता र सामुदायिक रेडियोका अभियन्ता मानिन्छन् । उनले देउराली पत्रिकासमेत प्रकाशन गरेका थिए । कसजूले पत्रकारिता र बाल साहित्यका माध्यमबाट बालबालिकाहरूलाई कविता र कथा लेख्न सिकाउने कार्यमा योगदान पुर्‍याउँदै आएका थिए ।

उनका दुई सयभन्दा बढी बालकथा र बाल साहित्यसम्बन्धी ५० भन्दाबढी कृति प्रकाशित छन् । नेपाल पत्रकार महासंघ, प्रेस चौतारी र प्रेस युनियनलगायतका सञ्चारकर्मीहरूका संघसंगठनले विज्ञप्ति जारी गरी कसजूको निधनप्रति शोक व्यक्त गरेका छन् । ती संगठनले कसजूको निधनबाट पत्रकारिता क्षेत्रले अनुभवी पत्रकार गुमाएको टिप्पणी गरेका छन् ।

प्रकाशित : मंसिर १०, २०७६ १९:०२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×