एसियाली स्रष्टा राजधानीमा

कान्तिपुर संवाददाता

काठमाडौँ — चिनियाँ राष्ट्रपति सी चिनफिङ फर्केलगत्तै एक हुल चिनियाँ साहित्यकार भने राजधानी काठमाडौं आइपुगेको छ । उनीहरूसँगै भारत, पाकिस्तान, बंलादेश, श्रीलंका र माल्दिभ्सबाट आएका स्रष्टाले मंगलबारदेखि चिनियाँ र दक्षिण एसियाली साहित्यका अनेक पाटो र सांस्कृतिक सम्बन्धमाथि बहस गर्नेछन्, नेपाली पर्यटकीय थलो घुम्नेछन् र विभिन्न नेपाली समुदायका सांस्कृतिक प्रस्तुति अवलोकन गर्नेछन् ।

दुई वर्षअघि चीनको छेन्दुमा सम्पन्न ‘चीन र दक्षिण एसिया साहित्य सम्मेलन’ को दोस्रो संस्करण यसपटक काठमाडौंमा हुन लागेको छ । आयोजक बनेको छ– नेपाल प्रज्ञा प्रतिष्ठान ।

प्रतिष्ठानले सोमबार राजधानीमा पत्रकार सम्मेलन गर्दै पाहुना स्रष्टाहरू आइसकेको जनायो । ‘सम्मेलनमा विभिन्न १६ जना विद्वान्ले विभिन्न विषयमा गोष्ठीपत्र प्रस्तुत गरिनेछ,’ प्रतिष्ठानका सदस्यसचिव जगत्प्रसाद उपाध्यायले भने, ‘चिनियाँसँगै दक्षिण एसिया साहित्यका अवस्थितिदेखि भावी सहकार्यसम्मको बहसले हाम्रो लागि उपलब्धिमूलक बन्न सक्छ ।’ मंगलबार बिहान प्रधानमन्त्री केपी शर्मा ओलीले उद्घाटन गर्ने सम्मेलनमा साँझ भने सांस्कृतिक झाँकीहरू प्रस्तुत गरिने उनले जनाए । बुधबार भने चन्द्रागिरिमा नेपाल पर्यटन बोर्डका तर्फबाट ‘नेपालमा सांस्कृतिक पर्यटनको सम्भावना’ विषयमा प्रस्तुति रहनेछ ।

स्रष्टालाई पोखराको प्राकृतिक दृश्यावलोकन भ्रमणका साथै काठमाडौंका विभिन्न ऐतिहासिक, सांस्कृतिक र पुरातात्त्विक स्थलहरूको अवलोकन र अध्ययन भ्रमण गराइनेसमेत उनले जनाए ।

प्रकाशित : आश्विन २८, २०७६ १०:११
ADVERTISEMENT
प्रतिक्रिया
पठाउनुहोस्
ADVERTISEMENT

‘घामड शेरे’ को ट्रेलर

कान्तिपुर संवाददाता

काठमाडौँ — हेमराज बीसी निर्देशित फिल्म ‘घामड शेरे’ को सोमबार सार्वजनिक गरिएको ट्रेलरमा बाढीले जग्गा बगाएपछि जग्गाधनीले खोलालाई मुद्दा हालेको द्वन्द्वमाथि फिल्म आधारित रहेको प्रस्ट्याएको छ । फिल्मको शीर्ष भूमिकामा निश्चल बस्नेत अभिनीत छन् भने उनको अपोजिटमा सालीको भूमिकामा स्वस्तिमा खड्का छिन् ।

कात्तिक ८ देखि प्रदर्शनमा आउन लागेको उक्त फिल्मलाई निर्देशक बीसीले सिमोश सुनुवारसँग मिलेर निर्माण गरेका हुन् । फिल्मको कथा, पटकथा पनि निर्देशक बीसीले नै लेखेका हुन् । निश्चल र स्वस्तिमासहित फिल्ममा सुष्मा निरौला, बादल भट्ट, लोकेन्द्र लेखक, रोय, सरोज अर्याल र विशेष भूमिकामा गौरी मल्ल पनि अभिनयमा छन् । फिल्मले यसअघि नै कालीप्रसाद बाँस्कोटाको शब्द, संगीत र गायनमा ‘साली मन पर्‍यो...’ बोलको गीत सार्वजनिक गरिसकेको छ ।

खोलालाई मुद्दा हाल्ने विषयको उठानबारे कार्यक्रममा प्रस्ट्याउँदै लेखक तथा निर्देशक बीसीले भने, ‘पश्चिमतिर हाँसोका रूपमा खोलालाई मुद्दा हाल्ने भन्ने प्रचलनमा छ । यो आइडियाबाटै मैले फिल्मको कथा तयार पारेको हुँ ।’ उनले आफू र निश्चल मिलेर यसका कानुनी बाटोहरूमा पनि लामो समय खोज अनुसन्धान गरेर मात्रै फिल्म बनाउन अघि बढेको बताए । फिल्मलाई लिएर निश्चल र स्वस्तिमा दुवैले उत्साह प्रकट गरेका थिए ।

प्रकाशित : आश्विन २८, २०७६ १०:१०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT