हरिहर देव पन्त स्मृति पुरस्कार पत्रकार बेल्बासेलाई

कान्तिपुर संवाददाता

काठमाडौँ — पत्रकार विष्णु बेल्वासेले हरिहरदेव पन्त स्मृति सम्मान पत्रकारिता पुरस्कार पाएका छन् । डा. हरिहर देव पन्त फाउन्डेसनले स्थापना गरेको उक्त पुरकार नेपाल राष्ट्र बैंकका पूर्वगभर्नर गणेशबहादुर थापाले शनिबार बेल्वासेलाई प्रदान गरेका हुन् । 

दुई दशकदेखि पत्रकारितामा कलम चलाउँदै आएका बेल्बासेलाई पुरस्कार स्वरूप ५० हजार रुपैयाँ नगदसहित सम्मान–पत्र प्रदान गरिएको हो । लघुवित्तका पिताका रूपमा मानिने पन्तको स्मृतिमा उक्त फाउन्डेसनले प्रत्येक वर्ष एकजना आर्थिक पत्रकार वा संघसंस्थालाई पुरस्कृत गर्दै आएको छ ।

यस्तै पन्त लघु उद्यमशील पुरस्कार प्रदेश १ की उत्कृष्ट लघुउद्यमी पनिया चौधरी र प्रदेश २ कलैया १८ मोतीसरकी विद्यावती देवी साहलाई राष्ट्र बैंकका डेपुटी गभर्नर चिन्तमणि शिवाकोटीले पुरस्कार स्वरूप ३० हजार रुपैयाँ र सम्मान पत्र प्रदान गरे ।

पन्त लघुउद्यमशील पुरस्कार कार्यक्रम अन्तर्गत प्रदेश ३ की उत्कृष्ट लघुउद्यमी शिवकुमारी केसी र गण्डकी प्रदेशमा लघुउद्यमको क्षेत्रमा उत्कृष्ट कार्य गर्ने शोभा कुमारीलाई पुरस्कारस्वरुप ३० हजार रुपैयाँ र सम्मान पत्र प्रदान गरिएको थियो । प्रदेश नम्बर ५ की सुरमी मल्लाह, कर्णाली प्रदेशकी खैरुन निशा र सुदूरपश्चिम प्रदेशकी ज्ञानीदेवी चौधरीले उत्कृष्ट लघुउद्यमीको रुपमा ३० हजार राशिसहित सम्मान पत्र पाए ।

प्रकाशित : भाद्र २१, २०७६ १७:४६
प्रतिक्रिया
पठाउनुहोस्

प्रदेशको आर्थिक सम्मुन्नतिमा होटल तथा पर्यटन उद्योग बलियो विकल्प  : मुख्यमन्त्री राउत

रवीन्द्र उप्रेती

काठमाडौँ — प्रदेश २ का मुख्यमन्त्री लालबाबु राउतले प्रदेशको आर्थिक सम्मुन्नतिमा होटल तथा पर्यटन उद्योग बलियो विकल्प हुने बताएका छन् । 


प्रदेश २ का होटलहरुको छाता संगठन नेपाल होटल तथा पर्यटन व्यवसायी महासंघको प्रथम महाधिवेशन शुक्रबार बर्दिवासमा उद्घाटन पछि मुख्यमन्त्री राउतले उक्त धारणा राखेका हुन्। उनले भिजिट नेपाल २०२० लाई सफल पार्न तीनै तहका सरकारबीच समन्वय र सहकार्य आवश्यक रहेको औंल्याए।

महाधिवेशनमा वक्ताहरुले होटल तथा पर्यटन व्यवसायलाई राज्यले उद्योगको रुपमा विकास गर्नु पर्ने माग उठाएका थिए। उनीहरुले प्रदेशको पर्यटन क्षेत्रलाई व्यावसायिकरुपमा अघि बढाउन दक्ष जनशक्ति, लगानी प्रवर्द्धन, मजदुर व्यवस्थापन र योजनाबद्ध कार्यक्रमको आवश्यकता औंल्याए।

महाधिवेशन आइतबारसम्म चल्ने छ। अधिवेशनमा १ हजार ६ सय होटलका प्रतिनिधि सहभागी छन्।

प्रकाशित : भाद्र २१, २०७६ १७:४४
पूरा पढ्नुहोस्
प्रतिक्रिया
पठाउनुहोस्