तामाङ संस्कृतिबारे ज्ञान महोत्सव

राजधानीको भृकुटीमण्डपस्थित पर्यटन बोर्डमा सम्पन्न दुईदिने महोत्सवमा सरकारका पूर्वसचिव धनबहादुर तामाङले तामाङ भाषिक कार्यक्रम, समाजशास्त्री लक्ष्मी तामाङले ‘शब्दः एक शक्तिशाली हतियार’, आदिवासी फिल्म निर्देशक संजोग लाफामगरले ‘फिल्ममा तामाङ प्रस्तुति’, काठमाडौं विश्वविद्यालयका प्राविधिक विभाग प्रमुख बालकृष्ण बलले ‘प्रविधिको दृष्टिकोणबाट तामाङ भाषा’ कार्यपत्र प्रस्तुत गरे ।

त्यस्तै निष्णु थिङले ‘सरकारी सेवामा तामाङ जाति’, सोमबहादुर धिमालले ‘तामाङ अमूर्त संस्कृति संरक्षणमा युवाहरूको भूमिका’, कर्म डी लामाले ‘तामाङ सामाजिक आन्दोलन हिजो, आज र भोलि’ र रमेशकुमार तामाङले ‘तामाङ समाजमा पेवा प्रथा’ कार्यपत्र प्रस्तुत गरेका थिए ।

‘तामाङ राजनीतिमा चुनौती’ विषयक छलफलमा मानवशास्त्री मुक्तसिंह तामाङ, संघीय सांसद नवीना लामा, नेपाल तामाङ संघका केन्द्रीय अध्यक्ष केवलबहादुर तामाङ र संघीय समाजवादी पार्टीका नेता रवीन्द्र थिङ सहभागी थिए ।

‘तामाङ साहित्यको चुनौती र संभावनाहरू’ विषयमा चाहिँ साहित्यकारहरू राजु स्याङ्तान, सञ्चु ब्लोन र धनम तामाङले आआफ्नो विचार व्यक्त गरे । महोत्सवमा राणाविरोधी आन्दोलनका पूर्वजनमुक्ति सेना श्यामकुमार तामाङ र लेखिका सुकन्या वाइबाले पुराना पुस्ताका कथा सुनाएका थिए । तामाङ पहिचान दिवसका अवसरमा महोत्सव हुँदै आएको छ ।