'आधि' लिएर आइन् उषा

मंगलबार राजधानीमा अग्रज साहित्यकार एवं संस्कृतिविद् चेतन कार्की, साहित्यकार पद्यमावती सिंह र कुमारी लामाले लोकार्पण गरे ।

कार्कीले शेरचनको साहित्यिक जीवनबारे प्रकाश पार्दै ‘पोखराबाट मुक्तककार, कवि एवं गीतकारको रूपमा उदाएकी शेरचनले उपन्यास ‘आधि’ मा नाताभित्रै हुने बलात्कारको कथा खोतलेको’ बताए । साहित्यकार सिंहले शेरचनको लेखनमा पाइने प्रवृत्तिगत विशेषताबारे चर्चा गर्दै ‘जुनसुकै विधामा पनि महिलाले दिनहुँ भोग्ने सास्ती उजागर गर्नु नै शेरचनको लेखकीय गुण रहेको’ दाबी गरिन् । ‘आधि उपन्यास नयाँ दिशातिर अग्रसर नेपाली समाजको विम्ब हो,’ उनले भनिन् ।

उपन्यासमाथि टिप्पणी गर्दै समीक्षक लामाले ‘महिलामाथि हुने यौनजन्य हिंसाको तस्बिर उपन्यासमा आएको’ दाबी गरिन् । ‘पछिल्लो समयमा आएका मीटुलगायतका महिला हिंसाविरोधी अभियानलाई तात्त्विक निष्कर्षमा पुर्‍याउन ‘आधि’ जस्ता उपन्यासले महत्त्वपूर्ण भूमिका खेल्छन्,’ उनले भनिन् । कविता, मुक्तक, गीत र कथामा थुप्रै कृति दिइसकेकी शेरचनको उपन्यास भने यो पहिलो हो । एउटी बलात्कृत महिलाको सत्य घटनामा आधारित कथा भए पनि केही काल्पनिकताको जलप लगाएर उपन्यास लेखेको उनले बताइन् । उपन्यासलाई बुक हिल पब्लिकेसनले छापेको हो । शेरचनका ‘नजन्मेका आस्थाहरु’, सर्वकालीन पीडा र जागृतिका शंखघोष’, कविता कृति, ‘अक्षरहरुका शिविरबाट’, मुक्तक कृति, ‘तेस्रो रंग’ कथाकृति, ‘संवेदन’, ‘आकाश छुने रहर’ गीति एल्बमलगायतका कृति प्रकाशित छन् ।