लिटरेचर फेस्टिभल मंसिरमा

कान्तिपुर संवाददाता

काठमाडौँ — नेपाल लिटरचेर फेस्टिभलको आठौँ संस्करण आउँदो मंसिर २७ देखि ३० गतेसम्म पोखरामा हुने आइतबार बुकवर्म फाउन्डेसनले बताइएको छ ।

महोत्सवमा भारतीय लोकसभाका सांसद एवं लोकप्रिय साहित्यकार शशी थरुर, गीतकार एवं कवि जाभेद अख्तर, अभिनेत्री शबाना आज्मीलगायतचर्चित अन्तर्राष्ट्रिय हस्तीका साथै देशविदेशका १ सय ५० भन्दा बढी साहित्यकार, कलाकारको उपस्थिति रहने फाउन्डेसनले जनाएको छ ।

हजारौं साहित्यकार साहित्यप्रेमीको जमघट हुने महोत्सव देशकै महत्त्वपूर्ण उत्सवका रूपमा मनाउँदै यसै अवसरमा दक्षिण एसियाली साहित्यकै सर्वोत्कृष्ट तथा गरिमामय डीएससी पुरस्कार प्रदान गर्न लागिएको फाउन्डेसनका निर्देशक अजित बरालले बताए । दक्षिण एसियाली साहित्यिक पुरस्कार गुठीले आठ वर्षदेखि प्रदान गर्दै आएको पुरस्कार २५ हजार अमेरिकी डलर (२७ लाख ५० हजार रुपैयाँ) रहेको छ ।

‘डीएससी पुरस्कारसँगको समन्वय र सहकार्यले अन्तर्राष्ट्रिय लेखक, कलाकार, बुद्धिजीवी र राजनीतिज्ञबीच नेपाल लिटरेचर फेस्टिभललाई नै एक तटस्थ दक्षिण एसियाली मञ्चका रूपमा उभ्याउन मद्दत पुर्‍याउनेछ,’ निर्देशक बरालले भने । पुरस्कारको घोषणा फेस्टिभलको अन्तिम दिन गरिने छ ।

सन् २०१६ को डीएससी पुरस्कार श्रीलंकाको ग्याली लिटरेअरीमा, २०१७ को बंगलादेशस्थित ढाका लिटरेअरीमा र २०१८ को भारतको कोलकत्ता लिटरअरी मिटमा घोषणा गरिएको थियो । २०११ मा झम्सीखेलस्थित ज्ञान मण्डलाको सानो आँगनबाट सुरु भएको लिटरेचर फेस्टिभल चौथो संस्करणसम्म काठमाडौंमा गरिएको थियो ।

प्रकाशित : श्रावण २८, २०७६ ०८:०९
प्रतिक्रिया
पठाउनुहोस्

वर्ष दिन नपुग्दै छुट्टिए माइली–लिअम

कान्तिपुर संवाददाता

काठमाडौँ — अमेरिकी गायिका तथा नायिका माइली साइरस र अस्ट्रेलियन नायक लिअम हेम्सवर्थको विवाह भएको वर्ष दिन पनि नपुग्दै सम्बन्धविच्छेद भएको छ । करिअर र आफ्ना लागि भन्दै दुवैले सहमतिमा सम्बन्ध टुंग्याउन मन्जुर भएको माइली नजिकको स्रोतले बताएको छ ।

यो जोडी फिल्म ‘द हङ्गर गेम्स’ को छायांकनताका नजिकिएको थियो । जसमा हेम्सवर्थले अभिनय गरेका थिए । त्यसो त सन् २०१० मै दुवैले ‘द लास्ट सङ’ मा अभिनय गरेका थिए भने चिनापर्चीको सुरुवात त्यहीदेखि भएको थियो । त्यसपछिको एक दशक कहिले नजिक र कहिले टाढा हुँदै प्रेम सम्बन्ध बितायो ।

गत डिसेम्बरमा दुवैले विवाह गरेका थिए । माइली निकट स्रोतका अनुसार, वैवाहिक सम्बन्ध नरहे पनि उनीहरूले पालेका जनावरहरूको अभिभावकत्वका लागि दुवै जोडीका रूपमा भने रहिरहने बताइएको छ । साथै, दुवैले एकअर्काको गोप्यताको समेत सम्मान गर्नेमा सहमति जनाएका छन् ।

विवाह टुटेपछि मन बहलाउन घर पुगेका लिअमले डेली मेलका पत्रकारसँग छुट्टिनुको कारण अरूले बुझ्न नसक्ने भन्दै यसबारेमा कुरै गर्न नचाहेको बताए । माइलीले भने सम्बन्ध टुटेपछि ‘मन शान्त र आशावादी’ रहेको टिप्पणीगरेकी छन् ।

प्रकाशित : श्रावण २८, २०७६ ०८:०८
पूरा पढ्नुहोस्
प्रतिक्रिया
पठाउनुहोस्