मनीषको नाम गिनिज बुकमा

कान्तिपुर संवाददाता

ललितपुर — बाइक चलाउन त समान्य नै मानिन्छ । तर, एक खुट्टा र एक हातको सहायताले चलाउन पक्कै सहज छैन, त्यसमा पनि एक खुट्टा काँधमा र एक हातमा नेपालको झन्डा फहराउँदै ।

सानेपादेखि ग्वार्कोसम्मको पाँच किलोमिटर दूरी एक्स्ट्रा बाइक राइडिङमा मनीष श्रेष्ठले गिनिजबुक अफ वर्ल्ड रेकर्डमा नाम लेखाउन सफल भएका छन् ।

लायन्स क्लब अफ काठमाडौं लर्ड बुद्धले आयोजना गरेको गिनिजबुक अफ विश्व रेकर्डका लागि श्रेष्ठले एउटा खुट्टा काँधमाथि र अर्को बाइकको हृयान्डलमा राखी एकहातमा नेपालको झन्डा बोकेर मोटरसाइकल चलाएर एक्सट्रा बाइक राइडिङ गरेर गिनिज बुक अफ वर्ल्ड रेकर्डमा नाम दर्ता गराएका लायन्स क्लब अफ काठमाडौं लोर्ड बुद्धका अध्यक्ष विष्णुप्रसादभण्डारीले बताए ।

‘गिनिज बुक वर्ल्ड रेकर्डमा नाम लेखाउन सफल भएको छु,’ मनीष श्रेष्ठले भने, ‘सुरक्षित यात्रा गर्न सफल भए त्यसैमा खुसी छु ।’ कार्यक्रममा ललितपुर महानगरपालिकाका मेयर चिरीबाबु महर्जन, सभासद उमेश राईले बधाई तथा शुभकामना दिए ।

प्रकाशित : वैशाख ८, २०७६ ०८:१६
प्रतिक्रिया
पठाउनुहोस्

चीनमा जम्दै भारतीय फिल्म

एजेन्सी

काठमाडौँ — बलिउडमा समेत व्यावसायिक सफलता पाएको ‘अन्धाधुन’ ले यति बेला चिनियाँ दर्शकको मन जितेको छ । श्रीराम राघवनको निर्देशनमा आयुष्मान खुराना, तब्बु स्टारर फिल्म ‘अन्धाधुन’ ले भारतीय बक्सअफिसबाट मात्रै ९१ करोड भारु कलेक्सन गरेको थियो । उक्त रकम फिल्मको बजेटभन्दा ६० करोड बढी हो । 

फिल्मले व्यावसायिक सफलता मात्रै नभई समीक्षकबाट समेत निकै तारिफ बटुलेको थियो । चीनबाहेक अन्य देशबाट फिल्मले झन्डै १० करोड भारु कलेक्सन गर्दै एक सय करोड क्लब प्रवेश गरेको थियो । केही सातापछि नै आयुष्मान अभिनीत ‘बधाई हो’ ले पनि व्यावसायिक, समीक्षात्मक दुवै हिसाबमा सफलता पाएको थियो ।

दुई साताअघि चीनमा रिलिज गरिएको ‘अन्धाधुन’ ले हालसम्म २ सय २० करोड भारु कमाइ गरिसकेको छ । यसअघि आमिर खानका केही छानिएका फिल्मले मात्रै चिनियाँ दर्शकलाई रिझाउन सकेका थिए । आयुष्मान खुरानाको फिल्मले चीनमा पाएको सफलतालाई यति बेला भारतीय मिडियाले समेत ‘अप्रत्याशित’ भनी टिप्पणी गरेका छन् ।

भारतीय फिल्मका ट्रेड एनालिस्ट तरण आदर्शले ‘लगातार अचम्भित पारिरहेको’ भनी टीट गरेका छन् । उक्त फिल्मले भारतभरबाट गरेको कमाइ चीनबाट मात्र ६ दिनमा उठाएको थियो । फिल्ममा आयुष्मानले दृष्टिविहीन युवकको भूमिका निर्वाह गरेका छन् भने तब्बुले खलपात्रको भूमिका निर्वाह गरेकी छन् । खासगरी फिल्मको चुस्त पटकथालाई लिएर समीक्षकले प्रशंसा गरेका थिए ।

फिल्मका लागि चीन हलिउडपछिको ठूलो बजार हो । चिनियाँ बक्सअफिसमा सर्वकालीन सर्वाधिक कमाइ गर्ने दश फिल्ममध्ये दुई हलिउड ‘द फेट अफ द फ्युरिअस’ र ‘फ्युरिअस सेभेन’ पनि परेकाछन् । आमिर खान स्टारर ‘दंगल’ चिनियाँ बक्सअफिसमा सर्वाधिक कमाइ गर्ने फिल्मको३६ औं स्थानमा छ ।

त्यसभन्दा अघि हलिउड फिल्म ‘अवतार’ छ । चीनमा आमिरकै ‘सेक्रेट सुपरस्टार’ देखि ‘हिन्दी मिडियम’, ‘बाहुबली २’, ‘बजरंगी भाइजान’, ‘टाइलेट एक प्रेमकथा’ ले पनि उल्लेख्य दर्शक साथ पाएका थिए । सुपरस्टारको यस पंक्तिमा यति बेला आयुष्मान पनि थपिएका हुन् । लगालग दुई सफल फिल्म दिएका आयुष्मान भन्छन्, ‘मेरा लागि यो वर्षौंदेखिको सपना हो । कलाकार हुनुका नाताले म सधैं फिल्मको विषयवस्तुलाई सर्वोच्च मान्छु । र, म सधैं पृथक खालका फिल्म नै छान्न रुचाउँछु किनभने ती फिल्मले निकै मनोरञ्जन दिनुका साथै गतिला फिल्म पनि हुन् ।’

कतिपयले भने त्यस्ता फिल्मले गतिलो व्यापार नगर्ने हुँदा खेले पनि कहिल्यै स्टार बन्न नसक्ने भनी तर्साइरहन्थे । ‘तर आज कलाकार भएरै खेलेका मेरा फिल्मले पनि विश्वव्यापी रूपमा गतिलो गरिरहेका छन्,’ आयुष्मानले भनेका छन् । त्यसो त यसअघि पनि आयुष्मानको डेब्यु फिल्म ‘विक्की डोनर’ देखि ‘बरेली की बर्फी’, ‘शुभ मंगल सावधान’ सबैले दर्शकमा गतिलो छाप छाड्न सफल भएका थिए । ‘मेरा लागि, यो यात्राको सुरुवात मात्रै हो ।

म यस्ता पृथक विषयवस्तु भएका फिल्म खेलेरै दर्शकको मन जित्दै च्याम्पियन बन्न चाहन्छु,’ अभिनेता खुरानाले बक्सअफिसबाट पाएको सफलताले आफूलाई थप जिम्मेवार बनाएको बताए । उनका यस वर्ष दुई फिल्म ‘ड्रिमगर्ल’ र ‘आर्टिकल १५’ रिलिज हुनेछन् ।

प्रकाशित : वैशाख ८, २०७६ ०८:१५
पूरा पढ्नुहोस्
प्रतिक्रिया
पठाउनुहोस्