सिञ्जालीको मीरा बाई

आख्यानकार भुवनहरि सिग्देलले पोखरामा उपन्यासको लोकार्पण गरे ।

उनले ‘मीरा’ मा दर्शनको पाटो सशक्त रहेको बताए । उपन्यासकारको भाषिक कला नयाँ खालको देखिएको भन्दै उनले अझै सजग भएर अघि बढ्न सुझाव दिए । कृतिको समीक्षा गर्दै पत्रकार दीपक सापकोटाले उपन्यासको फयाक्ट्रीबाट उत्पादितमध्ये ‘मीरा’ ले सम्भावनाको संकेत गरेको टिप्पणी गरे ।

‘मीरा बाई र सिञ्जालीको उपान्यासकी पात्र मीराको बीचमा तालमेलचाहिँ छैन,’ सापकोटाले भने, ‘मानिस बाँचिरहेको समाजमा भइरहेका अनेक घटना र परिघटनाले उद्वेलित मीरा गहिरो आत्ममन्थनमा पुग्न खोजेकी छन् ।’ समीक्षक उपेन्द्र पौडेलले ‘मीरा’ सरल नभई जटिल प्रेमकथा भएको बताए । परम्परागत समाजले पचाउन नसक्ने विषयमा उपन्यास लेख्ने साहस दीपकले गरेको उनको भनाइ थियो ।

सिञ्जालीले संघर्ष गरेर पनि मानिस बाँचिरहेको हुन्छ भन्ने उपन्यासमा देखाउन खोजेको प्रस्टयाए । ‘हाडनाता सम्बन्धजस्ता कुरालाई पञ्चभलाद्मी बसेर मिलाउने सामाजिक न्याय व्यवस्था ठीक होइन भन्ने देखाउने प्रयास छ’, उनले भने, ‘प्रेम, सामाजिक न्यायलगायत विषयमाथि उपन्यास केन्द्रित छ ।’

आख्यानकार गनेस पौडेलले दीपकको उपन्यास परिपक्व देखिएको भन्दै स्थापित लेखक हुन सक्ने क्षमता दीपक सिञ्जालीमा भएको दाबी गरे । पोखरेली युवा सांस्कृतिक परिवारले उपन्यास लोकार्पण को चाँजोपाँजो मिलाएको हो ।