‘अस्वीकृत विचारक’ को सम्झना

कान्तिपुर संवाददाता

काठमाडौँ — ‘अस्वीकृत विचार साहित्य’ का एक प्रवर्तक डा. कविताराम श्रेष्ठको ४५ औं स्मृति दिवसमा मंगलबार श्रद्धाञ्जलीसभा गरिएको छ । शुभचिन्तकहरूले गरेको कार्यक्रममा उनको साहित्यिक, सांस्कृतिक एवं सामाजिक योगदानबारे चर्चा गरियो । 

ओखलढुंगामा २००४ माघ ११ मा जन्मिएका श्रेष्ठ ७ वर्षदेखि बेलायतमा बस्दै आएका थिए । क्यान्सर लागेर लन्डनमा उपचाररत उनको मंसिर ३ मा उहीं निधन भएको थियो । उनका २८ वटा साहित्यिक कृति प्रकाशित छन् । पाँचवटा सहलेखन गरेका छन् । ओखलढुंगाबाट प्रकाशित हुने ‘जुनकिरी’ हस्तलिखित म्यागाजिनमा विसं २०१७ मा पहिलो निबन्ध ‘वनमारा’ निकालेका उनको अन्तिम पुस्तक लन्डनबाट ‘लाइट अफ हिमालय’ शीर्षकमा छापिएको थियो ।
कविताराम सहितको ‘अस्वीकृत विचार साहित्य’ ले जर्जर समाजविरुद्ध कडा आवाज प्रस्तुत गर्दै आएको छ । ‘साहित्यिक विकासका लागि बुट पालिस अभियान’ पनि उनकै टोलीले चलाएको थियो । उनी स्कटल्यान्डको अबर्डिन मेडिकल स्कुलका भिजिटिङ प्रोफेसर थिए । उनकै संयोजकत्वमा ओखलढुंगा सदरमुकाममा युगकवि सिद्धिचरण श्रेष्ठको सालिक निर्माण गरिएको थियो । र, सिद्धिचरणको ‘मेरो प्यारो ओखलढुंगा’ नामक कवितालाई सार्थक तुल्याउन कवितारामले २०६७ मा त्यही नामको पुस्तक प्रकाशन गरेका थिए । श्रद्धाञ्जली कार्यक्रममा पूर्वसांसद रामहरि खतिवडा, सीमाविद् बुद्धिनारायण श्रेष्ठ, साहित्यकार प्रेमनारायण प्रेमी, कवि शैलेन्द्र साकार, पत्रकार चेतनाथ धमला, कोमल राजभण्डारी, रामविनय श्रेष्ठ, भीमप्रसाद श्रेष्ठ, विन्दिया प्रधान, धनकुमार श्रेष्ठलगायतले श्रेष्ठका योगदानबारे बोलेका थिए ।

प्रकाशित : पुस २०, २०७४ ०७:४९
प्रतिक्रिया
पठाउनुहोस्

उत्तर कोरियाले खोल्यो दक्षिणसँगको हटलाइन

सोल — उत्तर कोरियाले दक्षिण कोरियासँगको हटलाइन सेवा पुन: सुरु गरेको छ । नेता किम जोङ उनको आदेशपछि बन्द गरिएको उक्त सेवा दुई वर्षपछि सुचारु गरिएको हो । दक्षिण कोरियाले बुधबार स्थानीय समयअनुसार दिउँसो साढे ३ बजे उत्तरबाट आएको कल रिसिभ गरिएको जनाएको छ ।

उत्तर र दक्षिण कोरियाको सीमावर्ती गाउँ पानमनजोमस्थित हटलाइन ।

तर तत्कालै सम्पर्कविच्छेद भएको दक्षिण कोरियाली अधिकारीले बताएका छन् । प्योङचाङमा हुने हिउँदे ओलम्पिकमा आफ्नो टोली पठाउने विषयमा छलफल गर्न उत्तरले हटलाइन खोलेको जनाइएको छ ।
उत्तर कोरियाको ‘शान्तिपूर्ण पुन: एकीकरण समिति’ का अध्यक्ष री सन गोनले किम जोङ उनका तर्फबाट बोलेको भन्दै हटलाइन सेवा सुचारु गर्ने घोषणा टेलिभिजनमार्फत गरेका थिए । केसङ औद्योगिक कम्प्लेक्सका विषयमा भएको विवादपछि उत्तर कोरियाले सीमावर्ती पानमनजोममा १९७१ मा स्थापित हटलाइन बन्द गरेको थियो । हटलाइन सेवा पुन: खोलिएपछि दक्षिण कोरियाले सकारात्मक प्रतिक्रिया दिएको छ । राष्ट्रपति मुन जे इनका प्रेस सेक्रेटरीले हटलाइन सुचारु हुनु महत्त्वपूर्ण भएको जनाएका छन् । ‘यसले सधैंभरि सञ्चार सम्पर्क हुने वातावरण सिर्जना गर्छ,’ उनले भने ।
दक्षिण कोरियाली सञ्चारमाध्यमले भने नयाँ कदमलाई शंकाको दृष्टिले हेरेका छन् । ‘जुङआङ इल्बो’ अखबारले प्योङयाङले अर्को आणविक कार्यक्रम पूर्ण नभएसम्म समय बिताउने हिसाबले प्रयोग गरेको हुन सक्ने उल्लेख गरेको छ । तर किमले नयाँ वर्षका अवसरमा गरेको सम्बोधनले शान्तिको ढोका खोलेको पनि अखबारले लेखेको छ । दक्षिण कोरियाको एकीकरण मन्त्रालयका अनुसार दुई कोरियाबीच ३३ वटा हटलाइन छन् ।

‘सम्बन्ध सुधार्ने अवसर’
उत्तर कोरियाली नेता किम जोङ उनले नयाँ वर्षको सम्बोधनमा दक्षिण कोरियासँग वार्ता सुरु गर्ने जनाउँदै अर्को महिना सोलमा हुने हिउँदे ओलम्पिकमा आफ्नो टोली पठाउने जनाएका थिए । जनताबीचको एकता देखाउने यो राम्रो अवसर हुने उनले बताएका थिए । दक्षिण कोरियाले पनि हिउँदे ओलम्पिकमा उत्तर कोरियाको सहभागितालाई स्वागत गर्ने संकेत गरिसकेको छ । किमको सम्बोधनको प्रतिक्रियामा दक्षिण कोरियाले उच्च स्तरीय वार्ता टोलीको प्रस्ताव गरेको छ ।

प्रकाशित : पुस २०, २०७४ ०७:४८
पूरा पढ्नुहोस्
प्रतिक्रिया
पठाउनुहोस्