नोबलको सहरमा नेपाली सान
काठमाडौं — साहित्य र अन्य विभिन्न क्षेत्रमा विशेष योगदान पुर्याउने संसारकै महान् व्यक्तित्वहरूलाई नोबल पुरस्कार वितरण गरिने स्विडेनको राजधानीमा पहिलोपटक नेपाली साहित्य, संस्कृति र रंगमञ्च एकसाथ प्रबद्र्धन भएको छ ।
विभिन्न ख्यातिप्राप्त नेपाली स्रष्टाहरूको तस्बिर प्रदर्शनी, नाटक मञ्चनदेखि कविता वाचनसमेतलाई समेटी नेपाल मण्डप (नेपाल कल्चरल एसोसिएसन अफ स्विडेन) ले स्टकहोल्म नेपाली कविता महोत्सव गरेको हो । नेपाल मण्डपका अध्यक्ष तथा रंगकर्मी सुवास अधिकारीका अनुसार महोत्सव सोचेभन्दा उत्साहबद्र्धक माहोलबीच सम्पन्न भएको थियो ।
रोचक के भने, वरिष्ठ कवि तथा गीतकार दिनेश अधिकारीले काठमाडौंबाट स्काइपमार्फत् प्रत्यक्ष कविता र सम्बोधन प्रस्तुत गरेर महोत्सवको उद्घाटन गरिएको थियो । ‘यो निकै रोचक र खुसीको कुरा हो कि आधुनिक प्रविधिको ढाड चढेर नेपाली साहित्य र संस्कृतिले विश्वयात्रा गरिरहेको छ,’ महोत्सव उद्घाटनपछि दिनेशले कान्तिपुरसँग खुसी साटे, ‘र, यसलाई जोड्ने र संयोजन गर्ने काम नेपाली डायस्पोराले गरिरहेको छ ।’ संसारभर फैलिन अहिले प्रविधिले निकै सहज बनाएको दाबी गर्दै यस्तै गतिविधिले नेपाली पहिचान संसारभर प्रबद्र्धन हुन सक्ने उनले दाबी गरे ।
स्काइपमार्फत् उद्घाटनलगत्तै पर्दामा देखिएका थिए कुमार नगरकोटी, श्यामल, विप्लप प्रतीक, विमला तुम्खेवा, मनु मञ्जिल, हेमन यात्री, सुदीप पाख्रिन, फूलमान वल, देवान किराँती, प्रदीप मेन्याङ्बो, राजेश विद्रोही, सन्तोष थेवे लगायतका कविहरू । नेपालमै भिडियो रेकर्ड गरेर ती कविता स्विडेन पुगेका थिए । अध्यक्ष सुवासका अनुसार यो सिलसिलालाई, अमेरिकाबाट दीपा राई पुन, इजरायलबाट भगवती बस्नेत, साउदी अरबबाट महेश श्रेष्ठ, नाइजेरियाबाट हिक्मत बस्नेत, बेलायतबाट गोपी सापकोटा र कृष्ण बजगाईंले जोडे । उनीहरूले पनि भिडियोमार्फत् नै कविता सुनाएका थिए । स्विडेनका नेपाली समुदायको प्रतिनिधित्व गर्दै भने शैलेश उपाध्याय, शिवकुमार चौंलागाईं, ब्रिजेश मैनाली र हेम रोकायले प्रत्यक्ष कविता सुनाए ।
‘महोत्सवको अर्को रोचक पक्ष नाटक थियो,’ सुवासले भने । नेपाली रंगमञ्चमा डेढ दशकदेखि क्रियाशील रहेर हाल स्विडेन बस्दै आएका सुवास स्वयंले कवि विप्लप ढकालको ‘म अज्ञात सहिद आएको छु’ कवितालाई नाट्य रूपमा मञ्चनमा उतारेका हुन् । समसामयिक नेपाली राजनीति र समाजलाई उतारिएको कवितालाई काव्य नाटकको रूपमा प्रस्तुत गर्दा स्विडेनका नेपाली मात्रै नभई विदेशी दर्शकका लागि पनि रोचक बनेको निर्देशक सुवासले दाबी गरे । नाटकमा भने उचित सिग्देल, ज्ञानु भण्डारी, दीप शर्मा, सोमा थापा अधिकारी, केशव प्याकुरेल, सुजाता चिमोरिया संग्रौला लगायतले अभिनय गरेका थिए । महोत्सवको नेपाल संयोजन शिल्पी थिएटरका घिमिरे युवराज र धरानका रंगकर्मी नवीन मेन्याङ्बोले गरेका थिए ।
