कान्तिपुर वेबसाईट
AdvertisementAdvertisement
२९.१२°C काठमाडौं
काठमाडौंमा वायुको गुणस्तर: ६५

मैदानमा अब नयाँ पुस्ता

यामल र बेलिङघमले प्रमाणित गरिसकेका छन्– विश्व फुटबल अब नयाँ पुस्ताको काँधमा छ
हिमेश

सके दक्षिण अमेरिकाले, सकेन भने युरोपले । विश्व फुटबलमा दबदबा यिनै दुई महादेशको त छ । संयोगले यिनै दुई महादेशको सबैभन्दा ठूलो आफ्नै प्रतियोगिता चलिरहेको छ । एउटा जर्मनमा– त्यो भयो, युरो २०२४ । अर्को भयो, कोपा अमेरिका २०२४ ।

मैदानमा अब नयाँ पुस्ता

त्यो भने अमेरिकामा भइरहेको छ । अब साता दिनभन्दा बढी समयपछि दुवैतर्फका नयाँ च्याम्पियन पनि पाउनेछौं । जुनसुकै टिमले जितोस्, एउटा तथ्य भने निश्चित छ, लियोनल मेसीले आफ्नो अन्तिम कोपा अमेरिका खेलिरहेका छन् । यता क्रिस्टियानो रोनाल्डो अन्तिम युरोमा भिडिरहेका छन् । आफ्नो जमानामा जत्तिकै राम्रो खेलाडी भए पनि उमेरसँगै त्यो नरहने त मेसी र रोनाल्डो दुवैले अहिले मज्जाले बुझिरहेकै होलान् ।

त्यसको अर्थ के हो भने यी दुई ठूला प्रतियोगिताको अन्त्यसँगै विश्व फुटबलमा एउटा अध्याय सकिनेछ । र, अहिले नै भन्न सुरु भएको छ, अब नयाँ पुस्ताको पालो । अब त्यस्ता केही खास खेलाडी देखिएका छन्, जसले अबको समय विश्व फुटबललाई हाँक्ने छन् । कोपामा त नयाँ अनुहारलाई लिएर त्यति धेरै हल्लीखल्ली मच्चिरहेको छैन, तर युरोमा भने कुरै नयाँ खेलाडीको छ । अनेक नयाँ खेलाडीले सबैको ध्यान आफूतिर खिचेका छन् । त्यसमा पनि त्यस्ता दुई नयाँ खेलाडी अगाडि आएका छन्, जसले अबका केही वर्ष विश्व फुटबलमा तहल्का मच्चाउने छन् । ठ्याक्कै नयाँ नामै चाहिँ होइन, किनभने युरोपतिरको फुटबल पछ्याउनका लागि दिन बिराएर आउने नाम नै हुन्, यी दुई ।

पहिलो भयो, स्पेनका लामिन यामल । अर्को इंग्ल्यान्डका जुड बेलिङघम । यी दुईले आफ्नै खुट्टामा बञ्चरो हानेनन् भने अबको दिनमा वाहवाही चल्ने उनीहरूकै हो । सबैभन्दा पहिले यामलकै कुरा । उनी बार्सिलोनाका विन्गर हुन् । सात आठ वर्षतिरै बार्सिलोनाको प्रसिद्ध एकेडेमीमा भर्ना भए । भर्खरै किशोर उमेरमा रमिरहेका छन्, तर नाम भने खुबै कमाइसकेका छन् । सन् २००७ मै मात्र हो, जन्मेका । त्यो अर्थमा १६ वर्षका भए । त्यसो त नाम सुन्ने बित्तिकै उनी स्पेनी खेलाडी जस्तो भने लाग्दैन । मोरक्काका बुबा र इक्वेटोरियल गुएनाका आमाबाट जन्मेका हुनाले उनी नामैले फरक सुनिन्छ । तर खेल्नै शैली उही ठ्याक्कै स्पेनी नै छ ।

उनलाई लिएर युरो अगाडि एउटा समाचार आएको थियो । यो समाचारभन्दा पनि सत्यमा आधारित हल्ला हो, जसले विश्व फुटबललाई प्रायः तरंगित बनाइरहन्छ । भयो के भन्दा पेरिस सेन्ट जर्मेन (पीएसजी) ले यी किशोरलाई किन्नका लागि २६ करोड ८० लाख डलर तिर्न आफू तयार रहेको बताएछन् । कतारी लगानी रहेको पीएसजीको आर्थिक हैसियत कति बलियो छ भने उसले जति बोल्यो, त्यति तिर्न पनि सक्छ । बार्सिलोनाले उनलाई बेच्न चाहेन, कुरा यस्तै आएको छ । तर दुई पक्षबीच सहमति भएको भए, यामल विश्व फुटबलकै सबैभन्दा महँगा खेलाडी हुने थिए । बार्सिलोनाको एकेडेमीमा पछिल्लो समय साह्रै धेरै सम्भावना भएका खेलाडी उत्पादन भएका छन् ।

त्यसमा यामलदेखि गाभी र पेड्री छन् । बार्सिलोना कति धेरै चलाख छ भने यामल जत्तिको खेलाडी अन्यत्र जाने हो भने करोडौं डलर तिर्नुपर्ने सर्त अनुबन्धमै राखेको छ । युरो चलिरहँदा यामलकै बढी चर्चा किन भन्दा एक त उनले एउटा कीर्तिमान बनाएका छन्, जसको धेरै अर्थ छ । स्पेनले क्रोएसियालाई हराएको खेलमा यामल युरो इतिहासमै यो प्रतियोगिता खेल्ने सबैभन्दा कान्छो खेलाडी बने । क्रोएसियाविरुद्धको त्यस खेलमा उनी खालि १६ वर्ष र ३ सय ३८ दिनका थिए । अनि त्यसै खेलमा एक गोलका लागि सहयोगी भूमिका पनि निभाए । यस्तोमा युरोकै इतिहासमा एसिस्ट निकाल्ने सबैभन्दा कान्छा खेलाडी पनि बने । उनले यसरी नै खेल्दै जाने हो भने नयाँ नयाँ कीर्तिमानमाथि कीर्तिमान बन्नेछ ।

उनको सबैभन्दा ठूलो विशेषता भनेकै ‘ड्रिब्लिङ’ हो । त्यो भनेको सक्दो छलाएर खेल्नुपर्ने । उनको खासमा खेल्ने पोजिसन भनेको राइट विन्गर हो । तर उनी सेन्ट्रल फरवार्डका रूपमा पनि खेल्न सक्छन्, अनि एटायकिङ मिडफिल्डरका रूपमा पनि । अनि उनको बढी चल्ने भनेकै बायाँ खुट्टा हो । उनी नेचुरल लेफ्ट फुटेट खेलाडी हुन् । बललाई घुमाउरो बाटो दिएर पोस्टको दिशा दिन्छन् । यो सबै कुरा सुन्दा अलिअलि मेसीकै गुण देखिन्छ । खासमा उनलाई मेसीसँगै तुलना गरिन्छ । मेसी पनि त बार्सिलोनाको एकेडेमीकै उत्पादन हुन् । यामलमाथि नेयमारको प्रभाव भने बढी छ भनिन्छ । नेयमारले पनि ठीक्कै समय बार्सिलोनाका लागि खेलेका छन् ।

स्पेनले सन् २००८ र २०१२ मा लगातार दुईपल्ट युरो जितेको थियो । त्यसबीच सन् २०१० मा विश्वकप पनि जित्यो । विश्व फुटबलमा त्यो स्पेनको युग थियो । स्पनले बलमाथि अत्यधिक नियन्त्रण र शृंखलाबद्ध पासको एउटा शैलीले त्यति बेला खेलेको थियो । त्यो अहिलेसम्म पनि लगभग चलिरहेकै छ । तर दुई युरो र एक विश्वकप उपाधिपछि स्पेनी फुटबल धेरै हदसम्म सेलायो । उसले ठूला प्रतियोगितामा थप चमत्कार गर्न सकेन, भलै यो एक शक्तिका रूपमा भने रह्यो । लगभग सेलाएकै स्थितिमा थियो, स्पेनी फुटबल । तर यामल र उनीका साथीहरूले स्पेनी फुटबलको पुनरुत्थान गर्ने विश्वास गरिएको छ, विशेषतः यामलमाथि धेरै विश्वास गरिएको छ ।

अब बेलिङघमको पालो । स्पेन जस्तै इंग्ल्यान्ड पनि विश्व फुटबलको शक्ति नै हो । अझ इंग्ल्यान्डको प्रिमियर लिग जत्तिको लोकप्रिय सारा विश्वमा अरू कुनै छैन । इंग्लिस फुटबलमा स्टार खेलाडीको कुनै कमी हुन्न । टिम पनि राम्रै हुन्छ । तर जित्ने भने केही होइन् । इंग्ल्यान्डले अहिलेसम्म जितेको एउटै ठूलो प्रतियोगिता भनेको विश्वकप हो, त्यो पनि सन् १९६६ मा । त्यसपछि एकपछि अर्को ठूला प्रतियोगिता आउँछ र जान्छ पनि । सुरुमा इंग्ल्यान्डमाथि ठूलै आस भरोसा गरिन्छ । तर अन्त्यमा निर्णायक मोडमा चुक्ने नै गर्छ । यस्तो कहिलेसम्म चलिरहने हो त ? विश्वास छ, ढिलो चाँडो इंग्ल्यान्डले केही जित्न सक्नेछ र यसको कारण हो, तिनै बेलिङघम जत्तिको खेलाडी ।

उनी भने २१ वर्षका भए, सन् २००३ मा जन्मेका हुन् । भर्खर जस्तो किशोर उमेर छाडेका खेलाडी । तर प्रदर्शन भने कोही पाका खेलाडी जत्तिकै । इंग्ल्यान्डकै खेलाडी भए पनि उनले प्रिमियर लिगमा खेल्दैनन्, स्पेनको रियल म्याड्रिडका लागि खेल्छन् । रियल आएयता उनले तहल्का नै मचाए । पछिल्लो सिजन उनले रियलका लागि दुई ठूला उपाधि जिते । पहिलो त स्पेनी ला लिगा नै भयो । त्यसपछि युरोपेली च्याम्पियन्स लिग पनि । त्यो सिजन त उनले रियलका लागि बबाल नै गरे । सन् २०२३ मै मात्र उनी रियल गएका हुन् । गएको सिजन नै आफूलाई प्रमाणित गरे, समर्थक सबैको प्रिय खेलाडी बने । त्यस अगाडि उनी जर्मनीमा थिए, बोरुसिया डर्टमुन्डका लागि खेलिरहेका थिए ।

उनी खेलाडीका रूपमा जन्मेको र हुर्केको भने बर्मिङघममा हो । शारीरिक रूपमा उनी तगडा छन् । बलमाथि अविश्वसनीय रूपमा नियन्त्रण राख्छन् । उनको खेलको सबैभन्दा ठूलो विशेषता भनेको जस्तै भूमिका खेल्न सक्ने हो, अलराउन्डरका रूपमा । ‘डु इट अल मिडफिल्डर’ एउटा नयाँ शब्दावली जस्तै हो । त्यसको अर्थ हो, जस्तो जिम्मेवारी आइपुग्यो, मिडफिल्डमा त्यसै अनुसार खेल्ने । चाहिएको बेला आक्रमण गर्ने । अनि चाहिएको बेला डिफेन्समा पनि उत्रने । उनी साँच्चै कत्तिको खेलाडी हुन्, त्यसको बखान गर्न एउटा खेल र त्यसमा गरेको उनको एक गोलले पुग्छ । यसपल्टको युरोको अन्तिम १६ मा इंग्ल्यान्ड स्लोभाकियाविरुद्ध भिडेको थियो ।

त्यस खेलमा केही सेकेन्ड मात्र बाँकी छँदा इंग्ल्यान्ड एक गोलले पछाडि थियो । प्रतियोगिताबाट बाहिरिने संघारमा थियो । इंग्ल्यान्डका समर्थकले त्यो स्थितिलाई पछाउनै सकेनन्, त्यसैले खेल सकिन अगाडि नै रंगशाला छाडिसकेका थिए । तर त्यही केही अन्तिम सेकेन्डमा बेलिङघमले युरो इतिहासकै एक उत्कृष्ट गोल गरे । उनले ओभर हेड किकको मदतले पेनाल्टी एरियाबाट गोल गरेका हुन् । त्यसलाई हाम्रोतिर बाइसाइकल किक पनि भनिन्छ । यो गोललाई शब्दमा बयान गर्नुभन्दा भिडियो रिप्लेमै हेरेको राम्रो । यसको क्लिप सजिलै उपलब्ध छ । अनि यसलाई हेरिसकेपछि भन्न बाध्य हुन्छ, गोल हुनु त यस्तो । यति धेरै जबरजस्त गोल थियो, त्यो । अनि सार के हो भन्दा यामल र बेलिङघम जस्ता खेलाडीले प्रमाणित गरेका छैनन् र विश्व फुटबलमा नयाँ पुस्ता अगाडि आउँदै छ भनेर ?

प्रकाशित : असार २२, २०८१ १०:३७
प्रतिक्रिया
पठाउनुहोस्
जनताको राय

प्रधानमन्त्री र मन्त्रीहरूले आफ्नो सचिवालय गठन र सल्लाहकारहरू चयन गर्न थालेकाछन् । छनौटमा मुख्य रुपमा केलाई प्राथमिकता दिनुपर्छ ?

×