प्रश्नयुद्ध

जीवनका रिपुहरुसँग

युद्धरत प्रश्न

ओठ ओठमा झुन्डिएका

हिजोका निरुपाय सवाल

आज तिखोसँग उभिएका छन्

मानिस अप्रश्नेय भयो भने

कुँजो र जोखिमपूर्ण हविगतमा पर्छ

जीवनको लय

पुरातन प्रश्नहरुको अगाडि

थुपारिएको छ

एक डंगुर फोहोर जवाफको रास

गर्भैदेखि लिएर आएको

जाली लिखतनामाका बकवास

अथवा ‘उसजुनीको फल’

करार गरिएको

भ्रामक गरूड पुराण

तिमीसँग पुरातन फतुरको

जाली तमसुक होला

हामीसँग जीवनको मानक गुरूत्व छ

अनि म एकात्मा/अनेकात्मा

मसँग सिंगो संसार छ

मेरा प्रश्नमा सामेल मोर्चाहरुमा

ऐक्यबद्धताका हजारौं लस्करहरु छन्

तिम्रा प्रश्नहरु स्वयम्‌मा

विघटित समयका धूर्त मनोसंवाद हुन

मेरा प्रश्नहरुको सम्पूर्ण हिस्सामा

समस्त सृजनाको घर्षण

र तिम्रो खुनी वाचाल तर्कहरुको

प्रतिरोधका पंक्तिबद्ध लामहरु छन्

तिम्रो प्रश्नमा कुँदिएका

तिलस्मी अक्षरहरुका लागि

जोखिमपूर्ण छन्

मेरा प्रश्नहरुको यक्षस्तम्भ

मेरो विचारको आविस्कारसँगै

मसँग ज्वलन्त प्रश्नहरु खडा छन्

र तिमीले बन्द गरेको हरेकद्वारमा

जीवनका अर्थपूर्ण आक्रोशको पंक्ति छ

र सत्ता विघटनको संकटमा

जलिरहेछन् तिम्रा वाचिक घोषणाहरु

मेरा प्रश्नहरुको समूल सौन्दर्यमा

जगत्‌को सत्य मुस्कान छ

तिम्रा प्रश्नहरुको धूर्त तर्कशास्त्रमा

फरेवको पुलिन्दा मक्किएको छ

कदापि मेल खाँदैन

मेरो भाष्यको दस्तावेज

अनेक प्रश्नहरु छन्

मानिसहरुका बीचमा युद्धरत

युगौंदेखि जमठ भएर बसेको

आदिम प्रश्न !!

आदिम उत्तर !!