यातनागृह

संसारकै एउटा

निर्मम ठाउँ हो यातनागृह

जसलाई मन पर्दैन

प्रेमको शब्द

जीवनको सौन्दर्य

स्वतन्त्रताको गीत ।

लाग्छ,

यातनागृहमा

उज्यालो निषेधित छ

खुसी निषेधित छ

आवाज निषेधित छ

कोही यहाँबाट छुट्कारा पाउन

कि बन्नुपर्छ बत्तीको पुतली

कि त कुर्नुपर्छ भयानक मृत्यु

कि त सुरूङ खनेर पुग्नुपर्छ सडकको छातीसम्म

कि त झोस्नुपर्छ घामले आाखा नखोल्दै

तानशाहको महलमा आगो ।

यो कुरा कहिल्यै नबिर्सनू

यातनागृहमा भूतहरु बस्छन्

र उडाइरहन्छन् हाम्रो सात्तो ।