खेलाडी : भान डाइकको वर्ष

मार्च २०१८ को त्यो खेलपछि प्रिमियर लिगमा लगातार ५० खेलसम्म भान डाइकलाई कसैले उछिन्न सकेका थिएनन् । उनको त्यो कीर्तिमानलाई आर्सनलका नयाँ फरवार्ड निकोलस पेपेले अघिल्लो साता पूर्णविराम लगाइदिए । भलै, आर्सनलमाथि लिभरपुलले ३–१ को जित निकालेको थियो । प्रिमियर लिगकै अर्को खेलमा लिभरपुलले बर्नलीलाई ३–१ ले हरायो । तर, त्यसमा योर्गेन क्लोपको टिमले हात पारेको जितभन्दा बढी भान डाइकलाई जे रोडरिग्वेजले ड्रिबल गर्दै उछिनेको क्षणको बढी चर्चा भयो ।

भान डाइकले सोमबार मात्रै युनियन अफ युरोपियन फुटबल एसोसिएसन्स (यूईएफए) को वर्ष खेलाडीको अवार्ड जिते । उनले बार्सिलोनाका अर्जेन्टिनी कप्तान लियोनल मेसी र पोर्चुगलका क्रिस्टियानो रोनाल्डोलाई पछाडि पार्दै सन् २०१९ को युरोपकै सर्वोत्कृष्ट फुटबल खेलाडीको अवार्ड हात पारेका हुन् । उनी यो अवार्डको हकदार भएको धेरैले बताए । इंग्ल्यान्डका पूर्वडिफेन्डर रियो फर्डिनान्डले भने त्यो अवार्डका लागि भान डाइक सही खेलाडी नभएको दाबी गरे । ‘भान डाइक विश्वकै उत्कृष्ट डिफेन्डर हुन् । त्यो सिजन ५० गोल गर्ने पनि छन्, जुन सधैं हुन्न र त्यस्तै खेलाडीले अवार्ड पाउनुपर्छ,’ उनले भनेका छन् । लियोनल मेसीले गएको सिजन ५१ गोल गरेका थिए । तर, उनको टिम (बार्सिलोना) ले स्पेनी ला लिगाको उपाधि मात्रै जित्यो । कोपा डेल रे र च्याम्पियन्स लिगमा सफलता हात पार्न सकेन । उनको नेतृत्वमा रहेको अर्जेन्टिना कोपा अमेरिकाको फाइनल पनि पुग्न सकेन । दशकयता अवार्डहरूमा मेसीका प्रतिस्पर्धी रहेका क्रिस्टियानो रोनाल्डोले युभेन्ट्सबाट इटालियन सिरी ‘ए’ को उपाधि जिते । आफ्नो कप्तानीमा पोर्चुगललाई यूईएफए नेसन्स लिगको उपाधि पनि दिलाए । तर, उनको व्यक्तिगत प्रदर्शन पहिलाजस्तो रहेन । उनले २०१८–१९ को क्लब फुटबलमा २८ गोल मात्रै गरे । त्यसैले उनको बढ्दो उमेरलाई अवार्डको प्रतिस्पर्धामा छुट दिन मिल्दैन ।

डच सेन्टर–ब्याक भान डाइकले ३०५ अंक हासिल गर्दै ‘यूईएफए प्लेयर अफ द इयर २०१९’ को अवार्ड जितेका हुन् । उनका नजिकका प्रतिस्पर्धीहरू मेसीले २०७ र रोनाल्डोले ७४ अंक पाए । गत वर्ष यो अवार्ड विश्वकपमा सनसनी मच्चाउँदै क्रोएसियालाई फाइनल पुर्‍याएका मिडफिल्डर ल्युका मोडरिचले जितेका थिए । उनले रियल मड्रिडलाई कीर्तिमान १३ औं पल्ट युरोपेली च्याम्पियन बनाउन पनि योगदान गरेका थिए । सन् २०११ मा सुरु भएको ‘यूईएफए प्लेयर अफ द इयर’ अवार्ड मोडरिचअघि रोनाल्डो (३ पल्ट), लियोनल मेसी (२), फ्रांक रिबेरी (१) र आन्द्रेस इनिस्टा (१) ले हात पारेका थिए । युरोपेली वर्ष खेलाडी घोषित हुने पहिलो डिफेन्डर हुन्, भान डाइक । गत सिजन लिभरपुल ९७ अंक जोडेर पनि प्रिमियर लिगको उपाधि नजित्ने पहिलो टिम भएको थियो । उसलाई पेप ग्वार्डिओलाको म्यानचेस्टर सिटीले ट्रफी छुनै दिएन । लिग कप र एफए कप पनि जितेन । च्याम्पियन्स लिगमा भने सनसनीपूर्ण प्रदर्शन गर्दै योर्गेन क्लोपको टिम छैटौंपल्ट युरोपेली च्याम्पियन भयो । त्यस क्रममा भान डाइकको प्रदर्शन वास्तवमै उत्कृष्ट रह्यो ।

च्याम्पियन्स लिगको अन्तिम १६ मा जर्मन महारथी बायर्न म्युनिखविरुद्ध हात पारेको ३–१ को जितमा भान डाइकले एक गोल गर्दै अर्को गोलमा अन्तिम पास दिएका थिए । सेमिफाइनलको पहिलो लेगमा लिभरपुललाई बार्साले ३–० ले पछाडि पारेको थियो । दोस्रो लेगमा स्टारहरू मोहमद सलाह र रोबर्टो फिरमिनो चोटको कारण खेल्न नसक्ने भए । तर, एन्फिल्डमा चकित पार्दै लिभरपुलले ४–० को जित रच्यो । डिभोक ओरिगी र जजिर्नियो विजनाल्डम २–२ गोल गर्दै हिरो भए । त्यसमा मेसी र लुइस स्वारेजलाई रोक्ने काम गरेका थिए, भान डाइकले । उनी बार्साविरुद्ध प्रतिघण्टा ३४.५ किम दौडिएको तथ्यांक यूईएफएले सार्वजनिक गरेको छ । मड्रिडमा लन्डन क्लब टोटेनमविरुद्ध २–० को जित निकाल्दै ‘रेड डेभिल्स’ ले ट्रफी उचाल्दा उनी ‘म्यान अफ द फाइनल’ चुनिएका थिए ।

२८ वर्षीय भान डाइकले प्रिमियर लिगमा मात्र होइन, युरोपेली च्याम्पियन्स लिगमै पनि स्टार स्ट्राइकरहरूलाई चुप लगाएका छन् । उनले किभमा भएको च्याम्पियन्स लिग २०१८ को फाइनलमा रोनाल्डोलाई खुलेर खेल्ने अवसर नै दिएका थिएनन् । तर, गोलकिपर लोरिस कारियसको गल्तीको फाइदा उठाउँदै रियल च्याम्पियन भएको थियो । त्यो सिजन भान डाइकका लागि लिभलरपुलमा ‘हाफ सिजन’ थियो । किनभने उनी जनवरी २०१८ मा मात्रै एन्फिल्ड सरुवा भएका थिए । ‘फुल सिजन’ खेल्दा उनले लिभपुललाई युरोपेली च्याम्पियन बनाउन महत्त्वपूर्ण भूमिका निर्वाह गरे । यूईएफए सुपरकपमा चेल्सीविरुद्धको जित पनि छ । आफ्नो कप्तानीमा नेदरल्यान्ड्सलाई यूईएफए नेसन्स लिगको फाइनल पुर्‍याएका उनी ‘यूईएफए प्लेयर अफ द इयर’ मात्रै चुनिएनन्, प्रोफेसनल फुटबलर्स एसोसिएसन (पीएफए) को ‘प्लेयर अफ द इयर’ पनि भए । प्रिमियर लिग प्लेयर अफ द सिजन (२०१७–१८) पनि चुनिए र यो अवार्ड जित्ने उनी भिन्सेन्ट कोम्पनी (२०११–१२) यताका पहिलो डिफेन्डर हुन् । भान डाइक अन्तर्राष्ट्रिय फुटबल महासंघ (फिफा) को वर्षका उत्कृष्ट खेलाडीको अवार्ड (द बेस्ट फिफा फुटबल अवार्ड २०१९) मा रोनाल्डो र मेसीसँगै तीन खेलाडीको सूचीमा पनि छन् । विश्व फुटबलकै प्रतिष्ठित अवार्ड बालोन डि’अरको समय पनि नजिकिँदै छ । विश्वकप २००६ विजेता इटालीका डिफेन्डर फावियो कानाभारोले त्यस वर्ष फिफा र बालोन डि’अर जितेका थिए । उनीपछि यी प्रतिष्ठित अवार्ड जित्ने पहिलो डिफेन्डर हुन सक्छन्, भान डाइक । विश्वका उत्कृष्ट खेलाडीको अवार्डमा रोनाल्डो–मेसीको एक दशक चलेको होडलाई मोडरिचले ‘ब्रेक’ गरिदिए । यसपालि अवार्ड जितेर भान डाइकले अर्कोपल्टलाई सबैका लागि खुला गर्न सक्छन् ।

विलेम दोस्रो एकेडेमीबाट हुर्किएका भान डाइक पहिलो श्रेणीको डच क्लब ग्रोनिन्गेन (२०११–१३), स्कटिस प्रिमियर लिगको सेल्टिक (२०१३–१५), इंग्लिस प्रिमियर लिग क्लब साउथ ह्याम्पटन (२०१५–१७) हुँदै लिभरपुल आइपुगेका हुन् । सेल्टिकमा छँदा दुवै सिजन स्कटिस प्रिमियरसिप जितेका उनले साउथ ह्याम्पटनलाई २०१७ मा लिग कपको फाइनल पुर्‍याउन महत्त्वपूर्ण योगदान गरेका थिए । तर, चोटको कारण उनले म्यानचेस्टरविरुद्धको उपाधि होड गुमाएका थिए । उनलाई त्यसअघि नै लिभरपुलले अनुबन्ध गर्न चाहेको थियो । त्यो प्रयास अवैध भएको आरोप पनि लाग्यो । तर, चर्चा भएको डेढ वर्षपछि लिभरपुलले भान डाइकलाई एन्फिल्डमा स्वागत गर्‍यो ।

६ फिट ४ इन्च अग्ला भान डाइक शारीरिक रूपमा निकै बलिया छन् । डिफेन्समा उनको नेतृत्वको सबैले प्रशंसा गरेका छन् । एरियल बलमा पनि उनको प्रदर्शन उत्कृष्ट हुने गर्छ । सटीक पासका लागि उनी माहिर छन् । इंग्ल्यान्ड आगमनसँगै उनको ट्याक्टिकल पक्षमा सुधार भएको बताइन्छ । आदर्श सेन्टर–ब्याकको रूपमा स्थापित उनी मैदानमा अलराउन्डजस्तै देखिन्छन् । सजिलो मानिएको खेलमा आफ्नो पोजिसन छाडेर अगाडि बढ्नु उनको कमजोरी हो । उनी नियमित गोल गर्ने डिफेन्डर हुन् । त्यसैले उनका लागि लिभरपुलले साउथ ह्याम्पटनलाई ७ करोड ५० लाख पाउन्ड बुझाएको थियो । डिफेन्डर स्थानान्तरणको विश्व कीर्तिमान थियो त्यो । त्यो कीर्तिमानलाई ह्यारी म्यागुएरलाई ८ करोड पाउन्डमा लेस्टरबाट भित्र्याएर म्यानचेस्टर युनाइटेडले तोडिदियो । तर, मैदानमा म्युगुएरको तुलना भान डाइकसँग गर्ने बेला भएको छैन ।
Twitter : @rghising