बालमैत्री पुस्तकहरु

आन्विका गिरीले यस्तै सुझाव लेख्नुभएको छ– आफ्नो कथा पुस्तक ‘सानीका ज्ञानी कुरा’ मा । यो कथामा बाल यौन दुर्व्यवहारबारे लेखिएको छ । कथाकार गिरीका चारवटा बाल पुस्तक बजारमा आएका छन् । यी किताबमा तिमीहरूलाई मन पर्ने रंगीन चित्र, कथा, नाटक र कविता छन् ।

अर्को सचित्र बालकथा हो– ‘हाम्रो कुरा पनि सुन्नुस्’ । यसमा सातवटा बालमैत्री कथा छन् । विवाह, ब्रतवन्ध, पूजा आदिमा बालबालिकालाई पनि खान मिल्ने चिल्लो पिरोरहित परिकार बनाउनुपर्नेमा आवाज उठाइएको छ । बालबालिकाको पनि कुरा सुन्नुपर्ने, कुनै पनि चिज बनाउँदा उनीहरूले भेट्छन् कि भेट्दैनन् सोचेर निर्माण गर्न लेखक कथामार्फत् आग्रह गर्छिन् । जस्तै ः किताब राख्ने दराज, डेस्क बेन्च, धाराको टुटी आदि ।

‘ठूलो मान्छे कसरी बन्ने ?’ राम्राराम्रा चित्र समेटिएको बालनाटक हो । अनुशासित भएर बाँच्नु नै जिन्दगीको आधार हो । अरूका पनि कुरा सुन्दा, समस्या परेको बेला सहयोग गर्दा, सबैलाई माया गर्दा ठूलो मान्छे बन्न सकिने रहेछ । किताब पढेर तिमीहरू पनि यस्तै कुरा सिक है ।
‘आमाले सक्नुहुन्छ ?’ पुस्तकमा आमाको महत्त्वबारे लेखिएको छ । अवसर पाएमा आमाहरूले पनि काम गरेर छोराछोरीको पढाइका लागि आर्थिक जोहो गर्न सक्छन् भन्ने सन्देश यो किताबभित्रका कथाले दिने छन् । पारिवारिक मेलमिलापको महत्त्व पनि बुझाइएको छ । गिरीका यी चारै पुस्तक सांग्रिला बुक्सले प्रकाशित गरेको हो ।
बालिका थपलिया