म पनि स्कुल जाने हो
आजदेखि म पनि, स्कुलमा जाने हो,कापी–किताब राखेर, झोला पनि लाने हो ।
बजारबाट ल्याएको, नयाँ नाना लाउने हो,
जुत्ता–मोजा लाएर, सधैं स्कुल आउने हो ।
हात–गोडा धोएर, लामा नङ काटेर,
चट्ट पर्छु म पनि, शिरमा रिबन बाटेर ।
कति राम्रा कथा छन्, नेपालीको किताबमा,
म त अझै जान्ने छु, अंग्रेजी र हिसाबमा ।
मेरी गुरुआमाले, गाउनुहुन्छ कविता,
फुरुफुरु बनेर, नाच्न थाल्छौं हामी त ।
विज्ञानको किताबमा, नौला नौला कुरा छन्,
सामाजिक पढ्दा त, कति मजा हुन्छ झन् ।
स्वास्थ्य पढ्दा जानेको, सफा हुनुपर्छ रे,
रोग लागे शरीरमा, ठूलो असर गर्छ रे ।
केआर ढकाल, शिक्षक
ज्ञानज्योति मावि, पोखरा–१६, छहरेपानी
प्रतिक्रिया