असारे झरी
बादल ओढी आएछ असार अँध्यारो बाटोमा,सुकेका बोट हरिया पार्न धर्तीको माटोमा ।
स्वागत गर्छन् गाएर गीत
कोइली चरीले,
पहाड मधेस हरिया हुन्छन्
असारे झरीले ।
आकाशे भेल पानीको खेल
देखिन्छ गाउँमा,
खोला र नाला झरना ताल
छ ठाउँ ठाउँमा ।
भ्यागुता पाहा पौडेर निस्के
खेतको आलीमा,
इन्द्रेणी टुक्रा झिकेर यौटा
रङ छर्न बालीमा ।
फुल्दैन फूल असार आई
नझरे वनमा,
झुल्दैन बाली नसरे असार
माटोको मनमा ।
सिकायो कसले असारलाई
आएर दर्किन,
मुर्झाइएका प्राणमा पानी
ल्याएर छर्किन ।
अनौठो लाग्छ सृष्टिको स्वरूप
देखेर मलाई,
असार महिना आएर जान्छ
गरेर भलाइ ।
शान्ति सापकोटा
धोबीघाट, ललितपुर
प्रतिक्रिया