जो सानैदेखि हौसिए...

सुबास हुमागाईं

काठमाडौँ — नेपाली राष्ट्रिय महिला फुटबल टोलीकी कप्तान रेनुका नगरकोटेले १५ वर्षकै उमेरदेखि राष्ट्रिय टोलीबाट डेब्यु गरेकी थिइन् । यसै साता सम्पन्न उपराष्ट्रपति महिला लिग फुटबल प्रतियोगितामा एपीएफले उपाधि जित्दा उनी प्रतियोगिताकै उत्कृष्ट मिडफिल्डर घोषित भइन् ।उनले राष्ट्रिय टोलीबाट खेलेको ८ वर्ष भइसकेको छ ।

उनले राष्ट्रिय टोलीमा स्थान बनाउन रौतहटको प्रतिनिधित्व गर्दै खेलेको एक प्रतियोगिता नै पर्याप्त थियो । विभागीय टोलीबाट नखेल्दै राष्ट्रिय टोलीमा स्थान बनाउने पछिल्लो दशकमा दुई खेलाडी मात्र छन् ।

रेनुकापछि दुई वर्षअगाडि रौतहटकै अञ्जना रानामगरले पनि सोही उपलब्धि हासिल गरिन् । रौतहटलाई त्यस वर्षको प्रधानसेनापति कपको फाइनलसम्म पुर्‍याउँदा उत्कृष्ट प्रदर्शन गरेकी अञ्जनाले राष्ट्रिय टोलीबाट पहिलो सहभागितामै डेब्यु पनि गरिन् । उनले पनि १५ वर्ष छँदै राष्ट्रिय टोलीको जर्सी लगाउने अवसर पाएकी थिइन् । हाल उनी त्रिभुवन आर्मी क्लबको पहिलो रोजाइको गोलरक्षकका रूपमा खेलिरहेकी छन् । राष्ट्रिय टोलीमा पनि उनले पहिलो रोजाइकी गोलरक्षक एन्जिला तुम्बापो सुब्बालाई पहिलो रोजाइमा पर्न कडा चुनौती दिइरहेकी छन् ।

हाल नेपालको राष्ट्रिय टोलीमा युवा खेलाडीहरू आउने क्रम जारी छ । मञ्जली तामाङ र सरु लिम्बू पनि अहिले १८ वर्ष पुग्दै छन् । दुवै खेलाडी केही वर्षअघिसम्म विद्यालयस्तरको प्रतियोगितामा व्यस्त देखिन्थे । गोलरक्षक एन्जिला पनि सानो उमेरमै राष्ट्रिय टोलीबाट खेल्दै आएकी हुन् ।


गत साता सम्पन्न राष्ट्रिय लिगमा रौतहटले विभागीय टोली नेपाल पुलिस क्लबलाई पनि पराजित गरेको थियो । विभागीय टोलीविरुद्ध लिगमा रौतहटको यो नै पहिलो जित थियो । प्रशिक्षक नुरराज काफ्ले लगातार मिहिनेत गरेको कारण नै यस्तो सफलता हात लागेको बताउँछन् । ‘यसअघि नकआउट प्रतियोगितामा विभागीय टोलीलाई हराए पनि लिगमा पहिलोपटक सफल भयौं । हामीले गरेको नियमित प्रशिक्षणका कारण हाम्रो पहिलो चरणको प्रदर्शन राम्रो भएको थियो । लिगमा पनि त्यसलाई निरन्तरता दिएका दियौं,’ उनले भने ।

रौतहटले लिगमा तेस्रो स्थान हात पार्दै ५० हजार रुपैयाँ पुरस्कार प्राप्त गर्‍यो । यस क्रममा रौतहटले काठमाडौंलाई ४–० र पुलिसलाई १–० ले पराजित गर्‍यो । आर्मी र एपीएफविरुद्ध पराजित भए पनि टोलीको प्रदर्शन प्रशंसनीय रहयो । युवा खेलाडीले भरिपूर्ण रौतहटले अनुभवी खेलाडीको वर्चस्व रहेका विभागका टोलीलाई खुलेर खेल्न दिएनन् । रौतहटकी युवा फरवार्ड रश्मिकुमारी घिसिङले प्रतियोगिताको उत्कृष्ट फरवार्डको उपाधि हात पारिन् । १६ वर्षीय रश्मिले ट्रफीसँगै नगद १० हजार पनि पाइन् । शारीरिक रूपमा निपुण रश्मि विगत केही वर्षयता राष्ट्रियस्तरमा आफ्नो छाप बसाउँदै आएकी छन् । अब हुने यू–१८ उमेर समूहको प्रतियोगितामा उनले नै नेपालको आक्रमण सम्हाल्ने प्रबल सम्भावना रहेको छ ।

रश्मिसँगै यू–१८ को अन्तर्राष्ट्रिय प्रतियोगिता खेल्न एन्फाले खेलाडी छनोट गर्न सुरु गरिसकेको छ । देशभरका उत्कृष्ट खेलाडी जम्मा गरेर युवा टोली बन्ने गर्दछ । यस्तै युवा टोलीमा राम्रो प्रदर्शन गर्ने खेलाडी भविष्यमा राष्ट्रिय टोलीबाट खेल्ने अवसर पाउँछन् । सानो उमेरमै ठूलो प्रतियोगिता खेल्न पाउँदा खेलाडीको विकासमा पनि सहयोग पुग्छ । यसले उनीहरू सिनियर टोलीमा खेल्न पाउँदा थप सहज हुन्छ । नेपालकै फुटबल लिगलाई थप रोमाञ्चक बनाउन पनि यसले मद्दत गर्छ ।

नेपालले यसअघिका वर्षहरूमा १४ वर्षमुनिका प्रतियोगिता मात्र खेल्दै आएकोमा यस पटकबाट १६ र १९ वर्षमुनिका प्रतियोगिता पनि खेल्दै छ । यसले कम उमेरमा प्रतिभा बोकेका खेलाडीलाई अगाडि बढ्न सजिलो हुन्छ । विद्यालयस्तरमा राम्रो फुटबल खेल्ने खेलाडीले चाँडै राम्रो मौका पाए भने राष्ट्रका लागि पनि खेल्न पाउँछन् । विद्यार्थीले पढाइसँगै खेलकुदमा लागेर पनि राम्रो प्रगति गर्न सक्छन् ।

प्रकाशित : श्रावण २०, २०७५ ०८:२४
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

गायक साथी

राजाराम पौडेल

काठमाडौँ — अशोक विगतलाई भुलेर वर्तमानमा मिहिनेत गर्दै भविष्य राम्रो बनाउने ध्याउन्नमा छन् । किनकि उनले यस अगाडि धेरै दु:ख गर्नुपर्‍यो । पढ्ने, खाने र खेल्ने उमेरमा उनले आफैं संर्घष गर्नुपर्‍यो । साथीहरू मिलेर घरबाट टाढा सहरमा जाने, गीत गाउने, गीत गाएर आएको पैसाले आफ्ना केही रहर पूरा गर्ने र घरमा सहयोग गर्ने उनको दैनिकी थियो ।

गत आइतबार बालगायक अशोक दर्जी र आर्यन रेहन (एआर) बुढाथोकी पोखराको लेकसाइडमा भेटिए । उनीहरू लेकसाइडको होटल डयान्डिलेनमा ब्रेकफास्ट गर्दै थिए । उनीहरू छोटो समयमा नै मिल्ने साथी भइसकेका छन् । खाने क्रममा पनि एक–अर्कालाई सघाउँदै थिए । ब्रेकफास्टलगत्तै स्विमिङ पुलमा पौडिए । अशोकलाई पौडी खेल्न साह्रै मनपर्छ । उनीसँग गाउँमा हुँदा खोलामा पौडिएको अनुभव छ । उनलाई एआरले पौडी खेल्न साथ दिए । अशोकले पौडी खेल्न एआरलाई सिकाए पनि । दुवै जना मिलेर स्विमिङ पुलमा धित मरुन्जेल पौडिए । ‘गाउँको खोलामा भन्दा त स्विमिङ पुलमा रमाइलो लाग्यो,’ अशोकले प्रतिक्रिया दिए ।

अहिले अशोकका दोस्ती गायक टंक बुढाथोकीका छोरा एआर भएका छन् । एआर सांगीतिक क्षेत्रमा आएको केही समय भइसकेको छ । उनले हालसम्म ७ वटा गीत रेर्कड गराइसके । रुपै मोहनी, कसरी कसरी, रेलिमाई, माया पिरिमको, झिल्के, अल्लारे जोवनमा आदि गीतमा एआरले स्वर भरेका छन् । ६ वर्षका उनी एपल इन्टरनेसनल स्कुलमा १ कक्षामा पढ्छन् । उनीहरू दुवैजना अहिले मिल्ने साथी भएका छन् । आफूभन्दा सानो भएको कारण पनि अशोकले केही कुरा एआरलाई सिकाउँछन् । दुवैजना बालक भएकाले स–साना कुरामा जिद्दी गर्छन् । चकचक पनि गर्छन् । त्यही भएर उनलाई लिएर हिँड्दा एकजना साथी चाहिन्छ । उनीहरूको डिमान्ड पूरा गर्दै समाल्ने र सिकाउने काम टंकले गरिरहेका छन् । दुवैको सपना ठूलो कलाकर बनेर देशलाई चिनाउने छ । अशोक बोलिरहन मन पराउँछन् भने एआर कम बोल्छन् । बुबा टंक एआर रहमानबाट प्रभावित भएकोले नै छोराको नाम एआर जुराएका हुन् ।

पोखराको छोरेपाटनमा आयोजित डेविसफल सांगीतिक मेलामा आफ्नो प्रस्तुति राख्न उनीहरू पोखरामा आएका थिए । पोखरा विमानस्थलमा उनीहरू दुवै जनालाई आयोजकले स्वागत गर्दै कार्यक्रम स्थलसम्म पुर्‍याए । कार्यक्रम स्थलमा पुगेर उनीहरूले आफ्नो आवाजमा गीत सुनाउँदै दर्शकलाई मनोरञ्जन दिलाए । यसका लागि उनीहरूलाई गायक टंक बुढाथोकीले साथ दिएका थिए । यसअघि पोखराको मालेपाटनमा आयोजित मेलामा प्रस्तुति दिन उनीहरू पोखरा आएका थिए ।

झापाको दमक नगरपालिका वडा नं. २ भालुखोलाका अशोक दर्जी चर्चामा आएको तीन महिना भयो । विभिन्न कारणले गर्दा अशोकले आफ्नो पढाइलाई निरन्तरता दिन सकेका थिएनन् । अब भने उनले पढाइ र संगीतलाई निरन्तरता दिनेछन् । काठमाडौंको एक स्कुलमा यूकेजीमा भर्ना भएका छन् । अब उनले त्यही स्कुलको होस्टलमा बसेर अध्ययन गर्नेछन् ।
अशोक विगतलाई भुलेर वर्तमानमा मिहिनेत गर्दै भविष्य राम्रो बनाउने ध्याउन्नमा छन् । किनकि उनले यस अगाडि धेरै दु:ख गर्नुपर्‍यो । पढ्ने, खाने र खेल्ने उमेरमा उनले आफंै संर्घष गर्नुपर्‍यो । साथीहरू मिलेर घरबाट टाढा सहरमा जाने, गीत गाउने, गीत गाएर आएको पैसाले आफ्ना केही रहर पूरा गर्ने र घरमा सहयोग गर्ने उनको दैनिकी थियो । कलाकारितामा अगाडि बढ्ने सोच भए पनि कसरी कलाकार बन्ने भन्नेमा उनलाई थाहा थिएन । संर्घष गरिरहेका अशोकका बारेमा जब जानकारीहरू बाहिर आए । फेसबुक र युटयुबमार्फत उनको प्रतिभा आमदर्शकमाझ आइसकेपछि उनको चर्चा बढ्यो । एकाएक सेलेब्रिटी बने । गीत रेर्कड गर्न काठमाडांै झिकाइए । अनि रेर्कड भयो । ‘मनबिनाको धन ठूलो कि धनबिनाको मन’ । यो गीतले उनलाई चिनायो । युटयुबमा १ करोड २० लाखभन्दा बढी भ्युअर पाउन सफल भयो । यो गीतपश्चात् उनको प्रतिभाको तारिफ गर्नेहरू बढ्दै छन् । त्यसैले त युटयुबमा उनीसँग सम्बन्धित सामग्री पछिल्लो समय भाइरल भइरहेका छन् ।

यो अवधिमा अशोक मलेसिया र दुबईका कार्यक्रममा सहभागी भइसकेका छन् । उनी पोखरामा दुईपटक आइसके । काठमाडांै, झापाका कार्यक्रममा सहभागी बने ।उनीसँग घरमा रेडियो र मोबाइल थिएन । जति गीत सुने, गीतहरू गाडीमा बजेको, पसलमा बजेको, विभिन्न पार्टीमा बजेको, बाटामा हिँड्दा बजेको । यिनै गीत सुनेको आधारमा गीत सुनाउँथे । अब उनको आवाजलाई परिपक्व बनाउन साधनासँगै अगाडि बढ्न शिक्षाको जरुरत पर्ने भएकाले उनको ध्यान त्यतातर्फ मोडिएको छ । अहिले तत्काल गीत रेर्कड गर्ने तयारी नभए पनि एउटा गीत अभ्यास गरिरहेका छन् । अशोकलाई छोटो समयमा कमाएको दर्शकश्रोताको मायालाई निरन्तरता दिन चुनौती छ ।

प्रकाशित : श्रावण २०, २०७५ ०८:२४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT