पौडीवाज राशिका

नरेन्द्र रौले

राशिका पौडयालको स्वभाव अचम्मको छ । उनलाई पानी ‘आफन्त’ र ‘साथी’ जस्तो लाग्छ । तीन कक्षा पढ्दाखेरी नै पौडी भनेपछि हुरुक्क हुने उनी पौडी सिक्नकै लागि राजधानीका फरक–फरक ठाउँ पुग्थिन् । स्कुल छुट्टी भयो कि स्पा र स्विमिङ पुलको सुविधा हुने ठाउँतिर दौडिन्थिन् ।

पाठशाला नेपाल फाउन्डेसनमा कक्षा १० मा अध्ययनरत तिनै राशिका यतिबेला पौडीका क्षेत्रमा बेग्लै पहिचान बनाइसकेकी छन् । पौडी सम्बन्धीका राष्ट्रिय तथा क्षेत्रीय प्रतियोगिताहरूमा उनले हात पारेको सफलता लोभ लाग्दो छ । उनले झन्डै एक सयभन्दा बढी मेडल पाइसकेकी छन् ।
सातौं राष्ट्रिय खेलकुद–२०७२ मा मध्यमाञ्चलबाट भाग लिएकी राशिकाले १६ वर्ष पुरानो कीर्तिमान तोडेकी छन् । चार सय मिटरको स्विमिङ दौड सबैभन्दा छोटो समयमा पार गरेकी उनले गोल्ड मेडलसहित नगद १५ हजार रुपैयाँ हात पार्न सफल भइन् । राष्ट्रिय स्तरका प्रतियोगिताहरूमा उनले अहिलेसम्म २ वटा स्वर्ण, २ वटा रजत, ३ वटा कास्य हात पारिसकेकी छन् । त्यस्तै नेपाल ओलिम्पक कमिटीले ‘ओलम्पिक डे २०१५’ मा आयोजना गरेको प्रतियोगितामा ४ वटा स्वर्ण, ७ वटा रजत, एक कास्य जितेकी छन् । पौडी प्रशिक्षक रवीन्द्र पौडयाल उनका बुबा नै प्रेरणाका स्रोत हुन् ।
राजधानीको रोजबड स्कुल पढ्दै गर्दा तेस्रो माछापुच्छ्रे स्विमिङ च्याम्पियन राष्ट्रव्यापी प्रतियोगितामा दुइटा मेडल हात पारेपछि राशिकामा हौसला थपियो । त्यसपछि पौडीका कुनै प्रतिस्पर्धा उनले छुटाइनन् । र, भाग लिए जति कुनैमा हार पनि खानुपरेन । ‘स्विमिङमै मेरो रहर छ,’ उनले भनिन्, ‘ओलम्पिकमा जाने सपना छ ।’ कोर्सको पढाइका अतिरिक्त उपन्यास पढ्न रुचाउने उनी चलचित्रमा पनि उत्तिकै रुचि राख्छिन् । प्रेम कथामा आधारित ‘द फल्ट इन आवर स्टार्स’ उनको प्रिय पुस्तक हो । उनमा घुम्न पनि उत्तिकै रहर छ ।

प्रकाशित : चैत्र ६, २०७३ १०:११
प्रतिक्रिया
पठाउनुहोस्

स्थानीय तह आर्थिक रूपमा कमजोर

नयाँ स्थानीय तहको आन्तरिक आम्दानी मुस्किलले वार्षिक ३ लाख
कान्तिपुर संवाददाता

डोल्पा — साविक २३ गाविस रहेको डोल्पामा आठवटा स्थानीय तह बनाइएको छ । यी स्थानीय तहको आन्तरिक आर्थिक समाथ्र्यता कार्यालय सहयोगी पाल्न नसक्ने अवस्थामा रहेको देखिएको छ ।

जिल्लामा रहेका स्थानीय तहमा आन्तरिक आर्थिक सुरक्षा कमजोर रहेको जिल्ला समन्वय समितिका सचिव सागर मिश्रले बताए । उनका अनुसार विघटित गाविसहरूको आन्तरिक आर्थिक स्रोतलाई हेर्दा नयाँ स्थानीय तहको आन्तरिक आम्दानी मुस्किलले वार्षिक ३ लाख मात्र छ । अघिल्ला आर्थिक वर्षमा सबै गाविसको आन्तरिक लेखा परीक्षण गरेका सहायक लेखापाल रुपचन्द्र बुढाका अनुसार सदरमुकामको दुनै गाविसबाहेक साविकका २२ गाविसको आन्तरिक आय प्रतिवर्ष २० हजार पनि नकट्ने अवस्थाको छ ।
जिल्ला समन्वय समितिको आन्तरिक आय बढीमा १० लाखमात्र छ । डोल्पामा बनेका २ नगरपालिका र ६ गाउँपालिकामा निर्वाचित हुने जनप्रतिनिधि र खटाइने कर्मचारीको क्षमता, दक्षता, सामथ्र्य र दूरदर्शितामा समेत जनताले आशंका गर्न थालेका छन् । गत आर्थिक वर्षसम्मको आर्थिक प्रतिवेदनअनुसार साविकको दुनै गाविसले मात्र विभिन्न कर गरेर करिब २ लाख आन्तरिक आम्दानी गरेको छ ।

प्रतिवेदनअनुसार सबै गाविसको आन्तरिक आम्दानी मुस्किलले २० हजारमात्र पुगेको छ । सदरमुकामको ठूलीभेरी नगरपालिकाको समायोजित आम्दानी गतवर्ष २ लाख ६० हजार मात्र छ । त्रिपुरासुन्दरी नगरपालिकाको साविकका पाँच गाविसको आन्तरिक आम्दानी वार्षिक १ लाखमात्र छ । आन्तरिक आम्दानीले स्थानीय निकायले एक जना कार्यालय सहयोगी पनि पाल्न नसक्ने अवस्था नरहेको नागरिक समाज डोल्पाका संयोजक सुरेन्द्र ढकालले बताए । नयाँ कर प्रणाली लागु गरेमात्र नयाँ स्थानीय तहलाई आत्मनिर्भर बनाउन सकिने उनको भनाइ छ ।

प्रकाशित : चैत्र ६, २०७३ ०९:५३
पूरा पढ्नुहोस्
प्रतिक्रिया
पठाउनुहोस्